1 Tes 5:10 - Musamu Wamubwete 2013

¹⁰ Nde wafwa mu ntoono beetu, mpisi heki, ti hayuku turi naana ti hayuku twabwa tolo, lo tubeeneenu mwooyo kintwaari na nde.

1 Tes 5:10 Referans Kwoze

1 Pet 3:18

Bukuri Kiristo wamono mpasi, lwo lumosi mu masumu; nde wasuunguma wamono mpasi mu ntoono bahele kusuunguma, mpisi heki kalunata kuri Nzaambi. Nde bamudzusiri mu muswinyi, ngo Mpeeve yamufulukisi.

Mukaanda kuri bari Efeso 5:2

na dyaatileenu kunsa ntiilu, bunubwo se Kiristo kari kalutiila, na kayekele nyutu yaandi kuri Nzaambi mu kikabu na mu kumudzusa, mu ntoono beetu, bunu mananaasi ma mfuku yayibwete.

Mukaanda kuri bari Loma 8:34

Na wubakesele mukanu? Kiristo Yesu wafwiiri, ha yulu haho se wafulukiri, wuri ha lubakala lwa Nzaambi, na wuri mu kutunwaanikinaa mu lusaambulu.

1 Tes 4:17

tumi beetuneenu tuba twakiri mwooyo, batunaanguna ha kimosi na bo mu matuti, mu kubwaana Mfumu mu kingye-kingye, na kuba kintwaari na Mfumu mantaangu momanso.

2 Kol 5:21

Wunde waba wahele na masumu, nde wamusa ngaa-masumu mu ntoono beetu, mpisi heki mu nde, tubeenee nsungumunu ya Nzaambi.

2 Kol 5:15

Nde wafwiila mu bobanso, mpisi heki bamwooyo bahele kubweese kuba bamwooyo mu bo-meene, ngo mu wunde wafwiiri na wafulukiri mu ntoono bo.

1 Pet 2:24

Mu nyutu yaandi, nde wanata masumu meetu ha yulu muti, mpisi heki bu tufwiiri mu masumu, tuba mwooyo mu ntoono nsungumunu. Mu biwa byaandi beenu luri lwatsinukusu.

Mukaanda kuri Tito 2:14

Nde wayekiri nyutu yaandi mu ntoono beetu, mpisi katukuula mu momanso mamabi, na kutsyemekese kaanda dya nde-meene dyasoolu, diri na kuheme mu biyiriki byabibwete.

1 Tim 2:6

Nde waheeri kikori ngo nyutu yaandi, mu kukuula baatu bobanso, kikyo ngo kimbaangi mu ntaangu yayelemene.

1 Tes 4:13

Bampaangi, beetu tutii ko ti beenu luba kunsa lubu, mu mitariri babo ba mwaafwa, mpisi luhele kwenyoongo bunu bakaka bahele na nsiitu.

1 Kol 15:3

Mukwongo, me nyalutubukiri hani tete, ma nyataamburi me se ti: Kiristo wafwa mu ntoono masumu ma beetu, bunu buri Matinu;

Musamu wamubwete watina Yowane 15:13

Ntiilu yibvuriri bunene yiri na muutu ngo, ya kuha kidziingu kyaandi mu banduku.

Musamu wamubwete watina Yowane 10:17

Hango nkuumbu, Taata tiiri me, bukuri me nyiha kidziingu kyaami mu kubweese kukiholo.

Musamu wamubwete watina Yowane 10:11

Me ngo Mutari wamubwete; mutari wamubwete, wuhaanaa kidziingu kyaandi mu ntoono bimeeme byaandi.

Musamu wamubwete watina Matayi 20:28

Bwobumosi mu Mwaana muutu wahele kwiisa mu kuri ti bamusalila, ngo mu kusalila na kuha kidziingu kyaandi, bunu kikori mu balaka.»

Musamu wamubwete watina Yowane 10:15

bunu bu nyaabiri Taata, me se bunubwo nyaabiri Taata, na me nyiha kidziingu kyaami mu bimeeme byaami.

1 Tes 4:15

Mukwongo, mi turi mu kuleele beetu, bunu buri maampu ma Mfumu, mimami: beetuneenu tuba twakiri mwooyo natee mu nyisulu Mfumu, ka tuba ku mankula ma babo bafwa ko.

1 Tes 5:6

Hango-nkuumbu, yaa tubweeneenu tolo bunu bakaka ko, ngo tubeenee naana na kuba na ndiilu na nwiinu byayelemene.

2 Tim 2:11

Maampu mamama mayelemene mu kusiila kanyi: «Mbuti tufwiiri kintwaari na nde, lo sa twaba mwooyo kintwaari na nde se;