Yosua 12:7 - Alkitab Duri

⁷ Susimi joo Yosua sola to-Israel ntaloi raja to mangparenta llan kalambunanna Sa'dan Yordan, mangpamula jaja mai Baal-Gad jiong Lombok Libanon ratu sau' Buntu Malenyu' siandah tana to-Edom. Ia to tana narampa Yosua pantan ditawan suku to-Israel napumanahhi.

Yosua 12:7 Referans Kwoze

Yosua 11:17

Maluahna joo tana narampa Yosua, mangpamula llo' mai Buntu Malenyu' siandah tana Edom, ratu re' Baal-Gad jio Lombok Libanon sau'na Buntu Hermon. Gaja sainni Yosua sirari rajana joo kota, apa nang nataloi, najokkoi to rajana napateii.

Yosua 11:23

Susimi joo Yosua rrampa ngasanni joo kota, susi to Napangparentan PUANG Allataala lako Nabi Musa. Nabenni Yosua lako to-Israel joo kota, natawanni pantan suku napuapai. Mangkai joo too pajami to to-Israel massirari, te'damo nnapa-apai to kotana.

Yosua 9:1

Ia tonna sa'dingmi to kapataloanna to-Israel to sininna raja llan kalambunanna Sa'dan Yordan, la jaona buntu, la jiongna garonto' buntu, la jiona randan Tasik Tangnga ratu re' Buntu Libanon, iamo to rajana to-Het, rajana to-Amori, rajana to-Kanaan, rajana to-Feris, rajana to-Hewi na rajana to-Yebus,