Yosua 11:15 - Alkitab Duri

¹⁵ Sininna to Napangparentan PUANG Allataala lako Nabi Musa, tompangjaman-Ni, mangkami napau Nabi Musa lako Yosua. Na sininna joo napugauk ngasan Yosua, te'da bang moi mesa' to tangnapugauk.

Yosua 11:15 Referans Kwoze

Yosua 1:7

Iara ia, la matappa' tonganko mubarani. La mupugauk tongan to sininna atoran to nabenko Nabi Musa tompangjaman-Na', danggi' lalo na den tangmuingaran, dikua na sininna to apa mupugauk la melo assele'na.

Jamanna Rasulu' 20:20

Miissen kumua te'da kubunian kamu' to apa la mipumelona. Kuajahhi kamu' la jio passitammuan tobuda na la jio bola.

Jamanna Rasulu' 20:27

Kupamanassanmo kamu' sininna to pakkaeloran-Na Puang Allataala.

Yosua 11:12

Sininna to kota natalo ngasanni Yosua, napateii to rajana sola sininna taunna to torro llan kota, susi to nasuanni Nabi Musa, tompangjaman PUANG Allataala.

Lukas 11:42

Macilaka kamu' to to-Farisi! Ia to assele' tanananmi to tangkeangga'na susinna tulasi, kunyi', na rampa-rampa laen miben sangtawa sangpulona lako Puang Allataala, apa te'da mipugaukki to kamarurusan sola pangpakamoja' lako Puang Allataala. Na iara joo to kaminang parallu mipugauk, apa la mipugauk too to laenna.

Matius 23:23

Macilaka kamu' to guru agama sola to-Farisi, nasaba' tomajekkong kamu'! Ia to assele' tanananmi to tangkeangga'na susinna tulasi, bua adas na jintang, mipangben sangtawa sangpulona lako Puang Allataala. Apa ia to parenta kaminang parallu lan atoranna Nabi Musa te'da mipugaukki susinna: kamarurusan, mamase, nturu' pakkaeloran-Na Puang Allataala. Na iara joo to kaminang parallu la mipugauk, apa la mipugauk too to laenna.

Yosua 11:14

Sininna tau llan joo kota dipatei ngasan, te'da lalo dieloran tuo. Apa ia to sininna ewanan to makeangga' sola sininna patuoanna naala ngasanni to-Israel napuapai.

Yosua 11:16

Susimi joo, Yosua rrampa tana Kanaan: membuntunna tana Yehuda, padang makase Negeb, tana Gosyen, membuntu-buntunna tana Yehuda, Lombok Yordan na membuntunna tana Israel.