Yahya 8:12 - Alkitab Duri

¹² Mangkada pole' omi Puang Isa lako tobuda nakua, “Aku'mo arrang to nnarrangngi penawanna tolino. Ia to tonturu'na', te'da nalalumingka lan kamalillinan, apa la nnampui arrang to mbenni katuoan.”

Yahya 8:12 Referans Kwoze

Yahya 12:46

Ratumo' tama lino susi arrang, dikua na ia to tomatappa' lako Aku', te'damo nalatorro lan kamalillinan.

Yahya 9:5

Padana' masainna lan lino, Aku'mo arrangna tolino.”

Yahya 12:35

Mebalimi Puang Isa nakua, “Cingga'tu'mora tee Aku' arrang ssolan kamu'. Jaji lumingkamo kamu' ke sola unapa kamu' tee arrang, danggi' mikalillinan. Ia to tolumingka lan kamalillinan, te'da naissenni umbora la nanii male.

Matius 5:14

Kamu'mo to dipasusi arrangna tolino. Ia to kampong jao buntu la pajan ia.

Yahya 3:19

Iamo tee dinii mpasalai to tolino kumua ratumo tama lino to arrang nnarrangngi, iamo to Anak, apa la'bih nakabudai to kamalillinan, iamo to kagajatan, nasaba' gaja'i to panggaukanna.

2 Petrus 2:4

La jajii susi joo, nasaba' te'da natangssessai Puang Allataala to malaeka' madosa, apa napembuanganni tama naraka, napatamai posi' tana malillin, to dinii ntarungkui arannai nadete' to wattu nanii Puang Allataala rra'tah kara-karana.

Jamanna Rasulu' 13:47

Sanga susi ia tee to nasuankan Puang Allataala kumua, ‘Pura kupattantumo kamu' menjaji arrang lako bangsa tangngia to-Yahudi dikua ammiparatui to kasalamatan lako lili'na lino.’ ”

Jamanna Rasulu' 26:23

kumua, ‘Ia to Raja Mangpasalama' nabasse Puang Allataala, la dipakario-rio, apa iamo jolona la tuo pole' jio mai kamatean, dikua anna mbawa arrang, iamo to Kareba Kasalamatan, la lako to-Yahudi la lako bangsa laen.’ ”

Yahya 14:6

Mebalimi Puang Isa nakua, “Aku'mo minii nnissen Puang Allataala sola nnampa' katuoan. Moi mesa' tau te'da nakullei ratu lako Ambe', ke te'dai kupuissenni.

Yahya 7:17

Ia ke den tau madoang nturu' pakkaeloran-Na Puang Allataala, la naissen kumua pole umbora tee pangngajaran-Ku'. La naissen kumua pole jioraka mai Puang Allataala, iarika pangngajaran-Ku' Aku'.

Pengkitanna Yahya 21:24

Ia to katuoanna sininna bangsa lan lino naarrangngii, na ia to raja la mbawa kasugiranna mentama ntuu joo kota.

Lukas 2:32

Iamo mpakanassai to pakkaeloran-Ta' lako bangsa tangngia to-Yahudi, na mpaden kamala'biran lako umma'-Ta' Israel.”

Yudas 1:13

Susi tooi bombang liwa' tonggo jiong tasik mangkambura carepa, nasaba' pajan bangmo to panggaukan mesirisanna. Susi tooi bintuin liu lako liu jio mai, apa napasadianmo Puang Allataala ngenan kaminang malillin te'da cappa'na.

2 Petrus 2:17

Ia tuu lako guru tangtongan te'da bua'na susi kalimbuah ma'timo ba'tu susi saleu' ssamboi padang menta'dean nairi' kalimpuru. Napasadianmo ngenan Puang Allataala to liwa' malillin, la napanianni.

Yudas 1:6

Ingaran tooi to malaeka' tonna anu'. Den ba'tu pira-pira malaeka' cia' ntarimai to kuasa nabenni Puang Allataala, nasalaii to ngenanna jao suruga. Narantei Puang Allataala joo malaeka' te'da cappa'na, napatamai pangtarungkuan kaminang malillin sanadete'na Kiama' to lino to nanii Puang Allataala rra'tah kara-karana.

Yahya 12:36

Katappa'ii tee Aku' arrang ke sola unapiki', ammimenjaji anak arrang.” Ia tonna mangkamo Puang Isa mangkada susi joo, mellelemi na te'damo napangpekitan kalena lako tobuda.

1 Yahya 1:6

Ia ke takua kumua mesa' penawamiki' sola Puang Allataala, apa te'da tatuo situru' pakkaeloran-Na, manassa mangnguragaki' sanga te'da taturu' pangngajaran tongan.