Titus 1:16 - Alkitab Duri

¹⁶ Mangngakui kumua nnissen Puang Allataala, apa sitonganna diissen kumua mangnguragai nasaba' te'da naturu' pakkaeloran-Na Puang. Meko'dosan na cia'i nturu' Puang. Te'da bang nakullei mpugaukki to disanga melo.

Titus 1:16 Referans Kwoze

1 Yahya 2:4

Topangnguraga na tote'da naampui katonganan to tomangkada kumua, “Nnissenna' Puang Allataala”, apa te'da naturu'i to parenta-Na.

Efesus 5:6

Danggi' mieloranni to tau susi joo mpalao sala kamu' mpake kada-kada mala'bih apa sitonganna te'da natongan. Nasaba' mabirih Puang Allataala lako to tocia' nturu' parenta-Na.

Yudas 1:4

Gaja parallu joo, nasaba' denmo guru tangtongan mentama buni tangnga-tangngami. Nakua kumua, “Pada-padaki' tomatappa'”, apa sitonganna cia'i mengkaturu' lako Puang Allataala. Nakua too kumua, “Wa'ding bangki' manggauk sala situru' pakkaeloran penawanta', sanga mangpakamoja' to Puang Allataala.” Iamo carana mbalik salai to pangngajaran pangpakamoja'-Na Puang Allataala. Te'da too natarimai to Puang Isa Almaseh kumua Ia manda mesa-mesanna Puangta' to makuasa. Ia joo guru tangtongan la nasessa Puang Allataala, sanga napau jolo nabi tonna anu' to pangcalla napattantumo Puang Allataala la nalolongan to tau susi joo.

Roma 1:28

Napupangngelohnai Puang Allataala to tolino mangpikkiri' gaja', anna pugaukki to tangsipato'na, nasaba' nasangai kumua te'damo naparallu nnissen Puang Allataala.

Pengkitanna Yahya 21:27

Apa ia to apa carepa te'da lalo nawa'ding la mentama, susinna ia tompugauk apa mesirisan ba'tu mangnguraga. Ia to tau la mentama ia manda to tomangka diuki' sanganna lan Sura' Katuoan, sura'-Na Anak Bembala'.

Pengkitanna Yahya 21:8

Apa ia to tolanjangan, tomboko'i Puang Isa, totangmessipa', topabuno, tomanggauk sala, tomangpatama-tama, tossompa dewata, na sininna tomangnguraga la dipenca'beanni tama api colo' manglanya-lanya. Iamo kamatean mangpenduan.”

1 Timotius 5:8

Apa ia ke den tau te'da najaranai tomatuanna ba'tu repokkona, padai to mpessakkanni kamatapparanna. La'bih gaja' ia, na ia to totangmatappa'.

1 Timotius 1:9

Parallu diingaran kumua, ia joo atoran dipaden tangngia lako tomelo, apa lakori togaja' iarika totangmangpesa'ding, lako totangnturu' Puang iarika tomadosa, lako totangssompa iarika totangkasiri' Puang, lako tombuno indona iarika ambe'na, na sininna to mbuno padanna rupa tau,

Kada Bulawan 30:12

Den tau ssanga kalena te'da salana, apa sitonganna te'dapa nadipaccingngi dosana.

2 Timotius 3:17

Ia to umma'-Na Puang Allataala, ke dipakinalloii to apa diuki' lan Sura' Allataala, nakullei mpugauk sininna pangjaman melo.

Titus 3:1

Pangngingaranni sininna to tomatappa' iti', namenturu' lako to ambe' lan tondok na tomangparenta, anna danggi' nabali-balii. La sadia bang mpugauk panggaukan melo,

Titus 3:3

Nasaba' moi kita' tonna jolona bango' tooki', antalao sala, te'da too taturu' Puang Allataala. Napukaunan tooki' mangrupa-rupa kamadoangan sola pakkaeloran penawa. Mpugauk tooki' kagajatan sola masere ati, na massikaba'ci bangki'.