Roma 3:8 - Alkitab Duri

⁸ Ia ke susii joo, ciapai na te'da tamangkada kumua, “Pugaukmi to kagajatan, nampaden kameloan”? Sitonganna den tau mpau salana' kumua mangkada susina' joo. Apa ia joo tau sipato' nacalla Puang Allataala.

Roma 3:8 Referans Kwoze

Roma 6:1

Ia ke susimi joo, apara la takua? La da'tan bangpiriki'ka mpugauk dosa, dikua anna samelo-melona penawan-Na Puang Allataala lako kaleta'?

Roma 6:15

Umbomora la takua too? Wa'dingriki'ka mpugauk dosa, nasaba' nakuasaimiki' kameloan penawan-Na Puang Allataala, na te'damo nakuasaiki' atoran agama? Te'da nalasusi joo!

Roma 7:7

Na ia ke susii joo apara la takua? Takuaraka kumua gaja' to atoranna Nabi Musa? Te'da ia! Apa nnissenmo' dosa, nasaba' kuissen to atoranna Nabi Musa. Ia kenna te'da nadiuki' lan atoranna Nabi Musa kumua, “Danggi' ngkadoangngi apanna padammu rupa tau!”, te'da kuissenni to madoang.

Roma 5:20

Ia to atoranna Nabi Musa nabenni Puang Allataala, dikua namanassa kumua madosa to tolino. Sanapengkulleinna tolino nturu'i to atoran, sabuda-budanna to dosa napugauk. Apa moi sabuda-budanna dosana to tolino, samelo-melona penawan-Na Puang Allataala lako tolino.

Yudas 1:4

Gaja parallu joo, nasaba' denmo guru tangtongan mentama buni tangnga-tangngami. Nakua kumua, “Pada-padaki' tomatappa'”, apa sitonganna cia'i mengkaturu' lako Puang Allataala. Nakua too kumua, “Wa'ding bangki' manggauk sala situru' pakkaeloran penawanta', sanga mangpakamoja' to Puang Allataala.” Iamo carana mbalik salai to pangngajaran pangpakamoja'-Na Puang Allataala. Te'da too natarimai to Puang Isa Almaseh kumua Ia manda mesa-mesanna Puangta' to makuasa. Ia joo guru tangtongan la nasessa Puang Allataala, sanga napau jolo nabi tonna anu' to pangcalla napattantumo Puang Allataala la nalolongan to tau susi joo.

Matius 5:11

Masannang kamu', ke dicacca kamu', ke dipakario-rio kamu' sola ke napau gaja' kamu' tau, nasaba' mituru'na'.

2 Korintus 6:8

Manassa kumua tonasuakan Puang Allataala, moi nataratte'kan tau ba'tu napakasiri'kan, moi napujikan ba'tu napau gaja'kan. Nasangakan tau pangnguraga moi natonganna bang to kipau.

2 Korintus 11:15

Jaji, te'da too namejangngaran, ke ia tuu lako tompangjaman Ballisi' ssanga toda kalena tompangjaman Puang Allataala. Apa la nnampa' una balahna siangga' to panggaukanna.