Roma 1:6 - Alkitab Duri

⁶ Na ia to kamu' to-Roma mentama toomo kamu' rekenan sininna bangsa la menjaji umma'-Na Puang Isa Almaseh.

Roma 1:6 Referans Kwoze

Pengkitanna Yahya 17:14

Namane' mangrari joo olok-olok sola tuu lako raja nnewa Anak Bembala'. Apa ia joo Anak Bembala' ntaloi sola tau matappa'-Na, sanga iamo Puangna sininna puang na Rajana sininna raja.” Ia to taun-Na, iamo to mangka napilei anna pakedoi penawanna.

1 Petrus 2:9

Apa kamu'mo to bangsa napileimo Puang Allataala, ammimenjaji imangna Raja to mipangjaman. Napupenjaji kamu' bangsa to disarakki jio mai bangsa laen ammimenjaji tau mesan-Na. Napileimo kamu' la mpangpeissenan panggaukan-Na to te'da susinna. Iamo ntambai kamu' messun lan mai kamasolangan, ammimentama kamasannangan to liwa' mejangngaran.

2 Petrus 1:10

Ee, tomala'bihku' sola ngasan! Napileimo kamu' Puang Allataala menjaji umma'-Na anna tambai kamu' nturu'i. Iamo joo la mipengkulle-kullei nturu' pakkaeloran-Na, anna manassa lako kalemi sola tolaen kumua tongannamo kamu' napilei Puang Allataala. Na ia ke mipugaukki susi joo, te'damo milampugauk pole'i to sipa' jolomi.

Ibrani 3:1

Ee, todipusile'to padangku' tomatappa' to mangkamo napilei Puang Allataala la mentama suruga! Ingaran meloi to sipa'-Na Puang Isa to takatappa'i, to napattantu Puang Allataala menjaji Rasulu' na Imang Lompo lan agamanta'.

1 Korintus 1:9

Ia to Puang Allataala sipato' dikatappa'i. Iamo mpilei kamu' ammimesa' penawa sola Anak Allataala, Puangta' Puang Isa Almaseh.

1 Petrus 2:21

Napileimo kamu' Puang Allataala mpugaukki susi joo. Moi Almaseh mperasai pa'dik ssulle kamu', anna menjaji palelean mata lako kamu' ammituru'i.

2 Timotius 1:9

Napileimiki' Puang Allataala menjaji umma'-Na, napasalama'ki'. Tangngia kumua mpugaukmiki' kameloan anna pugaukki susi joo, apa naakkattai memanmo situru' kameloan penawan-Na, tonna te'dapa nadipaden tee lino. Naakkattai kumua la napakitanki' Puang Isa Almaseh to kameloan penawan-Na Puang.

Efesus 1:11

Ia to napugauk-Na Puang Allataala, napasituru' tarruhhi akkatta-Na sola pakkaeloran-Na to pura napattantumo. Ia tonna te'dapa nadipaden tee lino napileimiki', sanga madoangngi antamenjaji umma'-Na, nasaba' memmesa'ki' sola Almaseh.

2 Tesalonika 2:14

Ia to Kareba Kasalamatan to kipangpeissenan iamo carana Puang Allataala mpupenjaji kamu' umma'-Na, ammiwa'ding mperasai kamala'biran-Na Puangta' Puang Isa Almaseh.

1 Tesalonika 2:12

Kipangngingaran kamu', kipamasumanga' kamu', angkimeta'da lako kalemi na ia to panggaukanmi la susi sipato'na umma'-Na Puang Allataala. Nasaba' Puang Allataalamo mpilei kamu' menjaji umma'-Na lan kaparentan-Na ammiwa'ding mperasai kamala'biran-Na.

Kolose 1:6

to nasa'dingmo tau lan lili'na lino, na mpaden barakka' lako tau. Susi toomo kamu' nabarakka'i sipamulanna misa'ding, ammiperasai tonganni to kameloan penawan-Na Puang Allataala.

Galatia 1:6

Jangngahna' aku', sanga madoi' bang kamu' mboko'i Puang Allataala to mpileimo kamu' menjaji umma'-Na. Torro sala bang to pangpakamoja'-Na Almaseh, nasaba' male kamu' nturu' kareba kasalamatan laen.

Roma 9:24

Kita'mo to mangka napilei jio mai to-Yahudi sola bangsa laen.

Kolose 1:21

Susi toda kamu' tee too dipasikalinomo Puang Allataala. Jolona tangngia kamu' umma'-Na Puang Allataala na miewali tooi, sanga gaja' to penawammi sola panggaukanmi. Napasikalinomo kamu' Puang, nasaba' kamatean-Na Anak, ammidipatorro leko' jio mai totangnturu' Puang, anna te'da caccami ba'tu kakuranganmi ke dipangngolomo kamu' lako Puang Allataala.

Yudas 1:1

Ee, tomala'bihku' sola ngasan, todipilei na tonapakamoja' tarruh Ambe' Puang Allataala! Naampai kamu' saratun-Na pole' Puang Isa Almaseh. Aku' Yudas sile'tona Yakub, tonasua Puang Isa Almaseh, ngkiringan kamu' tee sura'.