Matius 19:21 - Alkitab Duri

²¹ Nakuamo Puang Isa, “Ia ke madoangko sukku', malemoko mbaluk ngasanni to ewananmu, ammubenni tokaasi-asi to allinna, mumane' nnampa' kasugiran jao suruga. Ianna mangkamo joo mupugauk, undimoko nturu'na'!”

Matius 19:21 Referans Kwoze

Markus 10:21

Massemi penawan-Na Puang Isa ngkitai joo tau anna mangkada nakua, “Mesa'pa to parallu la mupugauk. Malemoko mbaluk ngasanni to ewananmu, ammubenni tokaasi-asi to allinna, mumane' nnampa' kasugiran jao suruga. Ianna mangkamo joo mupugauk, undimoko nturu'na'.”

Lukas 18:22

Ia tonna sa'dingmi Puang Isa joo pebalinna, nakuanmi, “Mesa'pa to parallu la mupugauk. Malemoko mbaluk ngasanni to ewananmu, ammubenni tokaasi-asi to allinna, mumane' nnampa' kasugiran jao suruga. Ianna mangkamo joo mupugauk, undimoko nturu'na'.”

Lukas 12:33

Balukki to ewananmi mibenni tokaasi-asi. La nnangah kamu' doi' to te'da namemmatua, iamo to kasugiran dianna jao suruga. Ia joo kasugiran te'da nata'de, nasaba' te'da nakullei la naboko tau, na te'da nakullei nakande ane.

Lukas 14:33

Mpatarruhhi kadan-Na Puang Isa nakua, “Susi toda kamu'. Te'da bang kamu' mesa' tau ngkullei menjaji tonturu'na', ke te'da mipasalaii penawa to apammi.

Jamanna Rasulu' 2:45

Ianna den mbaluk apanna ba'tu ewananna, natawa-tawanni solana to allinna situru' kaparalluanna simesa'-mesa' tau.

Yahya 12:26

Inda-inda kamu' to madoang mpangjamanna', la undii lako Aku', anna umbo-umbo kunii male, jio todai. Ia to tompangjamanna' la naangga' Ambe'-Ku'.”

Lukas 9:23

Nakua omo Puang Isa lako tobuda, “Ia to tolanturu'na', te'da nalanturu'i bang pakkaeloran penawanna, apa allo-allo la mpassanni kaju sitambenna, naturu' tarruhna'.

Yahya 10:27

Nasa'ding bembala'-Ku' to gamarang-Ku'. Na kuissenni, naundi ngasanmi lako Aku'.

Matius 5:48

Ia to Ambe'mi Puang Allataala jao suruga mpakamoja' sininna tolino. Iamo joo la susi toda mipugauk.”

Lukas 16:9

Mangkadami Puang Isa nakua, “La miingaran! Pakei tee mai kasugiran lino mpupenjajii soba'mi to tau, anna tarima kamu' Puang Allataala jao bola tangmasolang, ke te'dami bua'na tee kasugiran lino lako kalemi.

Matius 19:28

Nakuamo Puang Isa lako anak gurun-Na, “La miingaran tee kadang-Ku' kumua, lan Lino Barun-Na Puang Allataala, ia tee Aku', Anak Mentolino, la cumadokkona' jao cadokkoan kaminang mala'bih! Iamo joo wattu milacumadokko toda jao sangpulo dua cadokkoan mala'bih la mparenta sangpulo dua pangrapuanna to-Israel.

Matius 16:24

Mangkadami Puang Isa lako anak gurun-Na nakua, “Ia to tolanturu'na', te'da nalanturu'i bang pakkaeloran penawanna, apa la mpassan kaju sitambenna, naturu' tarruhna'.

Lukas 6:40

Ia to mesa' passikola te'da nala'bih matande na gurunna. Apa ia ke tamma'mi melajah, la menjaji padami gurunna.

Lukas 5:27

Mangkai joo too messunmi Puang Isa, na ngkita mesa' passassung disanga Lewi cumadokko lan kantoro'na. Nakua Puang Isa lako, “Maleko mai, nturu'na', kupuanak guruko!”

Markus 8:34

Mangkai joo too, natambaimi Puang Isa to tobuda nasirempun sola to anak gurun-Na, nakuanni, “Ia to tolanturu'na', te'da nalanturu'i bang pakkaeloran penawanna, apa la mpassan kaju sitambenna, naturu' tarruhna'.

Matius 9:9

Ia tonna mpatarruhmo kalingkan-Na Puang Isa, ngkitami mesa' passassung disanga Matius cumadokko lan kantoro'na. Nakua Puang Isa lako, “Maleko mai nturu'na', kupuanak guruko!” Ta'pa ke'dehmi anna male nturu'i.

Ibrani 10:34

Na turu' kamu' mpumasussai to toditarungku. Ia tonna rampai kamu' tau to apammi, micanninganni ati, sanga miissen kumua den unapa to apa miampui, iamo to nabassean kamu' Puang Allataala. La'bih melo ia joo, sanga te'da nalata'de.

Markus 2:14

Ia tonna polemo, ngkitami mesa' passassung disanga Lewi anakkana Alfeus cumadokko lan kantoro'na. Nakua Puang Isa lako, “Maleko mai, nturu'na', kupuanak guruko!” Ta'pa ke'dehmi anna male nturu'i.

Matius 8:22

Apa mebalimi nakua, “Undiko nturu'na'! Ake'mo na tomatemora llamun tomatena.”

Matius 4:19

Nakuamo lako sola dua “Male kamu' mai nturu'na'! La kuben kamu' jaman nnajahhi tau ngkatappa'ina'.”

Matius 19:20

Mebalimi joo tokallolo nakua, “Oo Puang, kuturu' ngasanmo kita' joo parenta, denparaka to parallunna?”

Matius 19:22

Ia tonna sa'dingmi joo kada, masussami penawanna joo tokallolo namale memboko', nasaba' gaja sugihhi.