Matius 11:21 - Alkitab Duri

²¹ Nakua Puang Isa, “Macilaka kamu' to-Khorazim sola to-Betsaida! Buda tanda mejangngaran to mangka kupugauk jio kotami, apa te'dapa mimengkatoba'. Ia kenna la dipugauk joo tanda mejangngaran jio kota Tirus sola kota Sidon, masaimo mengkatoba' tuu lako tau jio, moi na bangsa tangngia to-Yahudi. La mangpakean kamasussan, napessamboran too au de' ulunna, sanga mpenassannii dosana.

Matius 11:21 Referans Kwoze

Jamanna Rasulu' 12:20

Gaja nakagallii Raja Herodes joo to-Tirus na to-Sidon. Iamo joo namesa' kada ratu mpessikitaii. Nasedei jolo' to kapala salassa' raja disanga Blastus la mpangkadanni, namane' male sikita raja. Meta'dai la sipemeloan, sanga ia joo todokkona pole jiora mai tondokkona Raja Herodes nanii nnala kande.

Yahya 12:21

Malei to to-Yunani lako Filipus nakuanni, “Oo mane, ia ke wa'dingngi, madoangkan la sitammu Puang Isa.” (Ia to Filipus to-Betsaida jio tana Galilea.)

Lukas 9:10

Ia tonna polemo joo rasulu' jio mai kalingkanna, pada nacuritami lako Puang Isa to apa napugauk. Mangkai joo too, napessalaii Puang Isa to tobuda, namale mesa sola to rasulu' lako kota Betsaida.

Markus 6:45

Mangkai joo too, nasuami Puang Isa to anak gurun-Na endek de' lopi, najolo lian kota Betsaida, sambali'na tasik. Ia tonna polemo tuu lako tobuda,

Matius 15:21

Ke'dehmi Puang Isa jio mai ntuu joo, namale re' tana mengguririkkina kota Tirus sola kota Sidon.

Yudas 1:11

Macilaka ngasanni! Mpugaukki kagajatan susi to napugauk Kain. Mpugauk tooi dosa susi to napugauk Bileam, nasaba' madoang bangri kesaro. Dirabunnii nasaba' nnewai Puang Allataala susi to napugauk Korah tonna anu'.

Yahya 1:44

Ia joo Filipus sangkampongngi Andreas sola Petrus, to-Betsaida.

Lukas 6:17

Ia tonna solohmo Puang Isa sola anak gurun-Na jao mai buntu, kendenmi jio padang malappa. Buda tau to menturu'mo lako kale-Na sirempun ntuu jio na buda too tau ratu jio mai lili'na tana Yudea, kota Yerusalem, na kota Tirus sola kota Sidon jio randan tasik.

Markus 8:22

Ratumi Puang Isa sola anak gurun-Na jio Betsaida. Den tau ssolan tobuta lako, napeta'danni ke wa'dingngi nasapui to matanna napakita.

Markus 7:31

Ke'dehmi Puang Isa jio mai lili'na kota Tirus, na mpatarruh kalingkan-Na re' Sidon, namane' pole boko' mangnguju sau' Tasik Galilea nnola jio tana Sangpulo Kota.

Markus 3:8

kota Yerusalem, tana Idumea, na kadellekanna Sa'dan Yordan na jio mai mengguririkkina kota Tirus na kota Sidon. Ratu ngasanni ssikitan Puang Isa, nasaba' nasa'dingmi to apa mangka napugauk.

Matius 18:7

Na liwa' macilakanna to tolino, to tompalao sala padanna rupa tau. La den bang ia to tomangpalao sala, apa macilaka to tau susi joo.

Matius 11:22

Ingaranni! Ia ke Kiama'mi lino, la'bih maringngan ia sessana to to-Tirus sola to-Sidon, na ia to sessami sola ngasan.

Jamanna Rasulu' 27:3

Masawanna ratukan lako kota Sidon. Mabassa joo Kamandang Yulius lako Paulus, jaji naeloranni male lako ba'tu pira-pira solana, to mbenni apa naparallui.

Lukas 4:26

Apa moi nasusi joo, ia to Nabi Elia te'da nasuai Puang Allataala male ntulung sala mesa'na mesa' joo baine to matemo muanena jio tana Israel, apa disuari ntulung mesa' baine to matemo muanena jio kota Sarfat jio tana Sidon.

Markus 7:24

Ke'dehmi Puang Isa jio mai ntuu joo, namale re' tana mengguririkkina kota Tirus. Mentamami mesa' bola la mpembunianan kalena, sanga cia'i ke naissenni tau. Apa kaissenan bang unai.

Matius 26:24

Ia tee Aku' Anak Mentolino, nang la matena', susi to diuki' lan Sura' Allataala. Apa macilaka to tompangpejokkoanna'. La'bih melo ia, kenna danggi' pissen nadijajian.”

Amos 1:9

Mangkada-I PUANG Allataala Nakua, “Ia to to-Tirus pembuda bangmo mpugauk kagajatan, iamo joo nang la Kusessai. Nasaba' tangnaingaranmi to bassena kumua te'da na la siewa sola kampong laen na ia tonna mangka rrarii na patalo, ia to tonatalo jio mai pira-pira kampong nabalukki lako to-Edom napukaunanni.

Pengkitanna Yahya 6:12

Mangkai joo too kukita omi tonna piakki Anak Bembala' to segel mangpennannan, nata'pa nino liwa' tonggo. Na ia to allo memmalotong susi dodo ampe' lotong, namemmalea to bulan susi rara.

Pengkitanna Yahya 11:3

Ia joo wattu la ssuana' dua sa'bing-Ku' to mangpakean kamasussan mpangpeissenan pepasan-Ku' sangsa'bu dua ratuh annan pulona allona ba'tu patang pulo dua bulanna.”