Matius 10:42 - Alkitab Duri

⁴² Ia to tompaiso' sala mesa'na tee todikita majiong, nasaba' naturu'na', moi wai lino bangra, ingaranni kumua, la llolonganni barakka'.”

Matius 10:42 Referans Kwoze

Ibrani 6:10

Te'da natangmaruruh to Puang Allataala. Te'da natangnningaranni to apa mipugauk, iamo to pangpakamoja'mi to mipangpekitan lako kale-Na tommitulung padammi tomatappa', la jolona, la ia too allo.

Matius 25:40

La mebalina' kukua, ‘Sitonganna kukuan kamu' kumua, ia to mipugauk lako tee mai to kupusile'to, moi namakario-rio, battuananna mipugauk lako too Aku'.’

Matius 18:10

Mpatarruhpa kadan-Na Puang Isa nakua, “Ingaranni! Danggi' na den tee pea biccu' mikita majiong. Nasaba' la miissen kumua, den malaeka'na jio olo-Na Puang Allataala jao suruga nnampaii. [

2 Korintus 8:12

Ia ke masumanga' kamu' mpangbenni situru' to apa miampui, manassa masannang Puang Allataala ntarimai. Te'da napeta'dai to apa tangmiampui.

Lukas 6:35

Te'da nalasusi joo! Sibalikanna, pakamoja'i to ewalimmi, na la manggauk melo kamu' lako kalena. La mangpaindan kamu', na danggi'mo mitajanni to polena. Ia ke susii joo, la buda to pahalami, na la menjaji kamu' anak Puang Allataala Jao Majaona. Nasaba' melo to penawan-Na Puang Allataala lako totangnnissen mangkurru sumanga' na tomanggauk gaja'.

Kada Bulawan 24:14

susi toomi joo, dipumelo to macca. Ia ke maccako, la melo to katuoanmu to la muoloi lako, muampa'i to murannuan.

Lukas 17:2

La'bih melo ia, ke ditoke'ii batu pelullu' gose' to kollongna, naditallanan do' tasik, na ia ke pangkatumanganna nasala mesa'na tee mai pea biccuk na te'damo namatappa' lako Aku'.

Matius 18:14

Susi toomi Ambe'mu Puang Allataala jao suruga tangnaeloran sala mesa'na joo pea sibiccu' la ta'de kamatapparanna.”

Kada Bulawan 19:17

Ia ke ngkamaseiki' tokaasi-asi, butung to mangpeindan lako Puang Allataala, na Puang Allataala Ia la mpabalahhi joo panggaukanta'.