Matius 10:19 - Alkitab Duri

¹⁹ Apa ia ammidipangngolo, danggi' miselang kumua apara la mipau, ba'tu umbo la mikua mebali. Nasaba' la dipauan kamu' apa to la mipau joo wattu.

Matius 10:19 Referans Kwoze

2 Timotius 4:17

Apa naampaimo' Puang, naben toomo' kapakullean, angkuwa'ding mmangkai jamanku' mpangpeissenan Kareba Kasalamatan lako sininna bangsa tangngia to-Yahudi inde', napasalama'na' Puang jio mai kamatean.

Lukas 12:11

Ia ammidikara-kara lan bola passambajangan iarika jio olona tomangparenta ba'tu tomangra'tah kara-kara, danggi' miselang kumua apara la mipau, ba'tu umbo la mikua mpangngewai kalemi.

Yakub 1:5

Ia ke den kamu' tangpadete' tangngahmi, la meta'da kamu' lako Puang Allataala nabenni kamu', sanga malaboh na masannang penawan-Na mangpabengan lako sininna tau.

Matius 6:31

Iamo joo, danggi' mipuselangngi to kumua, apara to la mikande, ba'tu apara to la miiso', ba'tu apara to la miputamangkale.

Matius 6:25

Iamo joo, la miingaran! ‘Danggi' mipuselangngi to katuoanmi, to kumua apara la mikande, ba'tu la miiso', ba'tu apara to la miputamangkale. Nasaba' la'bih parallu ia to katuoan na ia to kande, na ia to batang kale la'bih parallu na ia to pakean!

Filipi 4:6

Danggi' naden apa mipuselang, apa paui to miparalluinna lako Puang Allataala lan passambajangmi, mimangkurru sumanga' too,

Jamanna Rasulu' 6:10

apa te'da nakullei ncau' kadai, sanga Roh Allataala mbenni kamaccan mangkada.

Matius 6:34

Iamo joo danggi' mipuselangngi to la miputuona masawa. Ganna'mo ke mipikkiri'i to la miputuona tee allo, nasaba' masawanna, laen o ia to napuselangna.”

Matius 10:18

La dipangngolo kamu' lako tomangparenta sola raja, nasaba' mituru'na'. Iamo joo wattu la minii mpangpeissenanni to Kareba Kasalamatan lako tuu lako tau, sola totangnnissenpa Puang Allataala.

Lukas 12:12

Nasaba' apa to mipebalian la napatuju kamu' Roh Allataala ke wattunnamo kamu' la mebali.”