Lukas 9:32 - Alkitab Duri

³² Mamma'i Petrus, Yahya na Yakub, apa ia joo wattu ta'pa mi'cikmi nakitai to kamala'biran-Na Puang Isa na ia joo tau dua nasolan ke'deh.

Lukas 9:32 Referans Kwoze

Yahya 1:14

Ia joo Kada mentolinomi namari'pihmi lan tangnga-tangngata'. Takitamo to kamala'biran-Na, to natarima jio mai Ambe' sanga Ia Anak tungga'-Na. Iamo joo Anak mpamanassa tonganni to Puang Allataala sola pangpakamoja'-Na.

Daniel 8:18

Mukkun unapi malaeka' Jibrail mangkada, kulimpu. Apa natoena', napake'deh pole'na'.

Daniel 10:9

Ia tongkusa'dingmi gamaranna ta'pa limpuna' kusongka tipalumbang do' litak.

2 Petrus 1:16

Ia tongkipangpeissenanni lako kamu' kumua la napangpekitan Puangta' Puang Isa Almaseh to kuasan-Na ke ratu pole'i, ia joo kipau tangngia curita nagaraga bangra tolino susi curita tangkebattuan. Kiissen joo, sanga ia to kamala'biran-Na mangkamo kami' kikita.

Yahya 17:24

Oo Ambe', meta'dana' na ia tuu lako taun-Ta' to tabenna' la torro jio to kunii, anna kitai to kamala'biran-Ku'. Tabenmo' joo kamala'biran tonna te'dapa nadipaden tee lino, nasaba' tapakamoja'na'.

1 Yahya 3:2

Ee, tomala'bihku' to kupakamoja'! Ia tee too napuanakmiki' Puang Allataala. Ia ke ratu pole'mi Puang Isa tangnadete'pa tangngahta' kumua la matumbariki', apa moi nasusi joo taissen kumua ia joo wattu, la susimiki', nasaba' la takitai kumua matumba sitonganna to Puang Isa.

Markus 14:40

Mangkai joo too, polemi lako to nanii tallu anak gurun-Na, natimba'i omi simammasan, sanga gaja rojai. Te'da naissen to apa la napau lako Puang Isa.