Kolose 1:27 - Alkitab Duri

²⁷ Madoangngi Puang Allataala mpangpekitanni lako sininna umma'-Na to melona sola mala'bihna joo akkatta-Na lako kamu' bangsa tangngia to-Yahudi kumua, natorro too Almaseh lan kalemi, na iamo buttinna kumua la turu' toda kamu' mperasai kamala'biran-Na Puang Allataala jao suruga.

Kolose 1:27 Referans Kwoze

Yahya 14:20

Ia ke nadete'mi wattunna, la miissen kumua memmesa'na' sola Ambe'-Ku', na kamu' memmesa' sola Aku', na Aku' memmesa' sola kamu'.

Roma 8:10

Apa ianna den Almaseh lan kalemi, la naben kamu' katuoan Roh Allataala, nasaba' napupenjaji tomelomo kamu' Puang Allataala, moi nalamate to batang kalemi nasaba' dosa.

1 Yahya 4:4

Ee, tokupuanak! Ia to kamu', napuanakmo kamu' Puang Allataala. Mangkamo kamu' ntaloi joo nabi tangtongan, nasaba' la'bih makuasa to Roh Allataala miampui na ia to roh naampui to tonnewa Puang Allataala.

Galatia 2:20

Ia tee too moi angkutuo, tangngiamo aku' mputuoi, apa Almasehmo tuo lan kaleku'. Ia tee katuoanku' tee too, matappa'na' lako Anak Allataala to mangka mpakamoja'na', na mangka mpangkarobananna' kalena, sanga dosaku'.

1 Korintus 3:16

Ee, tomala'bihku' sola ngasan! Manassa miissen kumua kamu'mo bola-Na Puang Allataala, sanga torromi to Roh Allataala lan kalemi.

Pengkitanna Yahya 3:20

Pesa'dingngii tee! Ke'dehna' jio pelalan messa'da. Ianna den tau ssa'dingngi to gamarang-Ku' natimbakanni, mentamana' ssitammuanni angkikumande sola.

Galatia 4:19

Ee, anakku'! Mapa'dikna', nasaba' kamu'. Susina' tomangnguriwa' sanggenna pajan to Almaseh lan katuoanmi.

2 Korintus 4:6

Ia tonna padenni Puang Allataala tee lino mangkadai nakua, “La ollong to arrang lan kamalillinan.” Ia toomo nnarrangngii to penawanta', antakullei nnissenni to kamala'biran-Na Puang Allataala to mangngarrang jio lindo-Na Almaseh.

1 Timotius 1:1

Ee, Timotius, to kupuanak, sanga matappa'moko lako Puang Isa nasaba' pangngajahku'! Aku' Paulus ngkiringanko tee sura'. Pakkaeloran-Na Puang Allataala, Tomangpasalama'ta' kumenjaji rasulu'-Na Puang Isa Almaseh to tarannuan. Dennaa upa' nabarakka'iko nakamasei tooko Ambe' Puang Allataala sola Puangta' Puang Isa Almaseh nabenko kamasannangan.

Kolose 2:3

Nasaba' Almasehra mpamanassai to sininna kapaissenan-Na sola kamaccan-Na Puang Allataala.

Yahya 14:23

Mebalii Puang Isa nakua, “Ia to tompakamoja'na', la naturu' to pangngajah-Ku'. La napakamoja' Ambe'-Ku' joo tau. La ratuna' sola Ambe'-Ku' lako to tonturu' pangngajaran-Ku', angkitorro mari'pih sola.

2 Korintus 6:16

Te'da kasiumputanna Bola Puang Allataala na bolana dewata! Na kita'mo Bola Puang Allataala to tuo, susi to napau Puang Allataala kumua, “La mari'pihna' sola tuu lako tau, na la torrona' lan tangnga-tangngana. La menjajina' Puang Allataala to nasompa, na ia tuu lako tau la menjaji umma'-Ku'.

Kolose 3:11

Iamo joo te'damo nadipasilaenan to umma'-Na Almaseh. Te'damo nadipasilaenan to-Yunani na to-Yahudi, todisunna' na totangdisunna', bangsa laen na bangsa to tangmessipa', kaunan na tangkaunan, nasaba' pada bang unaki' dipupenjaji tau baru. Almasehra to kaminang parallu na Iamo torro lan kita' sola ngasan.

Yahya 17:26

Kupangpeissenanmiki' lako tuu lako taun-Ta', na la kupugauk tarruh susi joo, dikua naperasai to pangpakamoja'-Ta' lako Aku', susi Aku' mperasaii, angkumemmesa' sola tuu lako taun-Ta'.”

Efesus 2:22

Napake too kamu' Almaseh mpajenjenni joo bola sola tomatappa' laen, nasaba' memmesa'mo kamu' sola Ia, anna menjaji ngenan nanii torro Roh Allataala.

Yahya 6:56

Na ia to tongkande batang kale-Ku' na nniso' rara-Ku', da'tanni memmesa' sola Aku' na Aku' toda memmesa' sola ia.

Efesus 1:7

Mangkamiki' nala'bak Puang Allataala jio mai kuasa dosa, battuananna didampanganmiki', nasaba' kita'ra namate to Almaseh.

Filipi 4:19

Dennaa upa' na Puangku' Puang Allataala, to tangdikulle mbilangngi to kasugiran-Na, mben kamu' to apa miparallui, nasaba' Puang Isa Almaseh.

Roma 9:23

dikua anna mpangpepajanan kamala'biran-Na to napatuju lako kita' tonakamasei. Na mangkamiki' napasadia la ntarimai joo kamala'biran.

Roma 5:2

Iamo nneloranki' mperasai kameloan penawan-Na Puang Allataala to taperasai tee too, nasaba' kamatapparanta'. Jaji la marioki' sanga den kaparannuanta' mputawa kamala'biran-Na Puang Allataala jao suruga.

Kolose 1:5

Matappa' kamu' misipakamoja', nasaba' mirannuan to Puang Allataala kumua la naben kamu' to apa napasadianmo kamu' jao suruga, situru' Kareba Kasalamatan to mangka misa'ding jolona. Tongan joo Kareba Kasalamatan,

2 Korintus 4:17

Ia tee kamaparrisan kiperasai cingga'tu'ra namaringngan too, nalampadenankan kamasannangan te'da susinna na te'da cappa'na.

Lukas 17:21

Na te'da too tau kumua, ‘Kitari inde'i’, ba'tu ‘Iti'i joo’, nasaba' lanri penawanta' mangparenta to Puang Allataala.”

Matius 13:11

Nakuamo Puang Isa mebali, “Dibenmo kamu' barakka' la nnissenni to apa tangnaissen tau kumua la ratui Puang Allataala mangparenta susi Raja, apa ia to tau laen te'da nadipaissenni.

2 Korintus 2:14

Apa kurru sumanga' lako Puang Allataala to tuli ssolankan nabenkan kapataloan, nasaba' memmesa' penawakan sola Almaseh! Napakekan Puang Allataala mpangpeissenanni to karebanna Almaseh, anna kaissenan susi bau bunangngu' silele to padang la umbo-umbo kinii.

Roma 11:33

Tangnadete' akkalanna tolino to kamala'biran-Na, kamaccan-Na sola kapaissenan-Na Puang Allataala! Te'da ia tau wa'ding nnissenni to pura napattantu. Te'da too ia tau wa'ding mpahangngi to napugaukkuna.

Roma 2:4

Ba'tu te'daraka miangga'i to kamamasean-Na Puang Allataala, kameloan penawan-Na na kasabbarasan-Na to napakitan kamu'? Miissen kumua madoangri Puang Allataala ke mengkatoba' kamu', iamo joo napemeloan kamu' penawa.

Ibrani 6:19

Ia joo rannunta' susi jangkar titanan mandalan antasamatappa'-tappa'na. Ia joo rannunta' ntarruh kaen pesapa' Ngenan Kaminang Macero jio Bola Puang Allataala jao suruga antamangngolo lako Puang Allataala.