Ibrani 3:14 - Alkitab Duri

¹⁴ Sanga kita' ngasanmo nnampa' barakka' jio mai Almaseh, ke matappa' tarruhki' susi tontamane' matappa' ratu lako ssalainta' lino.

Ibrani 3:14 Referans Kwoze

Ibrani 3:6

Apa Anak to Almaseh to dipabarakkanni jaman ntulung sininna taun-Na Puang Allataala. Na kita'mo tee to taun-Na, ke da'tanki' matappa' sola da'tanki' mangrannuan lako manda Puang Isa.

Ibrani 6:11

Gaja kirannuan kumua kemmipada masumanga' tarruh ratu lako cappa'na ammitarimai to apa mirannuan.

1 Petrus 4:13

Apa sibalikanna la mipumasannangri nasaba' turu' toomo kamu' mapa'dik sola Almaseh. Ia ke susii joo la mario tonganmo kamu' ke dipakitanmi tolino to kamala'biran-Na Almaseh.

Ibrani 12:10

Ia to ambe'ta' lan lino cingga'tu'ra nanii mpabalahhiki', situru' to apa nasanga melo. Apa la tapumelona kita' to pangpabalah-Na Puang Allataala, dikua antawa'ding messipa' melo takaba'ci too kagajatan susi to nakaba'ci Puang Allataala.

Ibrani 6:4

Ia ke denni tomatappa'mo lako Puang Isa anna cia' pole' omo matappa', te'damo nadikulle mpupengkatoba' pole'i. Naperasaimo to barakka'-Na Puang Allataala, naperasai toomo to kuasan-Na Roh Allataala, naissenmo to kumua melo to kadan-Na Puang Allataala, naperasai toomo to kuasan-Na to la napake jio ahera'. Apa ia ke susii joo, nacia'mo ia matappa' lako Puang Isa, te'damo nadikulle mpupengkatoba' pole'i, sanga padami to mpampang pole' Anak Allataala jao kaju sitamben. Iamo joo napusaba' nate'damo nakasiri'i tobuda to Puang Isa.

Efesus 3:6

Na ia joo akkatta-Na kumua ia to bangsa tangngia to-Yahudi la ntarima toda barakka'-Na Puang Allataala sola to-Yahudi, na la menjaji susi mesa' kale sola to-Yahudi, anna wa'ding toda la ntarimai to apa nabasse Puang Allataala lako to-Yahudi. Ia tee jaji, nasaba' kamatapparanna bangsa tangngia to-Yahudi lako Puang Isa Almaseh tonna sa'dingmo Kareba Kasalamatan.

Ibrani 3:1

Ee, todipusile'to padangku' tomatappa' to mangkamo napilei Puang Allataala la mentama suruga! Ingaran meloi to sipa'-Na Puang Isa to takatappa'i, to napattantu Puang Allataala menjaji Rasulu' na Imang Lompo lan agamanta'.

Roma 11:17

Ia to to-Yahudi dipasusi kaju zaitun dipiara. Na ia to bangsa tangngia to-Yahudi dipasusi kaju zaitun lampung. Den tangke kaju zaitun pira' dipiara na disembangngi dinii mpencangkoran tangke kaju zaitun lampung, iamo to kamu' to bangsa tangngia to-Yahudi. Ia tee jaji, dikua ammiperasai toda barakka' jio mai Puang Allataala to dipatuju lako to-Yahudi.

1 Korintus 10:17

Jaji, moi budaki', susimiriki' to mesa' batang kale, nasaba' mesa'ra joo roti to takande.

1 Yahya 1:3

Ia to apa mangkamo kikita sola kisa'ding, ia toomo kipangpeissenan lako kamu', dikua antamesa' penawa. Na te'da na ia manda joo, apa mesa' penawaki' sola Ambe', Puang Allataala, na Anak, Puang Isa Almaseh.

1 Korintus 1:30

Menjajimo kamu' umma'-Na Puang Isa Almaseh, nasaba' Puang Allataalara. Iamo ssua Puang Isa la mpasalama' kamu', napupenjaji kamu' tomacca, tomelo, napatorro leko' kamu' jio mai to totangnturu' Puang, nala'bak kamu' jio mai kuasa dosa.

1 Petrus 5:1

Kupakainga'i to pekaamberan jamaa lan tangnga-tangngami. Kupauan kamu' tee sanga mesa' todana' pekaamberan jamaa susi kamu', na mangkamo kukita to kamaparrisan-Na Almaseh, na la kuperasai too to kamala'biran-Na Almaseh to la napangpekitan Puang Allataala lako sininna tau keanu'. Kupakainga' tongan kamu',

1 Timotius 6:2

Ia to kaunan matappa' na tomatappa' toda to puangna, danggi' nasangai kumua ia to puangna te'da naparallu nakasiri' nasaba' pada tomatappa'i. Sibalikanna la la'bih napemeloiri to pangjamanna lako, nasaba' ia joo puangna napangjaman pada tomatappa'i na pada dipakamoja' tooi. La mupangpangngajaran ngasan tee, mupake tooi mpangngingaran tau.

1 Korintus 9:23

Iamo kupugaukki susi joo, anna sabuda-budanna tau ngkatappa'i to Kareba Kasalamatan, angkuturu' toda dibarakka'i.

Roma 11:22

Iamo joo nanii butti kumua liwa' buda kameloan penawan-Na Puang Allataala, apa liwa' buda too makarrahna. Makarrah lako to nasembangngi, totangmatappa', apa melo penawan-Na lako kamu', assalan da'tan bang kamu' matappa' lako Puang Allataala. Ia ke te'da mituru' pakkaeloran-Na Puang Allataala, la nasembangngi toda kamu'.

Ibrani 11:1

Ia to tau matappa' lako Puang Allataala, naissen tongan kumua la naben Puang Allataala to apa narannuan. Moi te'dapa nakitai matanna, nakanassai kumua la jajii.