Ibrani 12:15 - Alkitab Duri

¹⁵ Ingaranni danggi' naden moi mesa' tau cia'mo ntarimai to barakka'-Na Puang Allataala. Ingaranni danggi' naden tau susi to waka' mapai' mpaden kamaba'cian lako padanna rupa tau anna situmang-tumang.

Ibrani 12:15 Referans Kwoze

Ibrani 3:12

Ee, tomala'bihku'! Ingaran meloi, danggi' naden to mangpenawa gaja' susi joo, ammicia' matappa' lako Puang Allataala to tuo.

Galatia 5:4

Ia ke la mipengkulle-kullei nturu' atoran agama dikua napupenjaji tomelo kamu' Puang Allataala, te'damo milasipusola Almaseh, na te'da toomo milamperasai kameloan-Na Puang Allataala.

2 Korintus 6:1

Ia tee kami', mpangjamankan Puang Allataala. Iamo joo kimeta'da tongan-tongan lako kalemi, nadanggi' mitangmpuinawai to barakka' kasalamatan mangka mitarima anna membua melo.

2 Yahya 1:8

Iamo joo mijagai meloi to apa kipengkulleimo mpugaukki ammida'tan matappa' lako Puang Isa. Ia ke te'damo mimatappa', te'da milannampa' katuoan melo te'da cappa'na jio mai Puang Allataala.

1 Korintus 15:33

Danggi' mieloran kalemi napalao sala tau! Ia ke sibawaki' togaja', la mentogaja' todaki'.

2 Petrus 3:14

Ee, tomala'bihku' to kupakamoja'! Da'tan una kamu' ntajanni joo wattu, la mipengkulle-kullei sikalino padammi rupa tau anna te'da caccami ba'tu kakuranganmi ke mangngolomo kamu' lako Puang Allataala.

Ibrani 4:1

Tatta' bang unapa to basse-Na Puang Allataala kumua wa'dingki' mentama tondok to tanii kenden tarruhmo mangjama sola Ia. Iamo joo taingaran meloi danggi' naden tau tanglamentama ntuu joo tondok kakendenan to dibasseanki'.

1 Korintus 5:6

Te'da lalo misipato' matampo. Tantu miissen battuananna tee pangpasusian kumua, “Ia to ragi ci'di' mpaloboh ta'pung ke mangkami dilama.”

Kada Bulawan 4:23

Jagai meloi to penawammu, nasaba' pole llan mai penawammu to mpattantu katuoanmu.

Ibrani 4:11

Iamo joo melo ke tapengkulle-kullei mentama ntuu joo tondok kakendenan to nabasse Puang Allataala, dikua danggi' naden tau tangmentama, susi to-Yahudi tonna anu', sanga cia'i matappa' lako Puang Allataala.

2 Korintus 13:5

La mparessa kamu' kalemi kumua mipahang tonganraka apara battuananna matappa' lako Almaseh! Miissen kumua torromo Puang Isa Almaseh lan kalemi. Ia ke te'dai natorro Almaseh lan kalemi, te'da naakui kamu' Puang Allataala.

1 Korintus 10:12

Jaji, ia to tossanga kalena matappa' tongan, la majagai nadanggi' namenjaji tomadosa susi tuu lako tau tonna anu'.

Ibrani 6:11

Gaja kirannuan kumua kemmipada masumanga' tarruh ratu lako cappa'na ammitarimai to apa mirannuan.

2 Petrus 2:18

Mangkada matampo joo guru tangtongan, apa tangkebattuan to kadanna. Ia to pangngajaranna nneloran bang tau manggauk sala. Na iamo napake ssedei to tomane' messarak jio mai solana to gaja'pa sipa'na namale pole' manggauk sala.

Kolose 3:5

Iamo joo ca'beanni to sininna kamadoangan gaja'mi, susinna manggauk sala, panggaukan laen to tangsipato', nturu' bang pakkaeloran penawa, mangpanggaukan tangmelo na madoang nnassang sininna apa, nasaba' ia to tomangngassang dipapadai tossompa dewata.

Efesus 5:3

Jagai sangammi, danggi' naden tau mpaui kumua manggauk sala kamu', madoang kamu' nnassang sininna apa iarika mpugauk kamu' panggaukan tangsipato' laenna. Te'da nasipato' joo, nasaba' umma'-Na kamu' Puang Allataala.

Galatia 2:13

Ia tee mai to-Yahudi pira' to saranimo, turu' todami majekkong susi to napugauk Petrus, naarannai to Barnabas turu' todami mpugaukki susi joo.

1 Korintus 13:8

Te'da cappa'na joo pangpakamoja'. Apa la den wattunna nate'damo tau nnampui barakka' mpangpeissenan pepasan-Na Puang Allataala, barakka' mangkada mpake basa mejangngaran ba'tu barakka' mpahangngi to apa masussa dipahang.

2 Petrus 3:11

Susimi joo la disabu'i to lino. Iamo joo la messipa' melo kamu' susi to sipato'na, mida'tan mpugaukki to pakkaeloran-Na Puang Allataala,

2 Petrus 1:10

Ee, tomala'bihku' sola ngasan! Napileimo kamu' Puang Allataala menjaji umma'-Na anna tambai kamu' nturu'i. Iamo joo la mipengkulle-kullei nturu' pakkaeloran-Na, anna manassa lako kalemi sola tolaen kumua tongannamo kamu' napilei Puang Allataala. Na ia ke mipugaukki susi joo, te'damo milampugauk pole'i to sipa' jolomi.

Yosua 6:18

Apa ingaran meloi, danggi' lalo naden apa miala, la dilanynya'i ngasan, nasaba' ia ke denni miala, la macilaka ngasanki' nakanna abala'.

Lukas 22:32

Apa mangkamo' mpassambajanganko ammuda'tan matappa'. Na ia mumengkatoba'mo, la mupamawatang kamatapparanna to padammu tomatappa'.”

Titus 1:15

Ia to tomangpenawa melo, melo too ia panggaukanna. Apa ia to tomangpenawa gaja' na tangmatappa', te'da namelo panggaukanna. Gaja' pangtangngaranna na te'da naissenni umbonna to melo ba'tu gaja'.