Filipi 2:17 - Alkitab Duri

¹⁷ Ia tee aku' mangkana' mpaissenni kamu' to Kareba Kasalamatan ammimemmatappa'. Na moi nadipato'do to raraku', nabutung dipatibolloh susi karoba lako Puang Allataala nasaba' ia to mangka kupugauk lako kalemi, la masannangna' antamasannang sola.

Filipi 2:17 Referans Kwoze

2 Timotius 4:6

Na ia tee aku', nadete'mi wattunna, la matena' butung karoba lako Puang Allataala. Te'damo namasai kusalaiko.

Roma 15:16

Napupenjajimo' kaunan-Na Puang Isa Almaseh to disua male lako bangsa tangngia to-Yahudi. Na menjajimo' susi imang to mpangpeissenan Kareba Kasalamatan jio mai Puang Allataala. Dennaa upa' na Roh Allataala mpupenjajii to bangsa tangngia to-Yahudi susi karoba to napumasannang penawan-Na Puang Allataala.

2 Korintus 12:15

Iamo joo namacanning atingku' mpangbenni to sininna apa kuampui, moi batang kaleku' kupangben too nasaba' kamu'. Na ia ke susimo' joo mpakamoja' kamu', te'da nasipato' ke te'damo mipakamoja'na'!

Kolose 1:24

Ia to tomatappa' lako Almaseh wa'ding dipasangrapang batang kale-Na. Jaji, maparri' to batang kaleku' tee too susi Almaseh maparri' tonna anu', nasaba' jamanku' mbalii to tomatappa'. Iamo joo kumasannang, ke maparri'na' sanga kubalii kamu'. Na ia tee kamaparrisanku' la ngganna'i sininna kamaparrisan to la naperasai tomatappa' lako Almaseh.

Filipi 1:20

Ia to kukadoangngi sola kurannuan, iamo to kumua te'da lalo kuladipakasiri', apa la barani tonganna' mpebalian Kareba Kasalamatan tee too, susi biasanna. Na ia ke susii joo, la dipakala'bih to Almaseh, nasaba' pebalingku', la tuoku', la mateku'.

2 Korintus 7:4

Liwa'na' ngkatappa'i kamu', mipamariona'. Moi kipembuda mperasai kamasussan, liwa'na' matana nasaba' kamu', na mario tonganna'.

1 Yahya 3:16

Mpangbenmo sunga'-Na Almaseh ssulle sunga'ta'. Iamo joo taissenni kumua, la matumba todai carata' la mpakamoja' tolaen. Jaji la mpangben todaki' sunga'ta' ssulle sunga'na padanta' tomatappa'.

Roma 12:1

Ee, todipusile'to! Gaja napakamoja'ki' Puang Allataala, susi to kupaissenanmo kamu'. Iamo joo kupakainga' kamu' kumua la mipangben tongan to katuoanmi lako Puang Allataala susi karoba tuo to sipato' dipangben lako Puang. La susiri joo to passompami to nakabudai Puang Allataala.

1 Petrus 2:5

ammimenjaji toda susi batu to napake Roh Allataala mpake'deh Bola Puang Allataala. Menjaji toomo kamu' susi imang to mpangjaman mandamo Puang Allataala. Na susi imang mangkaroba, la susi toda kamu' la mpangkaroban kalemi lako Puang Allataala susi to napatujuan kamu' Roh Allataala. Na ia joo karoba napumasannang Puang Allataala nasaba' Puang Isa Almaseh.

1 Tesalonika 2:8

Tangngia to kumua sadia mandakan mpangpeissenanni to Kareba Kasalamatan jio mai Puang Allataala, apa moi sunga'ki' sadia tookan mpangbenni, nasaba' liwa'kan mpakamoja' kamu'.

Filipi 4:18

Kutarima ngasanmo, na la'bih budamo na ia to kuparalluinna. Kala'bianmo', tongkutarimami jio mai Epafroditus to apa mipangben. Ia to pangpabenganmi susi karoba bunangngu', to napumasannang Puang Allataala.

Filipi 2:30

nasaba' garapai mate tonna mpangjaman Almaseh, iamo to mpugaukki to apa la mitulunganna', na te'damo nacirinnai sunga'na.

Jamanna Rasulu' 21:13

Apa nakua mpebalii, “Oo, danggi'mo dikka' mikillakkina', nasaba' samasse-massena penawangku'. Sitonganna macanning sininna bulu-bulungku', tangngia la dipumpung manda jio, apa dibuno toona', nasaba' Puang Isa.”

Jamanna Rasulu' 20:24

Apa moi nasusi joo, te'da kucirinnai penawangku', podo wa'dingna' mpatarruhhi to jaman nasuanna' Puang Isa la llundukkii samateku' mpangpeissenanni to Kareba Kasalamatan kumua nakamaseiki' Puang Allataala.

2 Korintus 6:10

Tuli mariokan, moi kiperasai kamasussan. Mpasugihmokan barakka' kasalamatan lako tobuda, moi susikan tokaasi-asi dikita. Sitonganna kiampui ngasan to sininna apa, moi susikan tote'da lalo apa kiampui.

Filipi 2:18

Na susi too kamu' la masannang, antapada-pada masannang.

2 Korintus 4:12

Jaji, ia to kami' tuli naancangkan kamatean, dikua ammiampa' katuoan melo te'da cappa'na.