Efesus 2:2 - Alkitab Duri

² Ia joo wattu ia to panggaukanmi susi bang to panggaukanna tolino to tangnturu' Puang, ammituru' Ballisi' jao langi' to mparenta sininna setang. Iamo tatta' ngkuasaii to totangmatappa' lako Puang Allataala.

Efesus 2:2 Referans Kwoze

Efesus 6:12

Nasaba' tangngia padanta' rupa tau to taewa, apa nnewaki' sininna tomakuasa ba'tu to mparentai tee lino gaja', sola sininna setang to mangparenta jao langi' tee wattu.

1 Yahya 5:19

Taissen kumua napuanakmiki' Puang Allataala, moi nakuasaii Ballisi' to tolino tangnturu' Puang Allataala.

Efesus 2:3

Ia joo wattu susimiki' tuu lako tau sola ngasan. Nturu' bangki' kamadoangan penawanta', antapugauk bangngi to gaja'na la mpesannangngi penawanta'. Iamo joo sipato' kumua nakagalliki' Puang Allataala anna la mpabalahhiki' susi tolaen.

Yahya 12:31

Nadete'mi wattunna la dira'tah kara-karana tolino. Ia tee too la dica'beanmo lako salean to Ballisi' to ngkuasaii tee lino.

Efesus 5:6

Danggi' mieloranni to tau susi joo mpalao sala kamu' mpake kada-kada mala'bih apa sitonganna te'da natongan. Nasaba' mabirih Puang Allataala lako to tocia' nturu' parenta-Na.

Yahya 8:44

Ballisi' kamu' to ambe'mi. Iamo mimadoang bang mpugaukki to pangkabudaianna Ballisi'. Mammula jiona mai topabuno ia. Te'da lalo ia nampau katonganan, sanga te'da katonganan naampui. Ia ke mangnguragai, sipato'namo, sanga iamo garonto'na sininna pangnguraga.

Efesus 4:22

Midiajahhi kumua la mipatorro to sipa' jolomi. Danggi' mituru' omo kamadoangan gaja'mi to mpalao sala kamu' ammimasolang.

1 Korintus 6:11

Ba'tu pira-pira tau lan tangnga-tangngami massipa' susi joo tonna jolona. Apa ia tee too, ia to Puang Isa Almaseh sola Roh Allataala to pole jio mai Puangta' Puang Allataala mangka lla'paran kamu' jio mai kuasa dosa, na mpupenjaji tau mesan-Na kamu' Puang Allataala, sola napupenjaji tomelo kamu'.

2 Korintus 4:4

Ia to Ballisi', to ngkuasaii tee lino, iamo ssamboii tangngahna tuu lako tote'da namatappa', anna te'da nakitai to arrangna Kareba Kasalamatan to napupangngarrang kamala'biran-Na Almaseh to sangrupa bang una Puang Allataala.

1 Yahya 5:4

sanga ia to tonapuanakmo Puang Allataala mangkamo ntaloi kuasanna tolino to tangnturu' Puang Allataala. Ia to tapake ntaloii, iamo to kamatapparanta'.

1 Yahya 3:10

Inda-inda to te'da nampugauk pakkaeloran-Na Puang Allataala ba'tu te'da nampakamoja' padanna tomatappa', te'da napuanakki Puang Allataala. Iamo joo mpamanassai indara to napuanak Puang Allataala na inda to napuanak Ballisi'.

1 Petrus 1:14

Napuanakmo kamu' Puang Allataala. Iamo joo la da'tan kamu' mengkaturu' lako kale-Na, nadanggi'mo mituru' pole' oi to kamadoangan gaja'mi to ngkuasai kamu' tonna te'dapa miissenni to Puang Allataala.

Pengkitanna Yahya 20:2

Najokkoi joo naga, iamo to ulah tua disanga Ballisi' ba'tu puanggawana setang napumpungngi sangsa'bu taunna.

1 Yahya 4:4

Ee, tokupuanak! Ia to kamu', napuanakmo kamu' Puang Allataala. Mangkamo kamu' ntaloi joo nabi tangtongan, nasaba' la'bih makuasa to Roh Allataala miampui na ia to roh naampui to tonnewa Puang Allataala.

1 Petrus 4:3

Gaja sainmo kamu' mpugaukki to panggaukanna totangnturu' Puang. Susinna manggauk sala, nturu' kamadoangan gaja', pangmalangoan, kumande-mande, mangngiso'-iso', na passompan mesirisan lako dewata.

Kolose 1:21

Susi toda kamu' tee too dipasikalinomo Puang Allataala. Jolona tangngia kamu' umma'-Na Puang Allataala na miewali tooi, sanga gaja' to penawammi sola panggaukanmi. Napasikalinomo kamu' Puang, nasaba' kamatean-Na Anak, ammidipatorro leko' jio mai totangnturu' Puang, anna te'da caccami ba'tu kakuranganmi ke dipangngolomo kamu' lako Puang Allataala.

Galatia 1:4

Ia to Puang Isa mangka mpangben kalena dibuno situru' pakkaeloran-Na Ambe'ta' Puang Allataala, dikua anna dampanganki' to tomadosa, danggi'mo tatuo susi togaja' lan lino.

Roma 12:2

Danggi' mikaturu'-turu' bang lako tote'da naissen Puang Allataala. Ake'mo ia na Puang pemeloii to penawammi, ammiwa'ding nnissenni to pakkaeloran-Na, apa to melo na sukku', na apa to nakabudai Puang Allataala.

Yakub 4:4

Ee, kamu' totangnningaranmo pale' Puang! Miissen kumua ia ke mipangbuda-budaii susi to totangnturu' Puang Allataala menjaji kamu' ewalin-Na Puang Allataala. Jaji ia to tolampangbuda-budaii susi joo, iamo mpangpeewalian kalena lako Puang Allataala.

1 Korintus 5:10

Ia to kusanga tangngia to sininna tomanggauk sala lan tee lino, ba'tu tongkake'lai ewanan, tokalasi ba'tu tossompa dewata. Te'da na ia tuu lako tosusi joo to kusanga, nasaba' ia ke tosusi joo, la messunmora kamu' lan mai tee lino.

Jamanna Rasulu' 5:3

Nakuanni Petrus, “Ee, Ananias, ammueloran bang ora kalemu nakuasai Ballisi', ammuuragara Roh Allataala, ssarakan buni kalemu sesena alli padangmu?

Yahya 15:19

Ia ke la taunna kamu' totangmatappa', tantu nakabudai kamu'. Apa tangngiamo kamu' taunna, sanga mangkamo kamu' kupilei lan mai tangnga-tangngana totangmatappa', iamo nakaba'ci kamu'.

Yahya 14:30

Te'damo nabuda bang la kupauan kamu', nasaba' wattunnami la ratu to Ballisi', to ngkuasai tee lino. Apa te'da nakuasaina'.

2 Petrus 2:14

Te'da nacau' mpugauk dosa. Mpenunu bang baine bandarang, nasaba' pangkabudaianna manggauk sala. Nasede tooi to tote'dapa namasaranian anna manggauk sala toda. Napubiasan bangmo to sipa' gaja'na ngkadoangngi apanna tau. Apa ia tuu lako tau, natampakki ropu Puang Allataala.

Yahya 16:11

La napamanassa too kumua la nasessami Puang Allataala to tolino, sanga disessami to Ballisi', to ngkuasai tee lino.

Yahya 13:27

Ia tonna mangka Yudas nnalai joo roti, natamaimi Ballisi'. Nakuamo Puang Isa ngkuanni, “Apa mukadoangngi mupugauk, pugaukmi madoi'!”

Yahya 13:2

Ia tonna bongi nakumande Puang Isa sola anak gurun-Na, na ia to Ballisi' mangkai ssede Yudas anakkana Simon Iskariot anna la mpangpejokkoan Puang Isa.

Yahya 8:23

Nakua omo Puang Isa, “Topole jiong kamu' mai, na topole jaona' mai. Tojio kamu' mai lino, na Aku' te'da kutopole jio mai lino.

Yahya 7:7

Te'da apa napusaba' tee tolino la ngkaba'ci kamu'. Apa ia ke Aku' nakaba'cimo', nasaba' tuli kukuanni kumua gaja' panggaukanna.

Matius 13:38

Ia to uma dipangpasusii lino. Banne melo dipangpasusii tomenjajimo umma'-Na Puang Allataala. Na ia to pare-pare dipangpasusii tonturu' Ballisi'.

Pengkitanna Yahya 13:8

La nasompa sininna to totuo lan lino, saliwanna to tomangkamo diuki' sanganna lan Sura' Katuoan tonna te'dapa nadipaden tee lino. Ia to Sura' Katuoan, sura'-Na Anak Bembala' to mangkamo digere'.

1 Yahya 3:8

Ia to tompugauk tarruh dosa, napuanak Ballisi', nasaba' ia to Ballisi' iamo garonto'na dosa mammula jiona mai. Iami joo naratumo to Anak Allataala la ssabu'ii to jamanna joo Ballisi'.

Yakub 1:7

Tositawa penawanna to tau susi joo, na te'da namanassa ke denni apa napugauk. Iamo joo danggi' omo natajannii kumua la naben assele' Puang.

2 Timotius 4:10

Nasalaimo' Demas, nasaba' la'bih nakabudaimo ia tee lino, na male lako kota Tesalonika. Male toomi Kreskes lako tana Galatia na Titus lako tana Dalmatia.

Jamanna Rasulu' 19:35

Katampakanna juru tulisi' kotamora mpakamma'i to tau. Nakuanni, “Ee, kamu' to-Efesus! Sininna tau lan lino nnissenni kumua ia tee kota Efesus nnampui bola dewata Baine Artemis to kaminang matonggo, susi toomi to tau-tau batunna polloh jao mai langi'.

Lukas 22:31

Nakuamo Puang Isa, “Ee Simon, ee Simon pesa'dingngii! Dieloranmo to Ballisi' ssedeko, susi gose' dirido nadita'pii, anna sisarak issinna na sowokkona.

Lukas 16:8

Ia tonna sa'dingmi tosugih to apa napugauk joo pangjama tangmaruruh, napujii nasaba' maccai mangngakkalan. Nasaba' ia to tolino tangnturu' Puang Allataala, la'bih macca ia lako padanna rupa tau, na ia to tonturu'mo Puang Allataala.”

Matius 11:19

Na ratu omo' Aku', Anak Mentolino, kukumande sola mangngiso', nakua omo tau kumua, ‘Kitai joo tomaullak, pangngiso', soba'na passassung sola togaja' sipa'na.’ Apa moi na susi joo, mandalan tangngah to Puang Allataala, na ia to kamandalanan tangngah-Na pajan lan panggaukan-Na.”

Pengkitanna Yahya 16:17

Mangkai joo too ia to malaeka' mangpempitu mballuan issi isotanna jao langi'. Denmi gamara disa'ding liwa' tonggo jao mai cadokkoan mala'bih lan mai Bola Puang Allataala nakua, “Mangka ngasanmi.”

Pengkitanna Yahya 12:9

nadipenca'bean tama lino sola sininna malaeka'na. Ia to naga, iamo to ulah tua disanga Ballisi' ba'tu puanggawana setang to mpalao sala sininna tau lan lino.

Matius 13:22

Ia to banne ta'pah lan tangnga duri dipasangrapangngi to tossa'ding kadan-Na Puang Allataala, apa mpuselang bangngi katuoanna, namadoang bang too la sugih. Iamo joo nni'pinnii joo kada lan penawanna, anna te'da namembua.

Markus 4:19

apa mpuselang bangngi katuoanna. Madoang bangri la sugih na mangrupa-rupa kamadoangan laen to nni'pinnii joo kada lan penawanna, anna te'da namembua.

Efesus 1:21

La'bih majao ia to torroan-Na Almaseh na ia to torroanna sininna kuasa ba'tu kaparentan jao langi' na lan lino, ba'tu laenna to dikita majao, la tuona tee too, ba'tu ia ke jio ahera'.

Efesus 2:11

Ee, kamu' to tangngia to-Yahudi! Ingaranni torroanmi tonna jolona. Nasanga kamu' to-Yahudi kumua totangdisunna', nasaba' te'da tanda sunna' jio kalemi. Napaui to-Yahudi kumua ia joo tanda sunna', tandana kumua umma'-Nami Puang Allataala to to-Yahudi, apa taura ssunna' tau.

Efesus 2:13

Apa ia tee too te'damo misusi joo, nasaba' memmesa'mo kamu' sola Puang Isa Almaseh. Ia to kamu' jolona to te'da miissen Puang Allataala, miissenmi, nasaba' kamatean-Na Almaseh jao kaju sitamben.

Efesus 4:17

Kuasan-Na Puang kupangngingaran kamu' kumua, “Danggi' omo mimessipa' susi totangnturu' Puang Allataala.” Tangsipato'na bang to napikkiri' tuu lako tau,

Efesus 5:8

Ia tonna jolona ia to sipa'mi susi sipa'na to tote'da naissen Puang, apa ia tee too nnissenmo kamu' Puang. Iamo joo ia to panggaukanmi la susi unamo panggaukanna umma'-Na Puang.

Yakub 1:27

Ia to mangngagama tongan situru' pakkaeloran-Na Ambe' Puang Allataala, iamo to ntulung pea biung pu'puhmo, sola baine te'damo muanena nakaasi-asi, na njagai kalena danggi' naturu' panggaukan tangmelona tolino to tangnturu' Puang Allataala.