Daniel 2:47 - Alkitab Duri

⁴⁷ Mangkadami raja lako Daniel nakua, “Nang la'bih makuasa to Allataala musompa, na ia to puang iarika raja laen. Ia toomo to mpamanassai to sininna apa tangkaissenan. Kuissenni joo, nasaba' napangpeissenanmo lako iko to apa la jaji.”

Daniel 2:47 Referans Kwoze

Daniel 2:28

Apa Allataala jao suruga mpamanassai to sininna apa tangnaissen tau, na Iamo mangka mpangpekitanni lako kita' to apa la jaji tee wattu la dioloi lako. Susimi tee to tindo sola pengkita, to takita tontamamma'.

Daniel 2:22

Iamo mpamanassai to apa mandalan na tangkaissenan. Naissen ngasan sininna to apa jaji lan kamalillinan. Natalimbungngi arrang to liwa' macora.

Amos 3:7

Iamo joo, nate'dapa apa Napugauk PUANG Allataala, ke te'dapi Napangpeissenanni jolo' lako nabi, tompangjaman Puang Allataala.

Daniel 11:36

Napugauk bang raja karajaan jajanna liu to apa nakadoangngi. Namenjaji matampo, nnangga' kalena la'bih mala'bih na ia to sininna dewata. La'bih-la'bih liwa' ncapa' Allataala to makuasa. La jaji ngasan susi to nakadoangngi arannai naperasai to kamabirisan-Na Puang Allataala. Nasaba' ia to mangka Napattantu Puang Allataala nang la jaji.

Pengkitanna Yahya 19:16

Den sanga diuki' jio pakean malando-Na na upan-Na, “Rajana sininna raja na Puangna sininna puang.”

Pengkitanna Yahya 17:14

Namane' mangrari joo olok-olok sola tuu lako raja nnewa Anak Bembala'. Apa ia joo Anak Bembala' ntaloi sola tau matappa'-Na, sanga iamo Puangna sininna puang na Rajana sininna raja.” Ia to taun-Na, iamo to mangka napilei anna pakedoi penawanna.

Pengkitanna Yahya 1:5

Ia to Puang Isa sa'bi maruruh. Iamo bungah dipatuo jio mai kamatean. Ia toomo ngkuasai sininna raja lan lino. Napakamoja'ki' namate anna la'paranmiki' jio mai dosata'.

1 Timotius 6:15

Ia to karatuan-Na pole', Puang Allataala Ia la mpattantui. Iamo tomangkada mesa, to mala'bih. Rajana sininna raja na Puangna sininna puang.

Daniel 2:37

Tomala'bihku' Raja Nebukadnezar, kita'mo raja mala'bih jio mai sininna raja. Nabenmiki' Allataala jao suruga tee kaparentan, kakuasan, kamawatangan sola kamala'biran.

Daniel 4:32

La diula'iki' jio mai tangngana tau, tamale tuo sola olok-olok masia'. Na reu la mukande susi sapin. La susiko joo pitung taun masainna, arannai muakui kumua ia to Allataala Tomala'bih ngkuasai karajaanna tolino. Nampangbengan kuasa lako inda to Nakadoangngi la mangparenta.’

Daniel 4:17

Ia tee pepasan ba'tu kara'tasan kupau situru' to napattantu malaeka'-Na Allataala, dikua naissen ngasanni tolino kumua ia to Allataala Tomala'bih ngkuasai karajaanna tolino. Mpangbengan karajaan lako tau to Nakabudai, moi na lako tobiccu'.”’

Daniel 2:19

Ia bang unamo joo bongi, Napangpekitanni Allataala lako Daniel lan mesa' pengkita to apa membuni lan joo tindo. Iamo joo na mpakala'bih Allataala jao suruga to Daniel

Yosua 22:22

“PUANG Allataala to makuasa, to la'bih makuasa na sininna dewata, nnissenni tee kipugaukkuna. Naparallu too la miissen kumua ia ke denni pattujungki' nnewa Puang Allataala kipugaukki susi joo na te'damo kikatappa'i-I, ma'namo Nata'pa mpatei ngasankan too allo!

Daniel 4:25

La diula'iki' jio mai tangngana tobuda, tamale tuo sola olok-olok masia'. Pitung taun masainta' la ngkande reu susi sapin, nabosokki bangki' ambun jao mai langi'. Mangkai joo too, mane'ri la taakui kumua ia to Allataala Tomala'bih ngkuasai karajaanna tolino. Nampangbengan kuasa lako inda to nakadoangngi la mangparenta.

1 Korintus 14:25

Kaissenanni to apa membuni lan penawanna, anna suju' ssompa Puang Allataala. Nakatappa'i kumua, “Lan tonganmo tangnga-tangngami to Puang Allataala.”

Daniel 2:29

Ia tontamamma' unapa, tapangtindoanni to wattu la dioloi lako. Allataala mpamanassai to sininna apa tangnaissen tau, napangpekitanni lako kita' to apa la jaji.

Daniel 2:30

Ia tee apa tangkaissenan, mangkamo dipamanassa lako aku', te'da to kumua la'bih maccana' na tolaen, apa dikua antawa'ding nnissenni battuananna joo tindota', antapahang tooi to apa tapikkiri'.

Daniel 3:15

Ia tee too ke nnonimi to parewa mossi', sadiara kamu'ka la mpakala'bihhi sola ssompai joo patung bulawan? Ia ke cia' kamu' la ta'pa dipembuangan kamu' tama api to gaja liwa' lussu. Na te'da dewata to la ngkullei mpasalama' kamu' jio mai pangsessaku'.”

Daniel 3:28

Mangkadami raja nakua “Mala'bih Allataala to nasompa Sadrakh, Mesakh na Abednego, to mangka ssua malaeka'-Na lla'paranni to tallu kaunan-Na to ngkatappa'i, to te'da naturu'i to parentaku', na la'bih nakabudai ke matei, na ia ke ssompai apa laen saliwanna Allataala to nasompa.

Daniel 3:29

Iamo joo kupangparentanni kumua, ia to simesa'-mesa' tau jio mai bangsa, rapu na basa, to mpau kada tangnnangga' Allataala to nasompa Sadrakh, Mesakh na Abednego, la dita'tak-ta'tak na ia to bolana la diro'pokan naditombon menjaji burauk, nasaba' te'da ia dewata la ngkullei mangpasalama' susi to mangka Napugauk Allataala to nasompa.”

Daniel 5:11

Nasaba' lan tee kaparentanta' den mesa' tau to gaja nabarakka'i roh dewata. Ia tonna ba'tu piran, tonna mangparenta Raja Nebukadnezar ambe'ta', ia joo tau dibarakka'i pangpikkirisan melo sola kamaccan, na kapaissenanna susi kapaissenan dewata. Naangka'i Raja Nebukadnezar joo tau ngkapalai sininna topaissen-issen, tomangbaca-baca, tomacca mbattuananni apa jaji jao langi' sola topakita-kita.