Daniel 11:23 - Alkitab Duri

²³ Natengkai to basse mane' mangka napaden sola bangsa laen, nasaba' kalasii. Samawatang-watangna moi na ci'di'ra tau nasolan.

Daniel 11:23 Referans Kwoze

Daniel 8:25

Gaja mangngakkalanni na nnuraga buda tau. Nnangga' majao bang kalena, liwa' matampo. Te'da napau-paui, na te'da nakalannai tau nata'pa nnancuru'i. Moi Allataala, Raja ngkuasai sininna raja, naewa too. Katampakanna ditaloi, apa tangngia tolino ntaloi.

2 Tesalonika 2:9

Ia joo Togaja' la napaollong Ballisi', na mpaden mangrupa-rupa to apa makalaen-laen na mejangngaran, apa sininna joo te'da ngasan natongan.

2 Korintus 11:3

Apa magiangna', iamo ke denni to mpalao sala kamu' ammicia'mo matappa' tongan lako Almaseh susi jolona. Susi todai Hawa tonna anu' tonna sedei ulah napalao salai.

Roma 1:29

Kagajatan mandamo lan penawanna na apa tangtongan, madoang nnassang sininna apa, tangngah gaja' na masere ati, madoang bang mangbuno, sibobo', mangnguraga, na malla' parru. Nakabudai ncurita tangtongan tau laen,

Kada Bulawan 11:18

Ia to assele' napaden togaja' te'da bua'na, apa ia to assele' napaden tonturu' pakkaeloran-Na Puang Allataala den tarruh bua'na.

Daniel 11:22

Sininna to surudadu ratu nnewai, moi to raja mangka nasibassean la nalanynyasan ngasan.

Daniel 11:24

Tangdikalannai natamaii to padang kaminang malompo lan joo karajaanna, namane' rrampai to ewanan. Mangkai joo too natawa-tawai lako taunna to ewanan narampa. Mpugauk panggaukan to te'dapa napugaukki tojolona. Mangngattai la ngkuasai pira-pira to benteng, apa ci'di'ra wattunna.

Daniel 8:24

Naliwa' mawatang, apa tangngia kamawatanganna mesa. La nacappu'i ngasan sininna to tonnewai. Ia to apa nakadoangngi la keassele' ngasan. La nataloi to tomakuasa, na la nnancuru' too umma'-Na Allataala.