1 Timotius 1:1 - Alkitab Duri

^1-2 Ee, Timotius, to kupuanak, sanga matappa'moko lako Puang Isa nasaba' pangngajahku'! Aku' Paulus ngkiringanko tee sura'. Pakkaeloran-Na Puang Allataala, Tomangpasalama'ta' kumenjaji rasulu'-Na Puang Isa Almaseh to tarannuan. Dennaa upa' nabarakka'iko nakamasei tooko Ambe' Puang Allataala sola Puangta' Puang Isa Almaseh nabenko kamasannangan.

1 Timotius 1:1 Referans Kwoze

Titus 1:3

Ia joo basse-Na Puang Allataala napapajan tonna dete'mi wattunna. Dipabarakkannimo' situru' parenta-Na Puang Allataala, Tomangpasalama'ta', angkupangpeissenanni.

Kolose 1:27

Madoangngi Puang Allataala mpangpekitanni lako sininna umma'-Na to melona sola mala'bihna joo akkatta-Na lako kamu' bangsa tangngia to-Yahudi kumua, natorro too Almaseh lan kalemi, na iamo buttinna kumua la turu' toda kamu' mperasai kamala'biran-Na Puang Allataala jao suruga.

Jamanna Rasulu' 9:15

Apa nakua Puang ngkuanni, “Male bangmoko! Nasaba' mangkamo kupilei la mpangjamanna', dikua napangpeissenanna' lako bangsa tangngia to-Yahudi, lako raja, na lako too to-Yahudi.

Yudas 1:25

Ia manda mesa-mesanna Puang Allataala, to mpasalama'ki' nasaba' kamatean-Na Puangta' Puang Isa Almaseh. Iamo Puang Allataala to mala'bih, matongko, mawatang na makuasa mammula jiona mai, tee too, na te'da cappa'na! Amin.

1 Petrus 1:3

Tamangkurru sumanga' lako Puang Allataala, Ambe'-Na Puangta' Puang Isa Almaseh! Liwa' Ia ngkamaseiki', anna patuo pole'i to Puang Isa Almaseh antawa'ding nnampa' katuoan baru. Iamo joo tangbataki' rrannuan Puang.

1 Timotius 1:12

Mangkurru sumanga'na' lako Puangta' Puang Isa Almaseh, nasaba' naangga'mo' kumua sipato'mo' naangka' menjaji rasulu'-Na. Iamo nabenna' kapakullean la mpangjamanni,

Galatia 1:1

Ia tee sura' pole jio mai aku', Paulus, sola padanta' tomatappa' to kusolan, kikiring lako jamaa jio tana Galatia. Ia tee aku' mesa' rasulu' tangngia napilei tolino, tangngia too nasua tolino, apa nasuana' Puang Isa Almaseh sola Ambe' Puang Allataala, to mangka mpatuo Puang Isa jio mai kamatean.

2 Korintus 1:1

Ee, tomala'bihku' sola ngasan, tomatappa' lako Puang Allataala jio kota Korintus sola sininna to tomatappa' lan lili'na propinsi Akhaya! Aku' Paulus sola padanta' tomatappa' Timotius ngkiringan kamu' tee sura'. Napileina' Puang Allataala situru' pakkaeloran-Na menjaji rasulu'-Na Puang Isa Almaseh. Dennaa upa' nabarakka'i kamu' Ambe'ta' Puang Allataala sola Puang Isa Almaseh naben kamu' kamasannangan.

2 Petrus 1:1

Ee, tomala'bihku' sola ngasan! Pada matappa'miki' lako Puangta' Puang Isa Almaseh, nasaba' kamarurusan-Na. Iamo Puang Allataala, Tomangpasalama'ta'. Aku' Simon Petrus, taun-Na ba'tu rasulu'-Na, ngkiringan kamu' tee sura'.

1 Timotius 2:7

Na iamo joo naangka'na' Puang Allataala menjaji rasulu' angkudisua male lako sininna bangsa tangngia to-Yahudi la mpangpangngajaranni to kamatapparan tongan. Na tongan tee kupau, te'da kumangnguraga.

2 Tesalonika 2:16

Napakamoja'ki' Puangta' Puang Isa Almaseh sola Ambe'ta' Puang Allataala. Napamasumanga' tarruh to penawanta', naben tooki' kasabbarasan ntajanni to melona, nasaba' kameloan penawan-Na.

1 Korintus 1:1

Ee, tomala'bihku' sola ngasan, tomatappa' lako Puang Allataala jio kota Korintus, to napilei Puang Allataala menjaji umma'-Na, to napatorro leko' Puang Isa Almaseh jio mai to totangnturu' Puang, sola sininna to tossompa Puangta' Puang Isa Almaseh umbo-umbo nanii! Iamo Puangta' sola ngasan. Aku' Paulus sola padanta' tomatappa' Sostenes ngkiringan kamu' tee sura'. Napileina' Puang Allataala situru' pakkaeloran-Na menjaji rasulu'-Na Puang Isa Almaseh.

1 Yahya 4:14

Kikitamo kami' na kipangpeissenan toomo kumua nasuami Ambe' Puang Allataala mentolino to Anak Allataala anna pasalama'i to tolino.

1 Petrus 1:21

Almasehmora ammimatappa' lako Puang Allataala, to mangka mpatuo pole'i jio mai kamatean, na mpakala'bih tooi. Jaji, Puang Allataalara mikatappa'i, na Ia manda toora miparannuan.

Titus 3:6

Nasuami Puang Allataala to Puang Isa, Tomangpasalama'ta', mpakabuhhiki' Roh Allataala,

Titus 3:4

Apa Puang Allataala, Tomangpasalama'ta', mpakitanki' pangpakamoja'-Na sola kameloan penawan-Na.

Titus 2:13

Ia tee too tatajanni joo Wattu tanii la mario-rio. Ia joo Wattu la nakita tau to kamala'biran-Na Puang Isa Almaseh, iamo Puang Allataala mala'bih na Tomangpasalama'ta'.

Titus 2:10

te'da nakaala-ala, apa la mpangpekitanni kumua wa'ding dikatappa'i. Ianna massipa' susimo joo, la tuli napujii tau to pangngajaran-Na Puang Allataala, Tomangpasalama'ta'.

1 Timotius 4:10

Mangjamaki' tangmekabo'jo', nasaba' mangrannuanki' lako Puang Allataala to tuo tarruh. Iamo Tomangpasalama'na sininna tau, la'bih-la'bih sininna to tomatappa'.

1 Timotius 2:3

Melo joo, na napumasannang Puang Allataala, Tomangpasalama'ta'.

Galatia 1:11

Ee, kamu' to kupusile'to! Kupauan kamu' kumua, ia to Kareba Kasalamatan kupangpeissenan, tangngia curita nagaraga tolino,

1 Korintus 9:17

Ia ke la aku' mpilei angkupangpeissenan Kareba Kasalamatan, la dipagajira'. Apa tangngia pangpileanku', sanga napabarakkannira' Puang Allataala mpangpeissenanni.

Roma 1:1

Ee, todipusile'to jio kota Roma, to napakamoja' Puang Allataala, to napileimo menjaji taun-Na! Napilei toomo' menjaji taun-Na, naangka'na' menjaji rasulu' la mpangpeissenan Kareba Kasalamatan jio mai Puang Allataala.

Lukas 1:47

na mariona', nasaba' Puang Allataala mpasalama'na'.

Lukas 2:11

Ia tee allo jajimi to Tomangpasalama'mi jio kotana Raja Daud. Iamo Almaseh, Puang.