James 1:26 - Bo-Ung NT

²⁶ Yambu te-ni ‘Na Pulu Yili-nga ungele aima piliipu liipu yu popu topu kape nimbu konjupu moliu.’ nimba piliipa molemú akiliinga-pe yunga anembelale nokupa naa kunjum lem yu-ni yu-yunu gólu topa numanale-ni mindi ‘Sika aku teliu.’ nimba piliipa, yunga numanale liipa kelep tonjulemú. Yu ‘Pulu Yili-nga ungele piliipu liipu, yu popu topu kape nimbú ung-manima aima piliipu moliu.’ nilimú ulu akili-ni yu liipa tapunjumba ulu te naa telemú.

James 1:26 Referans Kwoze

Ephesians 4:29

Eninga kerimanga ‘Ung kis te wendu naa upili.’ niai. Krais-nga yambu numanu toembu naa túlima kene molku kis-singíma kene kanuma tondulu simba ungma mindi niai. Ung mare yambu kanuma piliingí kene enini liipa tapunjumba ungma mindi niai.

1 Peter 3:10

Niker ung akiliinga ung te [Pulu Yili-nga bukna sukundu molemú akili] i-sipa mele: ‘Yambu te-ni ‘Na kapula molupu, numanu sipu molambu.’ nimba kene yu ‘Ung kis te naa nimbu, gólu naa tambu.’ nimba yunga kerale nukupiliko.

Ephesians 5:4

Yambuma piliiku kene pipili kulungí ung-kísima kepe naa niku, marake teku ‘Yambuma tae teangi.’ niku temani kísima toku lawa teku ung akuma naa niai. Aku-sipa ung-kísima oliu [Krais-nga yambuma] nimulú kene kapula naa temba. Ung akuma naa niku, [Pulu Yili-ni eni tepa konjulimáliinga] yu-kene “Angke” niku molai. Aku tingí kene kapula.

Colossians 4:6

Eni ung niku singíma taki-taki api-mele sungu tipili. Yambuma-ni waka kolku ‘Aima piliamilika.’ niku kum liingí ung kaíma niai. ‘Yambuma-ni walsingí kene oliu-ni ung kaíma pundu topu niamili.’ niku aku-siku teai.

James 1:22

[Pulu Yili-nga] ungele-ni nilimú mele we kumele-ni mindi naa piliai! Piliiku kene piliiku liiku teng panjiku teai. We kumele-ni mindi piliiku kene nilimú mele naa telemele lem eni-enini gólu toku ‘Papu tepu molemulu.’ niku piliilimili.

James 1:19

Aima nanga angmene, yambu te-ni ung te nimbá kene ‘Mimi-sipu piliamili.’ niku kum leku molku, ung te nondupa pundu toku naa niku, sumbi-siku arerembi naa kolai. Ung kanili yambuma-ni pali aima mimi-siku piliiku numanuna panjai! Pulu Yili-ni ‘yambuma sumbi-siku mulungí kene kapula.’ nimba piliipa kanolemú mele yambumanga arerembi kululi ulu akili-ni ‘Aku-siku molangi.’ nimba naa liipa tapunjilimú akiliinga nondupa arerembi naa kolai.

Luke 8:18

“Aku-sipa temba akiliinga eni ung piliilimili akili mimi-siku piliai. Pulu Yili-nga ung-sikale piliiku liiku molemele yambuma aima lakupa ungma nimba simba piliingí. Penga aima pulele piliingí. Akiliinga-pe ung naa piliiku molemele yambuma enini layesele piliilimili ungele kepe wendu liimba.” nirim.

Galatians 6:3

Yambu te-ni yu bi ola naa molemú kene ‘Na bi ola molemú akiliinga [nanga anginele naa liipu tapunjumbu].’ nimba piliilimále yu-yunu gólu topa kene ‘yunga bi sika ola molemú.’ nimba numanale-ni piliilimú.

Galatians 2:6

[Jerusallem Krais-nga yambuma-ni] “Oliunga yi-aulima” niring yi kanuma ‘Enini sika bi molemú mola naa molemúnje, akili ulu te mólu.’ nimbu piliiker. Pulu Yili-ni kangikundu kanupa ‘Kamakoma’ nimba ‘bi naa mulúlima’ nimba yambuma apurupa naa kanolemú. Yi kanuma-ni na ung nimbu siliáliinga ung tepa liipa nokupa konjumba ung te-lupa naa niring.

Mark 7:7

Enini ‘Nanga bili paka tunjamili.’ niku na we popu toku kape nilimele. Mana-yambuma-ni mani silimele ungma mindi mani siku kene ‘Ung-mani ima Pulu Yili-ni “Teai.” nilimú ung-manima.’ niku piliiku liiku telemele, akiliinga na popu tungí kene ulu te naa temba.” [nirim]’ Asaya 29:13 kanili.

1 Corinthians 15:2

Temani kaí kanili, akili Yesos Krais-ni tirim mele na-ni enindu nimbu sirindu ung kanili, ambolku gi siku kene ‘Aima sika.’ niku tondulu munduku piliiring mele alsuku munduku naa kilíngi lem temani-kaí kanili-ni Pulu Yili-ni eni tepa liipa, mindili nolkemela kupulanum-na wendu liipa, yu-kene wasie molku kunjingí kupulanum-na liipa munjurum, akuna molemele mele mulungí. Mola na-ni temani-kaiéle topu sirindu mele mimi-siku naa piliiku, akili we ‘Sika’ niku piliiring lem temani-kaí akili-ni eni tepa naa liilimú naa liimba.

Matthew 15:9

Enini ‘Nanga bili paka tunjamili.’ niku na we popu toku kape nilimele. Mana-yambuma-ni mani silimele ungma mindi mani siku kene ‘Ung-mani ima Pulu Yili-ni “Teai.” nilimú ung-manima.’ niku piliiku liiku telemele, akiliinga na sika popu tungí kene ulu te naa temba.” nirim.’ Asaya 29:13 kanili.” nimba Yesos-ni nirim.

1 Corinthians 15:15

Ulu te-lupa wasie telkako: Krais lomburupa ola naa molkanje oliu-ni “Krais yu kulurum kene Pulu Yili-ni ‘Lomburuku ola mului.’ nimba topa makinjirim.” nimbu silimulu mele Pulu Yili-ndu gólu tolkemelako. Akiliinga-pe yambuma aima sika penga lomburuku ola naa mulungí lem Pulu Yili-ni Krais ui “Lomburuku ola mului.” naa nilkako.

James 2:20

Sundupa sili-pili yambale, we ‘Sika’ nikunu tondulu munduku piliikunu ulu kaíma naa tellu ulele-ni ulu te kapula naa temba mele ung-pulele piliani nimbu sambuye?

Galatians 3:4

[‘Krais sika.’ niku tondulu munduku piliiring kene] [Mini Kake Tiliele-kene] ulu [kaí aku-sipa] mare eni-kene wendu urum akuma we wendu urumye? ‘Ulu [kaí] akuma we wendu urum lam.’ nimbu kanokur. ‘[Ulu kaí akuma wendu urum kene penga ‘Moses-ni ung-mani sirimuma-ni oliu tepa liimba.’ niku piliiku liiring] akili aima kis.’ nimbu piliiker.

Galatians 2:9

Jemis kene, Pita kene, Jon kene, [Jerusallem] yambuma-ni “Enini oliu nokolemele yi-aulima.” niring yi kanuma-ni Pulu Yili-ni na kongun ili aima sirim mele kanuku kene, [‘Sika kongun tilu-sipu telemulu.’ niku] Banapas olsu ‘Eninga kandi-angin-mele-sele molangli.’ niku ki liiring. Enini kene olsu kene oliu-ni ung te nimbu panjipu kene, “Banapas olsu-ni yambu-lupama liipu tapunjupulu Pulu Yili-nga kongunale teambili. Enini Juda-yambuma liiku tapunjuku Pulu Yili-nga kongunale teangi.” nirimulu.

1 Corinthians 3:18

Eni-enini numanale-ni gólu toku naa piliai. Eninga yambu te-ni yunu piliipa kene, ma-koleana yambuma-ni ‘Oliu piliipa kungnjuli pelemú yambuma molemulu.’ niku piliilimili mele yu-ni aku-sipa ‘piliipa kungnjuli yambale moliu.’ nimba pilíímu lem ‘Aku-sipu nimbu naa piliambu.’ nipili. ‘Mana-yambuma-ni na kanuku kene ‘Sundupa sili-pili yambale.’ niku kanangi.’ nipili. Aku-sipa nimbá kene sika piliipa kungnjuli yambale molumba.