युहन्‍ना 5:19 - मध्‍य पुरविया थारू

¹⁹ तब येसु ओइसबके जबाफ देल्‍कै, “साँचोके हम तोरासबके कहैचियौ, बेटा स्‍वयम आपनेसे कुछो करे नै सकैछै, महज पिताके जे करैत देखैछै, उ ओह्‍या मातरे करे सकैछै, कथिलेत पिता जे-जे करैछै, बेटो ओह्‍या-ओह्‍या करैछै।

युहन्‍ना 5:19 Referans Kwoze

युहन्‍ना 12:49

कथिलेकी हम आपने मनसे नै बाजैचियै महज हम कथी कहबै आ बोल्‍बै तैके आदेस हमरा पठाइबला पिता आपनेसे देने छै।

युहन्‍ना 8:28

तहैलेल येसु कहल्‍कै, “जब तुसब मानबके बेटाके उपर उठाइबिही, तखन तुसब जानबिही कि हम ओह्‍या चियै। हम आपने मनसे कुछो नै करैचियै महज पिता हमरा जे कुछो सिखाइने छै, ओह्‍या बात बोलैचियै कैहके तुहुसब बुझबिही।

युहन्‍ना 14:10

‘हम पितामे चियै आ पिता हमरमे छै’ से कि तु बिस्‍बास नै करैचिही? जे बात हम तोरासबके कहैचियौ, से बात हम आपने मनसे नै कहैचियौ। महज हमरमे रहैबला पिता यि कामसब करैछै।

युहन्‍ना 10:18

कोइने हमर परान हमरासे लैले सक्‍तै, महज हम आपने राजिखुसीसे दैचियै। आपन परान दैके अधिकार हमरेसङे छै आ फेनो ओकरा लैयोके अधिकार छै। एह्‍या आग्‍या हम आपन पितासे पाबनेचियै।”

रोमी 8:11

यदि येसुके मरलसे जिबित करैबला परमेस्‍वरके पबितर आत्‍मा तोरासबमे बास करैछौ त, येसु खिरिस्‍टके मरलसे जिबित करैबला वह्‍या आत्‍मा तोरासबके नास हैबला देहके सेहो जिबन देतौ।

युहन्‍ना 9:4

हमरा पठाइबलाके कामसब अपनासबके दिन रहिते करे परतौ, कथिलेत रातके अन्‍हारमे कोइ नै काम करे सकैछै।

लुका 21:15

कथिलेत हम तोरासबके एहेन सब्‍द आ बुधि देबौ, कि तोहर बिरोधीसब तोरासबके बात सुइनके एकोटाके जबाब दैले नै सक्‍तौ, ओकरौरके मुहमे तला लाइग जेतौ।

युहन्‍ना 5:21

कथिलेत जहिनङ पिता मरलाहासबके जियाबैछै आ ओकरासबके जिबन दैछै, तहिनङ बेटो जकरा मन करैछै तकरा जिबन दैछै।

२ कोरन्‍थी 5:10

कथिलेकी हम सबगोरा खिरिस्‍टके नियाय आसनके सामने खरा हैलेपरतै। ताकी हमसब अइ देहमे करल असल या खराब काम अनुसारके परतिफल पाब्‍बै।

युहन्‍ना 3:3

येसु निकोदेमसके कहल्‍कै, “साँचोके हम तोरासबके कहैचियौ, जाबेतक फेनोसे लोक नया कैरके जलम नै लेतै ताबे तक उ परमेस्‍वरके राज देखे नै सक्‍तै।”

परकास 2:23

ओकर पछा लागैबला बेटा-बेटीसबके हम खतम करबै। तब सब मन्‍डलीसब थाह पाबतै कि हम वहे चियै जे सबके मन आ हिरदयके जाँच करैचियै। हम तोरासबके काम अनुसारके इनाम देबौ।

१ पतरुस 3:18

कथिलेकी अपनासबके परमेस्‍वरमे आनैके लेल खिरिस्‍ट धरमी भ्‍याके सेहो अधरमीसबके पापके लेल एकबेर सबदिनके लेल मरलै। उ देहमे मरलै महज परमेस्‍वर ओकरा आत्‍माके सक्‍तीसे जिबित करल्‍कै।

कलस्‍सी 1:16

कथिलेत स्‍वरग आ पिरथिबीमे भेल सब चिज ओकरेसे सिरिस्‍टी भेलै। देखापरैबला आ नै देखापरैबला सब चिज, चाहे सिंहासन या सक्‍तीसब हेबे, सासकसब आ अधिकार चलाइबलासब, यि सब चिज खिरिस्‍टेसे आ खिरिस्‍टेके खातिर सिरिस्‍टी भेलै।

फिलिप्‍पी 4:13

खिरिस्‍टके देल सक्‍तीसे हम सबचिज करैले सकैचियै।

फिलिप्‍पी 3:21

उ आपन सक्‍तीसे सब चिजके आपन अधिनमे लाबेसकैछै। ओकर यि सक्‍तीसे अपनासबके यि मैर जाइबला देहके ओकर आपन महिमाके देह जखा हैले परिबरतन कैरदेतै।

एफिसी 3:16

ओकर महान सम्‍पैत आ आत्‍मासे तोरासबके सक्‍ती मिले। उ सक्‍ती तोरासबके आत्‍म बल बरहैत जाए कैहके हम परमेस्‍वरसङे परथना करैचियौ।

एफिसी 2:5

अपनासब अटेर कैरके आत्‍मिक तबरसे मरल छेलियै तैयो परमेस्‍वर खिरिस्‍टसङे अपनासबके जिबित करल्‍कौ। तुसब परमेस्‍वरेके अनुगरहसे बच्‍याल गेलचिही।

२ कोरन्‍थी 4:14

हमसब जानैचियै कि परभु येसुके जियाइबला हमरोसबके येसु सङे जियाइतै आ वह्‍या हमरासबके आ तोरासबके आपनलग लजाइतै।

१ कोरन्‍थी 15:12

परमेस्‍वर खिरिस्‍टके मरलसे जीयाके उठेल्‍कै कैहके हमसब परचार करैचियै त, कनङके तोरासबमेसे कोइ-कोइ मरल लोक जीके नै उठतै कहैचिही?

रोमी 6:4

ओहैसे अपनासब सेहो ओकरसङे बप्‍तिस्‍मा दुवारा मैरके गारलगेलियै। जहिनङ सक्‍तिसाली परमेस्‍वर पिता आपन महिमा दुवारा येसु खिरिस्‍टके मरलसे जिबित करल्‍कै। आब अपनोसब पुरन्‍का जिबन जियैले छोइरके लया जिबनमे खिरिस्‍टसङे जिएपरतौ।

परेरित 2:24

महज ओकरा परमेस्‍वर मरनके दुखसे छुटकारा द्‍याके जिबित करल्‍कै। कथिलेत ओकरा मिरतुके अधिनमे रहनाइ असम्‍भब छेलै।

युहन्‍ना 2:19

येसु ओइसबके जबाफ देल्‍कै, “यि मन्‍दिरके उजाइरदहै, हम अकरा फेनसे तिन दिनमे ठार कैरदेबौ।”

१ थेसलोनिकी 4:14

कथिलेकी येसु मरलै आ फेनसे जिबित भेलै कैहके अपनासब बिस्‍बास करैचियै, अहैलेल जब येसु फेनसे एतै त मरैसे पहिने येसुमे बिस्‍बास करल लोकसबके परमेस्‍वर फेनसे जियेतै आ ओकर सङे-सङे एतै।

कलस्‍सी 1:11

परमेस्‍वरके महिमीत सक्‍ती तोरासबके बलगर बनाबे कैहके हमरासबके परथना छै, तब मातरे तुसब अस्‍थिर भ्‍याके सब चिज आनन्‍दसे सहन करैले सकबिही।

मतीके लिखल सुसमाचार 26:39

उ कन्‍हिक अगा बैढके भुइयामे मुरी गोइतके अनङ कैहके परथना करेलाग्‍लै, “हे हमर पिता, यदी भ्‍यासकैछै त यि दुखके बाटी हमरासे हटा दिय, महज तैयो हमर इछा बमौजी नै, बल्‍की अहिके इछा बमौजी हेबे।”

युहन्‍ना 6:38

हमर आपन इक्‍छा नै महज हमरा पठाइबलाके इक्‍छा पुरा करैले हम स्‍वरगसे एलचियै।

युहन्‍ना 12:50

हम जानैचियै कि ओकर आग्‍या अनन्‍त जिबन चियै। ओहैसे पिता हमरा जे कहैले लगाइनेछेलै ओह्‍या बात हम बाजैचियै।”