हिबरु 2:14 - मध्‍य पुरविया थारू

¹⁴ कथिलेत उ बेटा-बेटीसब लहु आ मासुके देह भेलासे येसु सेहो ओकरेसब जखा भ्‍याके एलै। उ आपनेसे मिरतु भोइगके मिरतुके सक्‍ती भेल सैतानके नास करल्‍कै।

हिबरु 2:14 Referans Kwoze

२ तिमोथी 1:10

जे अनुगरह आब हमरासबके मुक्‍तीदाता येसु खिरिस्‍ट एलासे परकट भेल छै। परभु येसु मिरतुके नास कैरके सुसमाचारमे अजर-अमर जिबन परकट करने छै।

रोमी 8:3

बेबस्‍था जे करैले नै सक्‍लै, से परमेस्‍वर करल्‍कै, कथिलेकी अपनासबके पापी स्‍वभाबके कारनसे बेबस्‍था कमजोर भेलै। परमेस्‍वर अपनासबके पापसे छुटकरा करैके लेल आपनेसब जखा आपन बेटाके देहमे पठेल्‍कै आ उ खिरिस्‍टके देहके बलिदान कैरके अपनासबके पापके नास करल्‍कै।

कलस्‍सी 2:15

उ आत्‍मिक दुस्‍ट सक्‍तिसबके आ अधिकार सबके नस्‍ट करल्‍कै आ खिरिस्‍टके कुरूस दुवारा ओकरासबके हरेल्‍कै। उ ओइसबके खुलम खुल्‍ला तमासा बन्‍यादेल्‍कै।

युहन्‍ना 1:14

तब बचन लोक बैनके अपनासबके बिचमे बास करल्‍कै आ अपनासब ओकर महिमा देखलियै, जे महिमा परमेस्‍वरसे आबैबला एक मातरे बेटामे छेलै। उ आपनौरके पुरा रुपसे अनुगरह करैछै आ सत बात मातरे बोलैछै।

हिबरु 9:15

ओहै कारनसे परमेस्‍वरके परतिग्‍या करल सबदिन रहैबला अनन्‍त उतराधिकारी पाबे कैहके उ बोलेल्‍हासबके लेल खिरिस्‍ट लया करारके मिलाप कराबैबला चियै, कथिलेत पहिन्‍का करारके समयमे लोकसबके करल पापसे छुटकरा दैले उ मरलै।

१ कोरन्‍थी 15:50

हे हमर पिरिय भाइ-भैयासब, हम तोरासबके यि बात कहैले चाहैचियौ, कि मासु आ लहुसे बनल अपनासबके देह परमेस्‍वरके राजके हकदार हैले नै सक्‍तै। तहिनङे नास हैबला देह कहियो नास नै हैबला देहके हकदार हैले नै सक्‍तै।

परकास 1:18

जिबित हैबला हम्‍ही चियै। हम मरल छेलियै महज आब सबदिनके लेल जिबित चियै, मिरतु आ पतालके कुजीसब हमर हाथमेछै।

रोमी 14:9

ओहैसे येसु खिरिस्‍ट मरलै आ फेर जिबित भेलै ताकी मरलसब आ जिबीतसब दुनुके परभु हेबे।

हिबरु 2:18

उ आपने दुख भोगल्‍कै आ परिक्‍छामे परलै, तैल्‍याके परिक्‍छामे परैबलासबके उ सहायता करैले सकैछै।

परकास 2:10

तोरा जे कस्‍ट परेबलाछौ ओइसे नै डरा। तोहर बिस्‍बास जाँचके लेल सैतान तोरासबमेसे कतेक लोकके जहलमे ढोकतौ। अहिनङ कैरके तोरासबके दस दिनतक कस्‍ट सहैले परतौ। तु मिरतु तक हमरमे बिस्‍बास करैले नै छोर। तब हम तोरा जिबनके मुकुट देबौ।’

हिबरु 4:15

कथिलेत अपनासबके परधान पुजारी अपनासबके दुरबलतामे साथ नै दैबला पुजारी नै चियै। उ अपनेसब जखा सब बातमे परिक्‍छामे परलै महज तैयो पाप नै करल्‍कै।

गलाती 4:4

महज परमेस्‍वरके देल समय पुरा भेलाके बाद आपन बेटाके पठाइल्‍कै। उ जनिके कोखसे जलमलै आ बेबस्‍थाके अधिनमे जलमल छेलै।

युहन्‍ना 12:24

हम तोरासबके साँचोके कहैचियौ, जाबेतक गहुमके दाना माटीमे पैरके नै मरैछै ताबेतक उ एकटा दाना मातरे रहैछै। महज यदि उ मैरजाइछै त, बहौत फल फराइछै।

परकास 20:2

उ स्‍वरगदुत अजेगरके पकैरके एक हजार बरिसतक बाइन्‍हके राखल्‍कै। उ अजेगर सुरुके साँप या दुस्‍टके रजा आ सैतान चियै।

परकास 12:9

अहिनङे उ अजेगर, जे पहिन्‍का साँप चियै, जकर नाम दुस्‍ट आत्‍मा आ सैतान सेहो चियै, जे पुरे सन्‍सारके भरमाके राखने छेलै, ओकरा आ ओकर दुतसबके सङे स्‍वरगसे पिरथिबीमे फेक्‍नेछेलै।

१ तिमोथी 3:16

परमेस्‍वरके परकट करल सत्‍यके सन्‍देस अचमके चियै आ अकरा कोइ नै इन्‍कार करे सक्‍तै। खिरिस्‍ट मानब बैनके परगट भेलै आ पबितर आत्‍मासे धरमी ठहरल गेलै। स्‍वरगदुतसब ओकरा देखल्‍कै आ जाती-जातीके बिचमे ओकर बारेमे परचार भेलै। सन्‍सारमे लोकसब ओकरा बिस्‍बास करल्‍कै आ उ महिमाके सङे स्‍वरगमे उठ्‍यालगेलै।

मतीके लिखल सुसमाचार 25:41

“तकरबाद उ आपन बमा कता भेल्‍हासबके कहतै, हे परमेस्‍वरसे सराप पाबलाहा लोकसब। हमरसे दुर चैल जो! सैतान आ ओकर दुतसबके लेल तैयार करल कहियो नै मुझाइबला आइगमे चैल जो।

मतीके लिखल सुसमाचार 16:17

येसु ओकरा कहल्‍कै, “हे योनाके बेटा सिमोन, तु धैनके चिही! कथिलेत यि बात तोरा लोकसे नै बल्‍की स्‍वरगमे रहैबला हमर पितासे परगट भेलछौ।

१ कोरन्‍थी 1:28

अइ सन्‍सारमे आपनके महान ठानैबलासबके बेरथ बनाबैके लेल परमेस्‍वर निच आ तुच्‍छ ठहरल लोकसबके चुनल्‍कै,

हिबरु 2:17

ओहैसे सब बातमे उ आपन भाइ-भैयासब जखा बनैले आबस्‍यक छेलै। ताकि उ परमेस्‍वरके सेबामे दयालु आ बिस्‍बासयोग्‍य परधान पुजारी बन्‍लै आ लोकसबके पाप छमा दैकेलेल उ आपने बली भेलै।

हिबरु 10:5

अहैकारनसे सन्‍सारमे आबैतखिना खिरिस्‍ट परमेस्‍वरके अनङ कहल्‍कै, “अहाँ भेटी आ बलीसब नै चाहलियै, महज अहाँ हमर खातिर एकटा देह तैयार कैरदेने चियै।

हिबरु 10:10

कथिलेकी येसु खिरिस्‍ट परमेस्‍वरके इक्‍छा पुरा करल्‍कै। ओहैसे सबदिनके लेल एके चोटी आपन देहके बलिदान द्‍याके उ अपनासबके सब पापसबसे पबितर करल्‍कै।

१ पतरुस 1:20

परमेस्‍वर सन्‍सारके सिरिस्‍टी करैसे पैहनिए ओकरा चुन्‍ने रहै महज तोरासबके भलाइके खातिर अन्‍तिम समयमे उ परगट भेलै।