परेरित 3:6 - मध्‍य पुरविया थारू

⁶ तब पतरुस कहल्‍कै, “सोना चानी त हमरसङे नै छै, महज जे हमरसङे छै, ओह्‍या हम तोरा देबौ। नासरतके येसु खिरिस्‍टके नाममे उइठके चल!”

परेरित 3:6 Referans Kwoze

परेरित 3:16

येसुके सक्‍तिसे आ ओकर नाममे बिस्‍बास करलासे यि लोक निक भेलै जकरा देखरहलचिही आ चिन्‍हबो करैचिही। येसुमे करल बिस्‍बासके कारन यि लोक तोरौरके सबके सामने निक भेलौ।

परेरित 10:38

कनङ परमेस्‍वर नासरतके येसुके पबितर आत्‍मा आ सक्‍ती बिसेस रुपमे ओकरा देल्‍कै। उ कनङ भलाइके काम करैत गेलै, दियाबलसके सताबटमे परलहासबके निक करैत गेलै, कथिलेकी परमेस्‍वर ओकरसङे छेलै।

परेरित 4:10

तौरौरके सबकोइ आ इजराएलके सब लोकसबके थाह हेबे, कि तोरेसबके अगा येसुके कुरूसमे लटकेल्‍कै आ परमेस्‍वर मरलसे जिबित करल्‍कै, ओह्‍या नासरतके येसु खिरिस्‍टके नाममे यि लोक तोरासबके अगामे निक भ्‍याके ठारभेल छौ।

परेरित 9:34

पतरुस ओकरा कहल्‍कै, “ऐ एनियास, येसु खिरिस्‍ट तोरा निक करतौ। उठ आ तोहर बिछान मिला।” तब उ तुरन्‍ते उइठके ठार भेलै।

२ कोरन्‍थी 8:9

कथिलेकी अपनासबके परभु येसु खिरिस्‍टके अनुगरह तोरासबके थाहे छौ, उ धनिक छेलै तयौ तोरासबके लेल उ गरिब भेलै ताकि ओकर गरिबीसे तुसब धनिक बनैले सक।

परेरित 16:18

उ छौरी बहौत दिनतक ओहिनङ करैत रहलै। बादमे पावल एक दिन दिक्‍क भ्‍यागेलै तब ओकर दिसन घुइमके भुत आत्‍माके कहल्‍कै, “हम येसु खिरिस्‍टके नाममे हम तोरा आग्‍या दैचियौ, तु यि छौरीसे निकैलके चैलजो।” पावल यि बात कहैत मातर उ भुत आत्‍मा ओइ छौरीसे निकैलके चैलगेलै।

मरकुस 16:17

तब बिस्‍बास करैबलासब यि काम करतै- उसब हमर नाममे भुतसब भगाइतै, आन भसासब बोल्‍तै,

याकुब 2:5

हे हमर पिरिय भाइ-भैयासब, सुन। कि परमेस्‍वर सन्‍सारके गरिबसबके बिस्‍बासमे धनिक बनाके ओइ राजके हकदार हैकेलेल नै चुन्‍ने छै? ओह्‍या राज ओकरा परेम करैबलासबके उ दैले परतिग्‍या करनेचियै नै?

१ पतरुस 4:10

परमेस्‍वर तोरासबके किसिम-किसिमके बरदान देनेछौ। एक दोसरके सेबा करैके लेल देल यि बरदानके पुरा सदउपयोग कर।

परेरित 4:7

उसब पतरुस आ युहन्‍नाके महासभाके अगामे ठार कैरके पुछल्‍कै, “कोन सक्‍तीसे या ककर नाममे तोरौरके यि कामसब करैचिही?”

परेरित 2:22

“इजराएलके लोकसब, यि बात सुन, नासरतके येसु एहेन लोक छेलै, जकरा परमेस्‍वर सक्‍तिसाली कामसब, अच्‍चमके कामसब आ चेन्‍हासबसे तोरौरके अगा साबित करल्‍कौ। तोरौरके थाहे छौ कि परमेस्‍वर तोरासबके बिचमे यि सब कामसब ओकरसे कराइने छै।

परेरित 2:36

“तै खातिर इजराएलके पुरे खानदान निकसे जाने कि येसु जकरा, तोहेसब कुरूसमे लटकेल्‍ही, परमेस्‍वर ओकरा परभु आ खिरिस्‍ट बनाइल्‍कै।”

मतीके लिखल सुसमाचार 10:9

तुसब आपन बटुवामे सोना, चानी या तामके पैसो-कौरी नै बोक।

मतीके लिखल सुसमाचार 7:22

नियाइके दिनमे बहुतो लोकसब हमरा कहतै, ‘परभु, परभु, कि हमसब अहाँके नाममे अगमबानी नै बोललियै? कि हमसब अहाँके नाममे भुतसब नै निकाललियै? आ कि हमसब अहाँके नाममे बहुतो अचमके कामसब नै करलियै?’

२ कोरन्‍थी 6:10

सोकमे रहितोपरभी हरसमय आनन्‍दमे रहैचियै। गरिब रहितोपरभी बहुतोके आत्‍मिकी रुपमे धनिक बनाबैचियै। कुछो नै रहितोपरभी हमरासबसङे सब चिज छै।

युहन्‍ना 19:19

पिलातस एकटा दोस-पतरो लिखैले आ कुरूसमे टाङैले लगाइल्‍कै। उ दोस पतरमे एहेन लिखल छेलै, “नासरतके येसु, यहुदीसबके रजा।”

२ कोरन्‍थी 8:12

यदि तोरासबके दैके इक्‍छा छौ त, तोरासबसङे जे छौ, ओहैमेसे देल परमेस्‍वर सुइकार करैछै, महज तोरासबसङे नै भेल चिज परमेस्‍वर नै माङैछै।

मरकुस 14:8

यि जनी जे कुछ करे सक्‍तियै ओह्‍या करल्‍कै। यि हमर देह गारैसे पैहनैये गमकौवा अतर लग्‍याके तैयार कैने छै।

१ कोरन्‍थी 4:11

हमसब अखुन्‍तो भुखल आ पियासल चियै, फाटल-चिटल बस्‍तर पिन्‍हैचियै आ मार-पिट खाइचियै आ हमरासबके रहैबला घरो-दुवार नै छै।

परेरित 3:5

ओइसबसे कुछो मिल्‍तै से आसमे उ नजैर पसाइरके ओइसब दिसन ताकल्‍कै।

परेरित 3:7

पतरुस ओकर देहना हाथ पकैरके ओकरा उठेल्‍कै, तखुन्‍ते ओकर टाङ आ घुठ्‍ठीमे तागत एलै।