१ युहन्‍ना 1:3 - मध्‍य पुरविया थारू

³ हमसब जे देखने आ सुन्‍ने चियै, से हमसब तोरासबके सुनाबैचियौ जेकि तुहुसब हमरासबसङे सङगती करेसकी। अपनासबके सङगती त पिता आ ओकर बेटा येसु खिरिस्‍टसङे छै।

१ युहन्‍ना 1:3 Referans Kwoze

१ कोरन्‍थी 1:9

परमेस्‍वर बिस्‍बास योग्‍य छै। उ आपन बेटा, अपनासबके परभु येसु खिरिस्‍टसङे सङगतीमे रहैके लेल तोरासबके बोलाइल्‍कौ।

युहन्‍ना 17:3

अनन्‍त जिबन एह्‍या चियै कि, उसब अहाँ एक मातरे सत परमेस्‍वरके आ अहाँके पठाएल येसु खिरिस्‍ट चियै से जाने।

परेरित 4:20

कथिलेत जे बात देखने चियै आ सुनने चियै हमसब नै कैहके नै रहे सक्‍बै।”

युहन्‍ना 17:21

हम परथना करैचियै कि उ सबकोइ एक हेबे। हे पिता, जहिनङे अहाँ हमरमे आ हम अहाँमे चियै, तहिनङे ओहोसब अपनासबसङे एक हेबे, ताकि अहाँ हमरा पठाइनेचियै कैहके सन्‍सारके लोकसब बिस्‍बास करे।

फिलिप्‍पी 2:1

यदि खिरिस्‍टमे रहलाके कारन तुसब कुछ उत्‍साह पाबनेचिही, या ओकर परेमसे तुसब कुछ सानत्‍वना पाबनेचिही, या पबितर आत्‍माके संगती पाबनेचिही, या एक दोसरसङे परेम आ दया करैचिही त,

२ कोरन्‍थी 13:14

परभु येसु खिरिस्‍टके अनुगहर, परमेस्‍वर पिताके परेम आ पबितर आत्‍माके संगति तोरासबके सङे हैतरहे।

१ युहन्‍ना 1:7

महज परमेस्‍वर जहिनङ इजोतमे रहैछै तहिनङ हमसब इजोतमे चलैचियै त अपनासबके संगती एक दोसरसङे हैछै आ ओकर बेटा येसुके लहुसे अपनासबके सब पापसे सुध करैछै।

१ युहन्‍ना 1:1

सुरुवेसे भेल, हमसब आपने कानसे सुनल, आपने आँखसे देखल यि जिबन दैबला बचनके बिसयमे तोरासबके लिखैचियौ जकरा हमसब गौरसे देख्‍ने चियै आ आपने हाथसे छुबने चियै।

हिबरु 3:14

यदि अपनासब खिरिस्‍टमे करल सुरुके भरोसाके अन्‍ततक जोगाके राखबै त, अपनोसब खिरिस्‍टसङे साझा हकदार हेबै।

फिलिप्‍पी 3:10

हम खिरिस्‍टके औरो निकसे चिन्‍हैले आ ओकरा जियाइबला सक्‍तीके अनुभव करैले चाहैचियै। ओकर जखा दुख सहैले आ मरैयोले इक्‍छा करैचियै,

१ पतरुस 5:1

हम एकटा मन्‍डलीके एल्‍डर चियै आ खिरिस्‍टके भोगल दुख-कस्‍टके आपनेसे देख्‍ने चियै आ पछा आबैबला महिमामे सहभागी हेबै। ओहैसे हम तोरासबके बिचमे भेल एल्‍डरसबके बिन्‍ती करैचियौ।

हिबरु 3:1

ओहैसे परमेस्‍वरके बोलाबट पाबलहा पबितर जनसब, तुसब आपन धियान येसुमे लगा, जकरा अपनासब परेरित आ परधान पुजारी कैहके सुइकार करैचियै।

कलस्‍सी 1:13

वह्‍या अपनासबके अन्‍हारके सक्‍तीसे छुटकरा द्‍याके आपन दुलरुवा बेटाके राजमे आन्‍ने छै।

परेरित 20:27

कथिलेत हम परमेस्‍वरके सरा योजना सुनाबैले पछामाथे नै ताकलियौ।

१ युहन्‍ना 1:5

जे बात हमसब परमेस्‍वरके बेटा येसुसे सुनलियै से बात एह्‍या चियै कि, परमेस्‍वर इजोत चियै आ ओकरमे एकोरती अन्‍हार नै छै।

हिबरु 2:12

उ कहैछै, “हम आपन भाइ-भैया आ दिदी-बहिनसबके अहाँके नाउके घोसना करबै, हम सभाके बिचमे अहाँके परसन्‍सा करबै।”

१ तिमोथी 6:2

बिस्‍बासी भाइ-भैयासब त चियै कैहके दाससब आपन बिस्‍बासी मालिकके कम आदर नै करौक, बरु उसब औरो निकसे मालिकके सेबा करेपरतै, कथिलेकी सेबासे लाभ पाबैबला मालिकसब ओकरासबके आपने पिरिय बिस्‍बासी भाइ-भैयासब चियै। तु यि बातसब मन्‍डलीमे बिस्‍बासीसबके सिखा आ पालन करैके लेल उत्‍साह दहै।

फिलिप्‍पी 1:7

तोरासबके हम आपन हिरदयमे राखनेचियौ। तोरासबके बारेमे अनङ करनाइ हमरा ठिक लाग्‍लै कथिलेकी हम जहलमे रहैबेर आ बाहरमे रहैबेर सुसमाचार परचार आ अकरा जोगाइबला काममे परमेस्‍वरके देल अनुगरहमे तुसब हमरसङे सहभागी भेलचिही।

एफिसी 3:6

उ रहसके बात एह्‍या चियै कि, गैर-यहुदीयोसब सुसमाचारसे परमेस्‍वरके आसिस पाबैले सक्‍तै। उसब एक देहके अङसब आ खिरिस्‍ट येसुमे परमेस्‍वरके करल परतिग्‍याके साझेदार भेल छै।

१ कोरन्‍थी 1:30

परमेस्‍वरके कारन तुसब खिरिस्‍ट येसुमे चिही, परमेस्‍वर खिरिस्‍ट येसुके अपनासबके लेल बुधि, धरमी, पबितर आ पापसे छुटकरा दैबला बनाइल्‍कै।

१ थेसलोनिकी 1:10

तुसब त परमेस्‍वरके बेटा येसु जे स्‍वरगसे एतै कैहके बाट ताइकरहलचिही, जकरा परमेस्‍वर मरलसे जियाइल्‍कै उ येसु चियै। परमेस्‍वरसे आबैबला करोधसे अपनासबके बचाइबला ओह्‍या चियै।

१ कोरन्‍थी 15:1

हे हमर पिरिय भाइ-भैयासब, आब हम तोरासबके परचार करल सुसमाचारके बारेमे फेरसे याद कराइले चाहैचियौ, तुसब जे सुसमाचार गरहन करलिही आ तैमे अस्‍थिर चिही।

रोमी 15:27

उसब यि रुपैया-पैसा राजिखुसीसे जम्‍मा करने छै। बास्‍तममे यरुसलेमके गरिबसब बिस्‍बासीसबके मदत करैले उसब रिनी छेलै, कथिलेत गैर-यहुदीसब यहुदीसबसे आत्‍मिक आसिस पाबने छेलै। ओहैसे गैर-यहुदीयोसब ओइसबके अभाबमे परल बखत सहायता करनाइ उचित चियै।

परेरित 13:41

हे निन्‍दा करैबला लोकसब, देखके चकित हो आ नास भ्‍याजो! कथिलेत हम तोरे बखतमे एहेन काम करबौ, ओइ कामके बारेमे तोरा कोइ कहबो करतौ त, कहियो नै तुसब बिस्‍बास करबिही।”

परेरित 13:32

हमसब यि सुसमाचार सुनाइले एलचियौ, जे बात परमेस्‍वर अपनासबके पुरखासबके परतिग्‍या करने रहौ।

परेरित 2:42

उसब परेरितसबके उपदेस सुनैले, संगती, परभु भोज आ परथना करैले भक्‍तिसाथ लागल रहै।

युहन्‍ना 17:25

“हे धारमिक पिता, सन्‍सारके लोकसब अहाँके नै जानैछै, महज हम अहाँके जानैचियै आ अहाँ हमरा पठाइनेचियै कैहके यि चेलासब जानैछै।

युहन्‍ना 17:11

आब हम सन्‍सारमे नै रहबै, महज उसब त सन्‍सारेमे रहतै आ हम अहाँके लग आइबरहल चियै। हे पबितर पिता, अहाँ आपन नामके सक्‍तिसे एकरासबके रक्‍छा करु, जे नाम अहाँ हमरा देलियै, ताकि ओहोसब हम आ अहाँ एक भ्‍याल जखा एक हेबे।

युहन्‍ना 19:35

जे कोइ यि घटना देखल्‍कै से कोइ ओकर गबाही देनेछै आ ओकर गबाही सत छै। उ जानैछै कि उ सत बोलैछै ताकि तुसब बिस्‍बास कर।

२ पतरुस 1:16

जब अपनासबके परभु येसु खिरिस्‍टके सक्‍ती आ आगमनके बारेमे तोरासबके कहलियौ, से हमसब चलाकिसे तोरासबके कोनो बनोतरी बात-कथामे नै कहलियौ महज ओकर बरका महिमा हमसब आपने आँखसे देखने छेलियै।