Nodi Khoje Hatimare Mae Jiu 137:1 - Buka Blahi Ka Cheke Holo

^1-2 Kani au teku Babilon na, ghehati neke gnokro soru pari ka geri khoꞌu na neke diꞌanagnafa kolho. Aonu ghehati fagefe haghe nomi gitare ka grege gajure kligna ne tanhi nomi kolho, naugna ghehati neke ghatho fapulo Saion.

Nodi Khoje Hatimare Mae Jiu 137:1 Referans Kwoze

Profet Esikiel 1:1

Iara mae Esikiel, thugna mae Busi, eghuteuna iara kaisei mae pris. Ka falima narane ka fafati nhigra ka fatolufulu finogha, God neke tothora maloa na neke fakakhana ka iara keha glepo ka mifi. Ka narane tuana, iara au neu ka geri Khoꞌu Keba ka kantri Babilonia baludi keha naikno teke hata mare teke jifla kokodi nodi namonore teke mei au Babilonia.

Profet Esikiel 3:15

Iara ne thoke ka khoꞌu biꞌo Keba ka namono Tel-Abib, aheva te au teu naiknodi Israel. Iara tei ne au baludi nabagna fitu narane, naugna iara ne jana nogu ne theome keli gaoghathogu ka gobigna te filodi nei nomhidi teure.

Luku 19:41

Kate mei namo te filo laoni Jerusalem, mae Jisas ne kokhoni nognadi naiknogna namono tuana ne tanhi.

Lamentations 3:48

Iara tanhi fabiꞌo, eghuteuna kholodi tathagu re oro soru jateula khoꞌu biꞌo neu, naugna iagho ne goigonidi nogu naikno iara gre.

Lamentations 2:18

Ghotilo naiknomi Jerusalem ne eha tei ka Lord! Gringni thinagna Jerusalem, kholodi tathamu iagho are ginauna thofa soru jateula khoꞌu biꞌo eghu bongi narane! Te keli na iagho eghu fabrahu ghilei glaꞌe soru iagho.

Lamentations 1:16

“Naugna igne te tanhini fara iara na, eghuteuna kholodi phei tathagu iara re oro soru ka thinigu iara na. Eghuteuna theo kaisei naikno te au teu jare te mala farhetani gaoghathogu iara na. Mae naoka gre ulu ghau iara, eghuteuna nogu naikno iara re ne rhana nodi fara.”

Profet Jeremaea 15:17

Iara theome gnokro ka gaghamu baludi keha naikno te gleale'a koba balu maꞌe are. Nu leuleghu fata na, iara au fabrahu kolho thegu, naugna diꞌatamu iagho ranghidi naikno igre fodu ka iara.

Nodi Khoje Hatimare Mae Jiu 42:4

God, tifara iara neke batudi kmana naikno neke tei ka sugamu iagho na. Iara neke baludi mare neke tei balu glealeꞌa, balu khoje nei balu kilo fnakno nigho. Nu kate ghatho fapulodi iara glepo igre, gaoghathogu na iara tanhi nogu fara.

Nehemaea 2:3

ne cheke eghu ka king, “Iagho king fabrahu tifa tifa! Uve, iara diꞌanagnafagu fara, naugna nogu namono iara aheva teke giugiludi vikegu iara tagnara la groꞌehi. Eghuteuna grengathagna gringni thina na la gnhubrahi ka khaꞌaghi.”

Esra 8:31

Ka fabotho phei naranegna nhigra ulu lahu igne ghehati jifla ka khoꞌu biꞌo Ahava leghu nabrou ne tei mala tei posa Jerusalem. Eghuteuna God ne au balumi nei reireghi fakeli ghami neu ghehati ka naoka ba iheire te poru teu ka geri nabrou mala blau naikno ba falehe naikno.

Esra 8:21

Kate au teu ghehati ka gerigna khoꞌu biꞌo Ahava igne, iara ne cheke ka mae iheire te khapru teu ka vido igne mala thosei ghamu nei nhaꞌa fapari ghami themi ke ulugna God. Eghuteuna ghehati toreni mana mala batu ghami ka nabrou na nei reireghi fakelidi thumi nei nomi gobigna lepore.

Thakle 11:3

Eghuteuna ke lamnadi narane igre, iara ginauna tusu lao nolaghi ka phei nogu mae profet igre mala toutonuni phiamare chekegna God na. Phiamare ginauna pipichi pohe pipito teke hohoro ka khakla nanigot, fagaglana gna nodi diꞌanagnafa na.”

Profet Daniel 9:3

Iara theome ghamu, aonu iara ne pipichi ka pohe te thona, eghuteuna iara gnokro pari ke kligna nakrofu, fagaglana gna nogu diꞌanagnafa na. Aonu iara tarai ne cheke eghu ka Lord nogu God, “God, iagho nomi funei ghehati. Iagho thofno fnakno fara. Iagho tajini fabrahu nou nhaꞌa cheke teke eni iagho baludi nou naiknore. Eghuteuna iagho namhadi iheire te namha nighore, ba iheire te leghudi nou cheke re.

Lamentations 3:51

Kate filoni iara puhi biꞌo te thokedi goro gaꞌasegna namono Jerusalem, iara ne thofno diꞌanagnafagu fara ne tanhi fabiꞌo.

Profet Isaia 66:10

Ghotilo iheire te magnahagheni Jerusalem fara ra, ghotilo eha nei glealeꞌa eghu. Ghotilo iheire te tanhi nei diꞌanagnafa teu eigna namono igne ra, gognarona ghotilo glealeꞌa nomi fara tagna.

Profet Jeremaea 8:19

Iara nomhidi nogu naiknore la tanhi eghu fabiꞌo, ‘Jame Lord na theome king ka Thogele Saion. Naugna unha si mana te theome togho ghita tahati gnea?’ ” Nu Lord ne cheke eghu, “Naugna unha si ghotilo nogu naikno iara gre te pogho soru te tarai ka nodi god keha kantri delei igrea? “Iara diꞌatagu fara ka nafnata puhi te pogho soru te tarai ghotilo ka god nate theome togho ghami ghotilo igre.”

Profet Jeremaea 13:4

“Atha pohe teke foli iagho igne tei ka Khoꞌu Pera te namo ka nou namono iagho na mala pophoru lamna khora thina.”

Profet Jeremaea 51:13

Ghotilo naiknomi Babilonia te au ka vido te kmana khoꞌu nei dedei fara teu ra. Nu nomi narane ghotilo te mala au papara na la namo meihi.