Eksodas 14:21 - Buka Blahi Ka Cheke Holo

²¹ Aonu mae Moses ne tusu lao khamegna na ke kligna thongna, eghuteuna Lord ne fameini kaisei nuri biꞌo ke maghati ne nuri fabrahu bongi thongana na ne ghilei fnota pea thongna na ne khapra vido teke mamhara na.

Eksodas 14:21 Referans Kwoze

Profet Isaia 63:12

Mana neke tusu lao nolaghi biꞌo ka mae Moses. Eghuteuna mana neke fofota thongna na ka phei vido neke kasa nogna naiknore ka keha phile na, eghuteuna ka puhi igne mana ne atha nafnakno biꞌo te theo ka huigna.

Eksodas 15:8

Iagho diꞌatamu fara ne phanga lao ka thongna na, eghuteuna thongna na ne kogu kogu ne haghe posa kligna jateula bara neu. Eghuteuna khotogna nhorora na ne thuke.

Nodi Khoje Hatimare Mae Jiu 66:6

Tifa na mana neke fofota pea thongna biꞌo na neke khapra neke nonolo ka ghahe kolho neke kasa ka keha philegna khoꞌu na mae ku'eda tahatira. Ka narane tuare mae ku'eda tahatire neke thofno glealeꞌa fara ka unha teke edi mana igre. Eghume tahati glealeꞌa nei cheke fakelini eghu God.

Profet Isaia 51:10

Iagho neke fota pea nhorora biꞌo na neke khapra, aonu nou naikno iagho re neke eni kaisei nabrou ka khotogna nhorora biꞌo na mala kasa ka glose te moja.

Nodi Khoje Hatimare Mae Jiu 78:13

God neke alha pea thongna na ka phei vido neke fakegra haghe jateula phei gringni thina biꞌo neku, eghuteuna hata fakasadi nogna naiknore ka keha phile na.

Nodi Khoje Hatimare Mae Jiu 74:13

Ka nou nolaghi biꞌo iagho, nhorora na neke fnota pea, eghuteuna iagho neke aknu poaposa phaꞌugna vuavula na.

Nehemaea 9:11

Eghuteuna iagho neke fota pea thongna na neke eni kaisei nabrou mala kasa nou naiknore ka glose te moja. Nu iheire teke ngolho leghudi nou naikno iagho re, mare ne knoho ka thongna te mamhara jateula thina te plulu ka nhorora ra neu.

Josua 4:23

Naugna Lord noda God neke cheke ranghini khoꞌu na neke krango neke ghilei kasa neke gnafa naiknore. Khoꞌu na moja neu ne ghilei kasa ne gnafa naiknore ka keha phile na jateula teke eni Lord ka Thongna Ukru na ranghidi kuꞌeda tifa ra neu.

Nodi Khoje Hatimare Mae Jiu 136:13

Mana neke fofota Nhorora Ukru na ka phei vido. Mana ne namha ghita tahati tifa tifa.

Eksodas 14:16

Eghuteuna atha nou khodo ana mala tusu lao ke kligna thongna, eghuteuna thongna gne ginau na fnota pea mala tei kasa mae Israel gre kate khapra fari hoteidi phei gringni khoꞌu te au ka phei philedi are.

Profet Isaia 51:15

Iara nomi Lord, nei nomi God ghotilo. Nanghagu iara na Lord, mae ihei te au nolaghi fateote'o. Iara neke cheke ranghidi nhorora nei galo teu igre mala oa'ongha fabiꞌo.

Thoutonu Eigna Mae Job 26:12

God cheke ka nogna nolaghi mala snoto thongna na. Eghuteuna ka nogna glalase, mana aknu falehe nasava biꞌo te kiloi Rehab.

Mae Khuru 7:36

Aonu mae Moses ne batu fajifladi naiknore Ijep. Mana neke edi kofubobhoi nei fagaglana eghu jare, nei jaola ka Nhorora Ukru na, nei jaola ka namono nagou na phiatutu finogha.

Jenesis 8:1

God ne theome ghatho ihoni mae Noa nei glepo tautagu te au teu balugna mana ka vaka na. Aonu God ne kuru meini kaisei nuri ne mei ka nauthoglu gne. Eghuteuna khoꞌu na neke funu thugha soru pari.

Eksodas 7:19

Aonu, Lord na neke cheke eghui ka mae Moses, “Iagho nake cheke ka mae Eron mala loku haghe mana nogna khodo na ke kligna khoꞌu. Eghuteuna khoꞌu biꞌo te gnafa, jari te gnafa, grano te gnafa nei kholo te gnafa teu te au heva te heva ke lamnagna kantri Ijep na te ghilei posa ka baket nei botol teure ne kafe vuhai dadara.”

Eksodas 14:20

U khoveo igne ne toku tafru ne romno fara vido te au teu me Ijep re. Nu vido te au teu mae Israel gre ne phae neu ngala. Aonu ka bongi igne na hatimare mae Ijep gre ne theome tangomana te tei namo ka mae Israel gre na.

Josua 2:10

Ghehati nomhinihi thoutonu eimi ghotilo kate jiflami Ijep ia! Lord neke famojani Thongna Ukru na neke kasa ghotilo ka glose te moja. Eghuteuna ghehati jaola nomhinihi thoutonu eimi ghotilo te falehedi king Sihon ghe king Og, phei mae ka vikegna Amo te au ke maghati Khoꞌu biꞌo Jordan. Ghotilo neke falehedi phei mae igre baludi nodi naikno te gnafara.

Josua 3:17

Eghuteuna kate kasa mare na, hatimare mae pris kegra fabrahu neu fari hotei khoꞌu tela krango hi na ne ghilei kasa ne hui naiknore ka keha phile khoꞌu na.

Fapea Kings 2:8

Eghuteuna mae Elija hata koko nogna pohe brahu na ne lolhopo na ne proprosa pohe igne ka khoꞌu Jordan. Eghuteuna khoꞌu na ne fnota pea. Aonu khoꞌu na khapra ne kasa phiamare ka keha phile na.

Profet Isaia 23:11

Lord ngafa haghe khamegna na ke kligna nhorora mala goigonidi keha kantri igre. Mana cheke faheta mala mei mae naoka mala goigoni di namono nei vido mala poru teu ka kantri Fonisia.

Profet Isaia 43:16

Tifa na, iara Lord neke eni kaisei nabrou farihotei nhorora.

Profet Isaia 50:2

Kate mei iara na, iara theome filoni kaisei naikno jare. Kate eha iara na, theo kaisei naikno te cheke tughu na. Ba, na theome fakarhi ghami iara neu si ghotilo ia? Ba, ne theo kaisei nogu nolaghi iara te mala fakarhi ghami na neu si ghotilo ia? Filo si ghotilo, kate cheke kolho iara na nhorora biꞌo na ginau moja, khoꞌure ginauna jaola figri ke kaisei namono nagou, eghuteuna sasare ginauna kafe lehe.

Profet Isaia 63:13

Mana neke batudi nogna naiknore neke kasa mei ke pari thongna ka glose te moja na.” Eghuteuna naiknore chari faheta neke theome uka, jateula hose te chari ka namono nagou ra neku.

Profet Habaku 3:8

Lord, kate lhotidi iagho khoꞌu eghuteuna fofota thongna na teu igne, ba, iagho neke diꞌatamu ka ghehati sia? Theo! Kate mei toghodi iagho nou naiknore te mala uludi mae naokare, iagho neke mei jateula kaisei nou soldia nei hose nei chariot eghu.

Thoutonu Eigna Mae Job 38:24

Ba, iagho thokenihi vido aheva te jifla mei nakafli tagna na? Ba, iagho thokenihi vido aheva nara te haghe mei tagna na?

Nodi Khoje Hatimare Mae Jiu 148:8

Ghotilo nakhafli, nakhete, khoveo nei nuri blahi teu te leghudi nogna cheke Lord ra, ghotilo kilo fnaknoni mana.

Profet Isaia 44:27

Kate cheke iara na, nhorora nei khoꞌu biꞌo teu igre ginauna krango dofidi.