Solomon 8:6 - Godigo dwagi yai po buku

⁶ Nago ena deli naga godolo homu yao, te nago gasa we godolo homu me elamuo. Nago nogogo te gasa we nogo me me diągio. Nago ena naga nogo diąyąo. Magi baso meni. Eno godolo homu ebo nagede bomo mu eyu, tama eno haliga nagede bomonama hogodu, te isibogo bomogo bidi aiyaba elalubo tiwai ebao. Eno godolo homu ebo, te umabo digi mu yali, te isi bogoli dabo genuai mu ebo tiwai ebao.

Solomon 8:6 Referans Kwoze

Kraisgo Geme Dualali Sę Pedelabo Po Jonbolo Ola Mani 12:11

Tama te kibu sipsip wai aga isiyu aga kaneme gelebaso, tama dago ama dede augwaligo te dwai bidigo bomo aiyaba elaluai dao. Tama me augwaligo Godigo po gasa we bidibolo pusali, tama augwaligo te kolesaga yaligo me augwaligo te dwai bidigo bomo aiyaba elaluai dao. Tama te kolesaga ebadi augwaligo te homu yali, ‘Te Godigo po odobo hagela ebo bage augwaligo da eleyu da, teda te usu da, da wi egobeo,’ te homu yali. Tama te homu eyu, augwaligo augwali e tǫde bugagia bidabo te homu ebeo.

Aisaia 49:16

Jerusalem, eno nageba homu kone ebo me gegeda palogobeo. Eno nage noma bidi piksa nigali, tama eno nogo sawali si daide nago nogi dali piksa dali si asęani. Te sesemane sogo eno sulama, nage homu kone palobo dao.

Hagai 2:23

‘Te sę pedalobo sogo, Serubabel, nage eno saibao, eno sę bidio, tama nage te ena sę bidi mu gagawai ilaibao, tama nago te eno hani we bidi dabe augwali te nago bugagia tonaluagameo. Eno nage deli tama dąį ilaibao, tama nage deli tama te nogode holobo nai te ring gagawai tama te eno nogode bidagameo. Ena God, Genuai Bidi aga Tigidali Bomo Elalubo Bidi, eno po olama silalio,’ te po te tobolu bidi Serubabelbolo pusao,” Genuai Bidigo te profet bidi Hagaibolo wali.

Solomon 5:8

Te Jerusalem we dabe, te dagego eno abagi wali bidi subaso da, dagego te tiwai po dąų walama, agabolo wao, eno aga homu godolo mu elama, te eno nogo sągą dili kimi meni yai elalubo po walao.

Jeremaia 22:24

“Ena sesemane sogo bididubo Genuai Bidi, eno po dolo nage Jehoiakinba obao, te Jehoiakimgo ogwa, te Juda king dao. Te nage eno dolo nogode mubo ring me deli tiwai te eno nage godolo mu igi da, tagala, te eno nage sela sągi da.

Bugagia Bidibo Kolesagade Po Asęai Buku 6:34

Te haliga sębę dwai mu ebo bidi dabe, te augwaligo we dali te gasa bidigo me pagela piali. Te tama tiwai naga te wego bidigo haliga te dwai sębę mu elama, tama te bidigo yali te dwai sę wei ponoyu, tama agaba te dwai dene mu mawaibao. Te wego bidigo sębę te dęą sogobeo. Agai te agaba wiegi yai homu eyu, te sabo homu ebo kolesaga yabo homu me egobeo. Mu menio.

Godigo Nogi Ugwaba Sabo Tęąbi Po Wabo Buku Dabe 84:2

Ena tede bidabo homu wei mu ebao. Te eno homu kolesaga tigidaligo te nago be wei mu ebao. Te tigigo, me homu tigidaligo, eno te wiegi yai pemene ebo tęąbi po nageba obao, God te bidabo ula elalubo God dao.

Bomai Po 32:21

Augwaligo tibo god dabe wali pabo, teda augwali olo nai mu dao. Tama augwaligo te dwai kolesagago ena sębę elama, augwaliba wado homu emainu yali dao. Tama tialima, eno te bidi hani me deli, augwali nogi meni yai hani, te olo nai tiwai o augwali polobo bidi dabe tiwai, tama augwali eno tagala palama, tama te Israel dabe haliga tigi dolomainu elama, wado emainu tagala palaibao.

Godigo Sęba Tagala Palai Bidigo Po 21:13

Tama tiali goli, Polgo te po wei ponoyu te po wali, “Magi baso dage gela obawe? Dagego gela wagio. Tama dagego te homu sęgę ena magio. Suao, ena Jerusalemba pobao. Tama augwaligo ena kalabuside mubaso da, eno wi menio. Eno Genuai Bidi Jisasgo po pusa mobadi, augwaligo homugo ena elabo homu ebaso me, elemainao,” te po wai.

Godigo Nogi Ugwaba Sabo Tęąbi Po Wabo Buku Dabe 120:4

Te agai dage te ami bidi dabego poa pai enego enaibao, tama posolai sia te dage tigiba gea palaibao.

Polgo Si Wali Pas Timotiba Asęani - 2TI 2:19

Tiali goli Godigo mu po te bidigo dolobo usu egobeo. Te bomai be tuni ni pos tiwai bulalio, tama te dolalubao, te be peme egobeo. Tama te tuni ni posde hagea siyu asęani po te tiwai elalubao, “Genuai Bidigo aga we bidi digi bugagia koneani.” Tama te po me asęani elalubo, “Te Genuai Bidi nogi nogi eyu ‘Ena aga bidi dao’ po wabo tigidali bidi, augwaligo te dolo isiąwai kolesaga tudiba muao,” te po asęani elalubao.

2 Korin 11:2

Te gasa bidi dabe augwaligo te dagego Krais wali pabo kolesaga dolidali weyu, eno augwalide dwai homu ebo dao, te Godigo augwalide dwai homu ebo tiwai gilama. Magi baso meni. Bidigo aga penani sę munu me isąwai wiegi yai bidibo gesi wegi noma te bidi delibolo naga mabo tiwai, te eno dage te bidi deligo naga somainogo eyu sa muanio. Eno dage Kraisbolo maiabo homu ebo dao.

Polgo Po Pas Rom Dabeba Asęani 12:20

Te dwai sę wei munu me ponamuo. Te menio. Tiali goli, te Godigo po bukude wabo po tiwai, “Te nagebolo boi bidi ebo bidi aga nasi ebaso da, teda nago aga nai mao. Te aga ąį nogone ebaso da, teda nago ąį agabolo mao. Nago tama tiali da, teda agai yali kolesagade te nago aga hale ebo kolesaga mu ilaibao, tama te kolesagade ge naibao.”

Godigo Sęba Tagala Palai Bidigo Po 20:24

Tama augwaligo ena elama isilibo eno moni homu menio. Te magigo menio. Tiali goli, eno genuai homu mu Genuai Bidi Jisasgo enabolo mani sę bomo elama mu yaibao. Tama te Godigo da homu dene ebo sę, te dwagi yai po eno tigidali we bidibolo augwaligo konealumai hagede bugagia pusa mawaibao,” Pol agai te po wai.

Sekaraia 3:9

Megi da, eno masigi me gedu a naga olama si, te 7 yai te masigi selama, Josua pąde muaibao. Tama eno te masigide po me asęaibao. Tama deli sogo tama eno ena kantri we bidigo sęgę sela sąwaibao.

Bugagia Bidibo Kolesagade Po Asęai Buku 25:22

Te tiwai nago ebaso da, te nago aga yali kolesagade hale mu ilibaso, tama te Genuai Bidigo te nageba wiegi yai sę mu bugagia ilaibao.

Israel Hanigo Namba 25:11

“Te Finiasgo te si elalio, tama tibaso eno te Israel we bidi dali sębę menio. Magi baso meni. Agai homugo te Israel dabego te tibo godiba lotu wabo hagela mu yali. Agai bomogo augwali ena deliba naga lotu omainao olama bomo yali dao, te eno ena homugo emainao wali gilama tama. Tama tialima, eno tigidali we bidi mu dolai menio.

Ma Dobola Sali 28:21

Tama te nogo si olama sągągo si wali te tigidali masigi deli delide dagego te Jekopgo ogwa nogi deli deli te duga Israel hani tigidali dąį ela siyu, nogi asęsę pao.”

Godigo Nogi Ugwaba Sabo Tęąbi Po Wabo Buku Dabe 63:1

O God, nage eno God dao. Eno nage gegebo sę bomo ebao. Te eno homu ogwa waigo te nage dali bidabo homu godolo mu ebao. Eno tigigo me, te nage dali bidabo homu godolo yali, te bidi te wę meni yai wa pai bulude te wę nogonego sabo tiwai gilama yai.

Tuni Bidi Dabego Po Elalubo Buku Deli 11:18

Te bomai ami bidi selago te po odama, te augwali hogodama palio. Te Filistia dabego te Betlehem taun tomoba pabo sunumi tonalubadi goli, tagalao, te ami selago augwali sela sąnama peyu, Devitgo te po wali ulu ąį tugi palio. Tama augwaligo sela asama, Devit magasali. Tiali goli, aga te wę tuainu yali te aga hagela ebaso tubeo. Menio. Agai te selama, te Genuai Bidiba ofa tiwai eyu gelalio.