Sefanaia 3:1 - Godigo dwagi yai po buku

¹ Jerusalem, hobede ya, nage dolaibao, nago kolesaga Genuai Bidigo gedude dwai damua pai mu yalio. Nagede bidibo we bidi dabe augwaligo agai po sela sąbo dao. Tama augwaligo augwa hasi deli hani dali dwai sę ebo dao.

Sefanaia 3:1 Referans Kwoze

Jeremaia 6:6

Tigidali Bomo Elalubo Genuai Bidi, agai te po wai, “Dage ami dabe, te Jerusalem pąde ni dabe togolama, te tǫ dabe dali te bobobage obo pąde pesage holao, te daide dolalu, te taunba hwįagameo. Te taun aga dwai dene umabo somainao, magi baso meni, te taunde we bidi dabego te augwaligo abagi dabe dolobo sę mu ebo dao.

Aisaia 59:13

Dago te dena Genuai Bidi, God, nageba dwai sę yali, te dago nage tudiba munama, nago po sela sąwani. Dago nage dologode bidibo te hagela homu yai dao. Dago te gasa bage elaluama, te haniani hagoma kolesaga yali. Dago te gasa bage dabe tibo po ola mayu, po geagano bilama, haniani sunumi nigibo po wali.

Aisaia 30:12

Tama tibaso, Israel dabego God te Wiegi Yai Doloba Pai Kolesaga Naga Ebo God, agai e tama po wali, “Dagego eno dua dao wali po sela sąnama, tudi ola manio. Tama dagego te ili po olama, te dolobo kolesaga dage tau saiba homu ebo te mu dagego dąų walio.

Malakai 3:5

Tigidali Bomo Elalubo Genuai Bidigo te po wai, “Eno dagego kolesaga dagalainu asaibao,” wali. “Te polo tama eno te we sali tomode dolobo sę eyu, te pobi wabo bidi dabe po tų iliyu, te tibo po kotde pusuyu, te tonalubo bidi dabego te augwa sę bidi bugagia me abeligobeo, te we dabego tigidali doado bage sabo bidigo te muma sabo po weyu, te augwa bidi isai we dabego doado bage me siyu, te augwa aya isai wai dabego doado bage me sali, te bomai po boloyu te gasa tǫ kantridu asai bidi dabego nai me sali. Te tigidali bidi ena dologode me bidibeo, tama tibaso te eno augwali po tų ilaibao,” wai dao.

Sekaraia 7:10

Dagego bidi isai wilawe we dabe dali dwai sę me elamo dao. Me dagego wai puluba augwa aya isai wai dabe dali me dwai sę me elamo dao, te digibulu bidi dage dali bidagasali te we bidi dabe dali me dagego dwai sę me elamo dao, me te nai dabe habuge yai we bidi dali me dwai kolesaga elamo dao. Tama dagego duga deli hani bidi dabe dolainu homu elamo dao,’ eno te po mawai dao,” Genuai Bidigo enabolo wali.

Esekiel 22:7

Te Jerusalem taunde mena bidi me deligo te aga aya idago po dologoba me pabeo. Te dage dali bidibo gasa tǫ kantri bidi dabeba dagego dwai sę ebao. Te wilawe we dabeba te dagego dwai sę yali, te tiana wai dabeba me te tiwai dwai sę ebo dao.

Maika 2:2

Te dagego bidi me deligo gi sabo homu pesą eyu, dagego bomonama te siyu naga yaibao. Dagego te be sabo homu pesą ebaso da, dagego te siyu naga ebo dao. Dagego te tibo sę ebo kolesaga elama, te gasa bidi dabego be me, te augwa wąį nǫųde sali tǫ me, wi sabo dao.

Jeremaia 22:17

Tialima, nagade digi, naga homu elama, te nago sesemane sogo te tobage nai dabe pesa elama, tama nago te nai dabe sainogo tibo kolesaga ebao. Tama nago te magi dwai sę isąwai bidi dabe odolali elibao. Tama nago te we bidi elaluama, te augwaliba dwai sę ebo dao,” wali.

Aisaia 5:7

Te Juda we bidi, me Israel we bidi, te Genuai Bidigo Tigidali Bomo Elalubo Bidigo wain gi tiwai dao. Agai godolo mu elama, agai augwali bugagia mu tonalubo dao. Te we bidi dabego wiegi yai doloba pai kolesaga naga emaina homu ebo dao. Tiali goli, augwaligo dwai kolesaga ebo dao. Agai homugo augwaligo gasa we bidi dabe dali wiegi yai kolesaga emai homu ebo dao. Tiali goli, augwaligo gasa we bidi aiyaba elaluama, tama augwaligo augwali dali boi bidi homu kolesaga ebo dao. Tama te aiyaba elaluali we bidi dabego i wabo agai odali.

Pris Sę Ebo Bomai Po 1:16

Agai te ba hi nisi poabadi, te ba dogoni nai mubo tibu me te selama, te giliga pedalu badu alta te keli mubo badu muao.

Amos 4:1

Dage Samaria we dabego, te po odiąo. Dage mu nisalio, te Basan bulude elalubo wiegi yai bulmakau dabego nosai hauwa tulama, nisibo tiwai pedelali. Dagego te bomo kimi meni yai we bidi dabeba dwai sę ebo dao. Tama dagego te magi nai doado bage meni yai bidi dabeba sęgę menama, te dagego augwali dwasianu hobede me ebeo. Menio. Dagego te duga bidi tonalu, te augwaliba e tiwai i weyu, “Te tubo bomai ąį hauwa sesao. Da gęǫ page yaibao,” wabo dao.

Amos 3:9

Te taun Asdot king bidi bidibo pesage genuai bede bidalubo bidi dabeba, me te kantri tǫ Isipba i waliyu, te augwaliba te tama po walao, “Dage tigidali pelama, te Samaria hanu pąde elalubo bulu duba sisinigi pelama, te subigila tedelama bilalubo we bidi suao, te augwaligo ebo te tobage dwai kolesaga dabe sueibao.”

Esekiel 23:30

tama nageba te sęgę dabe pedelaibao. Nago te gasa tǫ kantri dabego tibo god dabe tigidali wali peyu, te naga digi eno gedude meda ilali, te penani we aga yali kolesagago meda ilibo tiwai yalio.

Esekiel 22:29

Te bidi dabego augwa abagi dabe wi ilama, te augwaligo mone doado bage bisigi elama sabo dao. Te augwaligo nai dabe me wi siyu ebo dao. Augwaligo te magi nai meni yai bidi dabe, me gasa tǫ kantri bidi dabe te Israelba bidagasali bidi me, augwali dolobo sę dwai mu ebo dao,” wali.

Jeremaia 5:23

Tiali goli, dage we bidi te gasagi yai mu ebao. Dagego enaba hagoma mu eyu, te duga homu kolesaga te mu tomaga sobao. Tama dagego ena tudiba munama, te tedela pabo dao.

Jeremaia 6:7

Dwai kolesaga sesemane te Jerusalemde pedalubao, te ulu wę sesemane sogo pedalubo tiwai ebo dao. Tama augwaligo te taunde doado bage dolama, te gasa we bidi dabe eliyu ebao, te eno suali, te bage hobedagia te keni eyu gasi me elalubo dao.