Polgo Po Pas Rom Dabeba Asęani 8:24 - Godigo dwagi yai po buku

²⁴ Magi baso meni, Godigo da ma selama, tama megi dago agade konealubo homu dąų olama tama agai da dali te wiegi yai sę mu nosali usu numainogo dago megi tonalubo dao. Tiali goli dago tonaluali nai te nosali dago subo si da, te dago aga ma tonalugobeo. Bidigo te nai me deli suali da, magi baso te agai ma tonalugowe? Te egobeo.

Polgo Po Pas Rom Dabeba Asęani 8:24 Referans Kwoze

Hibru 11:1

Te konealubo po dąų wabo kolesaga te e tiwai ebo dao: te da Godide tiąlubaso da, teda te da dwagi yai homu eyu asobo tonalubo naide da hania konebao, Godigo te nai dabolo mu mawaibao. Tama dago gedugo susiąwai nai digi, tede dago homu si isąbadi te dago homugo mu konealuai.

2 Korin 5:7

Menio. Tama megi da e tǫde bididubadi, dago dena homu tigidali agaba muyu tama aga dali bilibo dao. Dago gedugo aga susiąbadi tama tibo dao.

2 Korin 4:18

Magi baso meni. Dago te gedugo e tǫde subo nai dabeba dago tonǫlǫ me ebo meni. Te menio. Dago koneani, dago gedugo subo nai, te pęwadage sogo naga elaluaibao. Tama dago gedugo te susiąbo nai, te sesemane sogo bidada peyu, bidada paibao. Tama tibaso, te tobage naiba naga dago dena gedugo tonǫlǫ ebo dao.

1 Pita 1:21

Tama tiyu, Godigo aga te gų pagede ma hodolama, agabolo genuai ula yai nogi mawai dao. Tama tiwai ebaso, agadu dagego duga homu tigidali Godiba muyu agade mu dąų wali. Tama duga homu tigidali Godiba munama, tama agai dage dali wiegi yai sę yabo sogo dagego dwagi yai homu eyu tonalubo dao.

1 Tesalonaika 5:8

Tiali ma, da ulade bidibo bidi dao. Tama tibaso, dago homu kolesaga wiegi yai mu elama bidinao. Te hwįbo bidi aga hagawiade te boi bidigo elidali weyu mubo nai tiwai, tama dago Godide konealubo po bugagia selama, we bidi dali dwagi yai homu ebo kolesaga eyu, bugagia bidinao. Tebo sę si te dago hagawiade muabo dila pai nai tiwai dao. Tama Godigo da ma sabo homu bomo eyu, agai te sogo da somainogo dago tonaluinao. Tama te homu kolesaga tiwai, te dago tobolude muabo dila pai kapa madi tiwai dao, te hwįbo sogo da tau somainogo.

1 Pita 1:3

Te dago dena Genuai Bidi Jisas Kraisgo Aya God aga nogi dago ugwaba sinao. Agai da moni homu dene mu eyu, tama da tau somainogo, agai Jisas Krais te isai bidi dabe bidibo digi tomodu ma hodolali. Tebogo dabolo te gesi noma ula mawai. Tama menama, da dwagi yai homu eyu, bugagia tonaluyu bidalubao.

Polgo Po Pas Rom Dabeba Asęani 12:12

Dagego agade konealubo po dąų olama, tama Genuai Bidigo dage tau sabo tonalubadi tama dagego wiegi yai homu pemene dali yao. Te sęgę dageba pedalobaso da, teda dage bomo elama bugagia dolaluao. Dagego tigidali sogo gedu haluasa po wao.

Polgo Po Pas Rom Dabeba Asęani 5:2

Aga me agaduba deligo da megi te bidibo te wiegi yai olo tau mabo kolesaga tomoba pomainogo tų dalalio. Dago agade konealubo po dąų weyu, tama agai te tų tama dalama, tama Godigo dabolo aga genuai nogi tiwai genuai nogi me maiabo sogo asobo dago tonalubao. Tama te asobo sogo tonalubadi dago wiegi yai homu pemene ebo dao.

Polgo Po Pas Rom Dabeba Asęani 15:13

God da, aga te dago homu agaba tialuama tama dwagi yai homu eyu te agai dabolo nosali yabo sę tonalubo kolesaga page bidi dao. Tama eno gedu haluasa po weyu tama wabo dao, “God, te Rom bulude bidibo we bidi augwaligo nageba te konealubo po dąų wali dao. Tama tebogo nago augwali wiegi yai homu pemene genuai elama, tama nagame yai homu te augwaliba pedalama tama pągąnalumainogo yao, te eno homugo dao. Tama nago Tedali Mobo Bidigo bomogo augwali tau siyu tama augwaligo te nago nosali yabo sę bugagia tonalubo kolesaga te geninama mu pedalomainao,” eno te tobage po te Godibolo hanalu wabo dao.

Kolosi 1:27

Te Godigo homu e dao: agai aga polobadu dulaluai po agai we bidi mu augwalibolo hania hanilaibao. Tama te dulaluali pogo te gasa hani we bidi tigidali tau sabo po dao. Te dulaluali po wiegi yai mu dao, te bomo yai ula umabo elalubo po dao. Te dulaluali po page e dao: Krais aga digi dage deli delide hodobo bidibao, tama aga tama bidibaso dagego Godigo bomo yai ula dali, genuai nogi dali, bomo dali te meba saibao, tama tede dagego dwagi yai homu eyu bugagia tonalubo dao.

Polgo Po Pas Rom Dabeba Asęani 15:4

Godigo po tigidali augwaligo polobadu asęani, te augwaligo te po dabolo te wiegi yai bidabo kolesaga ola momainogo asęanio. Tama dago te asęani po nededu geyu, tama tede dago te haniani sęgę tolabo bomo dali, te dwagi yai po mobo mabo po dali somainogo eyu augwaligo te po asęani. Tama dago te bomo me te mobo mabo po me te bukude asęani pode selama, tama dwagi yai homu eyu, dago te Godigo da dali yabo wiegi yai sę bugagia tonaluaibao.

Galesia 5:5

Tiali goli dago da te gasagi yai homu kolesaga tedali sabo dao. Tama dago e homu ebo dao: God agai Mobo Bidigo da tau siyu, tama dago homu Godide dąų wabo dao. Tama te tiwai elaluyu, dago aga tonaluyu, agai da doloba pai we bidi da omainogo bugagia bidibo dao.

Godigo Nogi Ugwaba Sabo Tęąbi Po Wabo Buku Dabe 146:5

Te bidi me deligo te Jekopgo Godiba homu kęą pelama, te agai aga tau siyu, te God dali kęą pelama, te aga Genuai Bidi da homu eyu da, teda aga pemene emainao.

1 Jon 3:3

Tama te augwali Krais tiwai pedalobo sogo bugagia tonaluyu bidibo we bidi tigidali, augwaligo magi sę isąyu dwagi yai naga tedali gagabo dao. Magi baso meni, augwaligo koneani, te Krais me aga magi dwai sę isąyu dwagi yai naga tedali bidibo dao.

2 Tesalonaika 2:16

Te dago Aya God agai da dali dwagi yai homu eyu, da godolo mu ebo dao. Tama tiyu, agai da olo mu tau siyu, dago homu kolesaga dwagi yai eyu, sesemane sogo bidada paibao. Tama agai da olo mu tau siyu, tama Godigo da nosali bugagia bidimainogo yaibao, da tonaluyu bidibo dao. Tama dago homugo dago Aya God dali, dago Genuai Bidi Jisas Krais dali, augwali sigo dagego homu kolesaga bomo dąų walomainao, tama dage tau sao, dagego tigidali dwagi yai kolesaga eyu, tama dwagi yai po naga omainogo yao. Dago homugo tama timainogo ebao, tama tibaso dago gedu haluasa po obao.

Kolosi 1:23

Tialima dage, dagego bomo elama, te Godigo gesi dwagi yai pode homu kęą pai we bidi bidiyu tama dolaluao. Te bugagia sę yai be aga tǫba tuluali ni tigi augwali te tǫde mu dąų obaso, te be peme egobeo. Te tiwai me dagego duga homu agai pode kęą pai we bidi bidao. Dagego polobadu te po odoyu, tama te Godigo dagebolo nosali maiabo naide dagego dwagi yai homu eyu tonalubo gagalali. Megi dage te tonalubo kolesaga tagaligio. Te gesi dwagi yai po augwaligo tigidali tǫde we bidibolo pusigi pai dao, tama ena Pol, ena te gesi dwagi yai po pusubo sę ebo bidi pedalai dao.

Kolosi 1:5

Te mu po, te Godigo gesi wiegi yai po, te po pusubo bidi hasia sogo dage bidibo digi sabolali sogo, te sogo dagego te po odama, tama dagego koneani, te nosali Godigo dage dali dwagi yai sę mu yaibao. Te tama odama, tama dagego tede dwagi yai homu eyu, bugagia tonalubo dao. Dage tama tonalubaso, dagego Kraisde konealubo po dąų olama, tama Godigo we bidi tigidali dali dwagi yai homu eyu godolo ebo kolesaga ebo dao. Tama te Godigo dage dali nosali yabo dwagi yai kolesaga page te Godigo aga bidibo digide bugagia tonalubo dao, te dologobeo.

1 Korin 13:13

Tama te sogo asisąbadi, te kolesaga sela sesemane sogo elalubao, te homugo kęą pabo kolesaga dali, te dwagi yai homu eyu bugagia tonalubo kolesaga dali, te we bidi dali wiegi yai homu eyu godolo ebo kolesaga dali, te augwali sela sesemane sogo elalubo dao. Tiali goli te kolesaga selade te polalubo kolesaga me deli, te gasa bidibolo wiegi yai homu eyu godolo ebo kolesaga elalubo dao.

Sekaraia 9:12

Dagego koneani, te Genuai Bidigo dage tau saibao, tibaso dage te duga page buluba ma aselama, te dage bugagia bidaibao. Dage te sęgę genuai tolali, tiali goli eno te tiwai po obao, eno dage wiegi yai bugagia ilama, tama eno te ebo wiegi yai kolesagago te sęgę aiyaba mu elalueibao.

Jeremaia 17:7

“Tiali goli, bidigo konealubo bomai po Genuai Bidi, enaba elama, tama eno naga aga tau sabo te homu konebaso da, teda eno te bidiba wiegi yai sę bugagia mu yaibao.

Godigo Nogi Ugwaba Sabo Tęąbi Po Wabo Buku Dabe 33:18

Tiali goli, odao. Genuai Bidigo te aga dologode bidibo we bidi tonalubo dao. Awe, te agai te da godolo ebo kolesaga ebo siligobeo homu ebo we bidi, te augwali agai bugagia tonalubo dao.

Godigo Nogi Ugwaba Sabo Tęąbi Po Wabo Buku Dabe 33:22

Genuai Bidi, dago konealubo homu dąų olama, tama nago da tau sabo tonalubao. Nago te olo tau sabo wiegi yai kolesaga daba sesemane sogo yao.

Bugagia Bidibo Kolesagade Po Asęai Buku 14:32

Te dwai sę ebo bidi dabe te augwa dwai kolesagago digi te dolobao. Tiali goli, te doloba pai bidi dabe te magi nai me delide homu si me egobeo. Te augwa isibo sogo pedalubo si da, te augwa konealubo po te me dąų elalueibao.

Polgo Po Pas Rom Dabeba Asęani 4:18

Abrahamgo Godigo te sę yaibao po wabo tų te agai me susiąbadi, tiali goli agai konealubo po mu dąų weyu, te tų suai bidigo ebo tiwai yalio. Tama aga te bidi hani hauwago wąį monu bidi pedelali, te Godigo wali po tiwai yalio, “Te nago bulai wai hani dabe e tiwai geninama tama pedalaibao,” te po wai dao.

Polgo Po Pas Rom Dabeba Asęani 8:20

Megi e sogo tigidali nai dabe dwai bidiyu tama dolobao. Te augwa homugo digi me ebeo. Menio. Godigo digi augwali te tiwai kalabus elama bidibo. Te augwaligo te Godigo augwalibolo nosali yabo sę tonaluyu bidibo dao.

Taitus 3:7

Agai homugo da aga gedude doloba pai we bidi pedaliyu, tama te da tonalubo bidada pabo ula dago mu somainogo eyu agai dabolo aga Mobo Bidi mawai dao.