Polgo Po Pas Rom Dabeba Asęani 4:11 - Godigo dwagi yai po buku

¹¹ Aga te tigiwali togosiąbadi, tama agai Godide konealubo po dąų obaso, tama Godigo aga doloba pai bidi nogi wai. Tama nosali te sa muyu, te tigiwali togobo kolesaga mayu tebogo Godigo hania hanilali, te agai Abraham te doloba pai bidi nogi polali dao. Abraham agai hasia tama tilama, tama nosali gasa bidi dabe augwa tigiwali togosiąbadi goli, te Godigo augwalibolo te doloba pai bidi nogi omainogo eyu, tama augwaligo Godide te konealubo po dąų wai. Tama Abraham aga te kolesagade polasa pai bidi dao, tama augwali nosali wali asai. Tama tibaso aga da augwaligo hasia wąį monu bidai.

Polgo Po Pas Rom Dabeba Asęani 4:11 Referans Kwoze

Polgo Po Pas Rom Dabeba Asęani 3:22

Te bidi doloba pai bidi ilibo kolesaga e dao: te bidigo konealubo po Jisas Kraisde dąų wali bidi, aga Godigo doloba pai nogi poaibao. Tama tigidali haniani we bidigo konealubo po dąų obaso da, Godigo augwali doloba pai we bidi nogi waibao. Magi baso meni, te Juda hani bidi doloba pai bidi ilibo kolesaga, te Juda hani isąwai bidi doloba pai bidi ilibo kolesaga tedali tedali meni.

Dwagi Yai Gesi Po Lukgo Asęani 19:9

Te Jisasgo te bidi Sakiusgo wali po odama, tama Jisasgo te po wali, “Megi tama Godigo e bede bidibo we bidi tau mayu, ma sali. Magi baso meni. E bidi da te polobadu bidali nogi yai bidi Abrahamgo ogwa mu dao. Polobadu Abrahamgo Godigo wali po odama, agai mu koneani, tia sali. Megi me, eno wali po odama, nago mu konealualio, tia sali.

Hibru 11:7

Te Godigo te bidi Noabolo po weyu, “Te nago gedugo susiąwai nosali pedalabo sęde dua yao,” te po wai. Tama te bidi Noa agai Godide tiąluama tama konealubo po dąų obaso, agai te Godigo agabolo te aga gedugo susiąwani naide pusali po bugagia odali. Tama te po wali peyu, tama agai te moni geba me deli nigai. Tama tiyu, aga dali, aga we wai puluba augwali te geba tomoba pelama, tama bugagia bidali, tama augwali me dolobeo. Te geba sę tama ebogo Noago te tǫde we bidi tigidali augwaligo dwai sęde po tų ela mabo tiwai yalio. Tama te bidi Noa aga Godigo wali pode tiąlubo kolesaga elalualigode Godigo Noa te doloba pai bidi da wali, te Godigo tigidali konealubo po agaba dąų wabo we bidi dabe dali ebo kolesaga yalio.

2 Korin 1:22

Agai aga dąį iliyu daba sa muani, tama dago homuba Tedali Mobo Bidi mawai. Godigo te da dali gasa wiegi yai sę nosali yabo homu eyu, tama te Mobo Bidi hasia dabolo mani, tama dago te koneao wai: mu tama agai te tigidali wiegi yai sę da dali mu yaibao.

Filipai 3:9

Eno homugo ena aga dali wadoloyu tama homugo mu kęą paibao. Polobadu eno e homu eyu bidai dao: eno te Juda bagego bomo yai po dolo mu bugagia wali peyu da, teda Godigo gedude ena doloba pai bidi pedalaibao. Tiali goli megi eno te homu ebo menio. Eno Kraisde konealubo po dąų olama, tama Godigo ena doloba pai bidi nogi yai dao. God aga digi te Kraisde konealubo po dąų wabo bidibolo te doloba pai bidi nogi nogi ebo dao.

Efesus 4:30

Tialima dagego tisiąwani da, dwai meda yai po weyu da, teda dagego te Godigo Mobo Bidi dwai homu dene mu ilaibao. Tama te dwali dao. Te Godigo Mobo Bidi aga wiegi yai tedali mu dao. Tama God agai dage ma dobola sai hagede te dage hagea siyu sa mumainogo eyu agai dagebolo aga Mobo Bidi mawai dao. Tama te Godigo Mobo Bidi dage dali bidibaso, dagego mu konebao, te God agai dage olo mu bidabo bidi nigilabo sogo te nosali mu pedalaibao. Tama tibaso, dwai po weyu aga dwai homu dene mu iligio.

Efesus 1:13

Te dage me, dage Juda hani isiąwai we bidi, te mu po pusubo dagego odai, te Godigo wiegi yai pogo dage ma sabo po dao. Tama dagego te po odama, tama dagego konealubo po Kraisde dąų wai dao. Tama dage Krais dali wadolama bidibaso, tama God agai dage hagea siyu, sa mumainogo tama aga Mobo Bidi dagebolo mawai. Polobadu agai po weyu, te Mobo Bidi dabolo mawaibao po aga homugo wai dao.

Galesia 6:16

Tama eno homugo te eno megi tamadi wali po wali pabo we bidi tigidali, te Godigo augwalide homu dene eyu, tau sao, augwali moni homu isiąma bugagia bidimainogo yao. Tama te tobage we bidi augwali te Godigo dią sali Israel we bidi hani mu dao.

Galesia 5:5

Tiali goli dago da te gasagi yai homu kolesaga tedali sabo dao. Tama dago e homu ebo dao: God agai Mobo Bidigo da tau siyu, tama dago homu Godide dąų wabo dao. Tama te tiwai elaluyu, dago aga tonaluyu, agai da doloba pai we bidi da omainogo bugagia bidibo dao.

Galesia 3:29

Tama tiyu, dage Krais aga dali wadolama, tama dage agai hani we bidi bidibaso, te dage Abrahamgo wai me bidibao. Tama tibaso, te polobadu Godigo Abrahambolo sa muyu sagameo wali te hagea sali nai, te nai dagego sabo bidi dabe dao. Godigo dage ma dobola sai dao.

Galesia 3:22

Tialima, te tobage bomo yai po elalubo menio. Tama te Godigo po bukude augwaligo te po asęani, “Te tigidali tǫde bidibo we bidi augwaligo Godigo bomo yai po boludubo dao. Tama te kolesaga ebogo augwali mu dagana selama, tama augwali te sę tomode kalabus bidi tiwai dao,” te po asęani. Tama te asęani po odama, tama dago koneani, te bomo yai po wali pabo tų te usubeo. Tama tibaso, te pabo tų me deli naga elalubao. Godigo polobadu te po wai, “Niwai we bidigo homu kolesaga Jisas Kraisde dąų wabo we bidi eno augwali dali te doloba pai bidi da waibao,” te po dąų wai. Tama da dena homu tigidali agaba muyu da, teda da doloba pai we bidi te Godigo gedude pedalaibao.

Galesia 3:7

Tama tibaso, dagego bugagia koneao, te Godigo wali po odoyu, te poba augwa homu tigidali mubo we bidi, augwali naga te Abraham aga hani we bidi mu dao. Te dagebolo te homu bega sabo po wali bage, augwaligo geda muyu te homu ebo da, ‘Abraham aga bulai wai dabe augwali da te aga hani we bidi mu dao,’ augwaligo te homu ebao. Tiali goli te mu menio.

Polgo Po Pas Rom Dabeba Asęani 10:11

Tama Godigo po bukude te sęde te tama po wai dao, “Te bidigo konealubo po agaba dąų obaso da, teda aga hale me sogobeo.”

Polgo Po Pas Rom Dabeba Asęani 10:6

Tiali goli te bidigo Godide konealubo po dąų obaso tama Godigo aga doloba pai bidi nogi wabo kolesaga, te kolesagade augwaligo polobadu tama asęani, “Nago naga homude te po olamuo, ‘Te agai dabolo Godigo po pusumainogo, te Krais edaba sela dulamainogo eyu, de te dagaluba pogowe,’ te po olamuo,” te po asęani.

Polgo Po Pas Rom Dabeba Asęani 10:4

Dago koneani, te bomai po wali peyu tama Godigo bidi doloba pai bidi nogi pobo tų, te tų te Krais asali sogo silali. Megi te gesi tų elalubao. Te Kraisde konealubo po dąų wabo we bidi, te Godigo augwali doloba pai we bidi nogi poaibao.

Dwagi Yai Gesi Po Jongo Asęani 6:35

Jisasgo augwalibolo te po wai, “Ena digi ena bidabo bomo mabo bret dao. Bidi agai homu enaba muyu, ena pageba asobaso da, te bidi aga nasi munu me egobeo. Tama bidigo aga homu tigidali enaba mu baso da, te bidi aga ąį nogone munu me egobeo,” Jisasgo te po wai.

Kraisgo Geme Dualali Sę Pedelabo Po Jonbolo Ola Mani 9:4

Tama augwaligo te kuli mano nai dabebolo te po wai, “Dagego te noswai dabe me, te ni me deli me, te tǫde pedalobo haniani nai dabe me, te nai dabe tigidali dologio. Dagego te bidi dabe augwaligo gebode te Godigo sa muani nai musiąwai bidi augwalibolo naga dene mao.

2 Pita 1:1

Ena da Saimon Pita dao, te bidi Jisas Kraisgo sę ebo bidi dao, te ena agai tagala palai bidi me deli dao. Tama eno e pas asęna dagebolo tolobao. Te Jisas Krais aga te dago God dao, te aga da te da ma dobola siyu dwagi yai buluba muabo bidi dao. Tama aga doloba pai bidi mu bidiyu, tama da tigidali dali deli homu naga elama, tama agai te dagebolo te agaba duga homu tigidali muabo kolesaga mawai dao. Tama te dagebolo mani kolesaga te agai dabolo mani kolesaga tiwai si dao, te wiegi yai dila pai kolesaga mu dao.

Polgo Po Pas Rom Dabeba Asęani 9:30

Tama tibaso dago koneani, te gasa hani dabe augwaligo te doloba pai bidi nogi sabo sę dene me ebe, tiali goli augwaligo te doloba pai bidi nogi salio. Te e doloba pai kolesaga te augwaligo konealubo po dąų olama sai.

Polgo Po Pas Rom Dabeba Asęani 9:6

Te eno hani Juda bage augwali hauwago Krais tudiba muai goli, te Godigo polobadu dąų wali po te olo hagabo tiwai me egobeo. Menio. E tiwai dao, te Jekop aga nogi me Israel, te bidi aga hanide pedalali bidi augwali tigidali te Godigo hagea sali Israel dabe mu me ebo meni.

Dwagi Yai Gesi Po Jongo Asęani 8:33

Tama augwaligo Jisasbolo te po wai, “Woo, da Abrahamgo hani dao. Te tebo side bidi deligo da hani olo sę ebo bidi te nigilama munu me bidai menio. Magi baso nago te po obawe, ‘Dage te nogo dąų wali kolesaga tagalama, tama dage olo mu bugagia bidaibao’ po magi baso obawe?” augwaligo Jisas dali te po wai.

Dwagi Yai Gesi Po Jongo Asęani 6:47

Eno mu po dagebolo obao. Bidigo enabolo aga homu dąų olama, enaba tialubo bidi, aga bidada peyu, bidada pabo bomo selama, mu bidaibao.

Dwagi Yai Gesi Po Jongo Asęani 6:40

Eno Aya agai homu tama telalubo, aga ogwa osola suyu, agabolo bomo yai homu dąų olama muyu yai we bidi tigidali te augwali bidada peyu bidada pabo bomo selama, mu bidaibao. Tama augwali eno te tǫ dali dagalu dali silibo sogode augwali eno digi ma hodolaibao, ma bidimainogo,” Jisasgo te po wai.

Dwagi Yai Gesi Po Jongo Asęani 3:36

Niwai bidi agai homu tigidali te Godigo Ogwaba mubaso, te bidigo bidabo bomo da bidada peyu, bidada paibao. Tialima, niwai bidigo Godigo Ogwago po wali pisąbaso da, te bidi aga bidabo bomo me sogobeo. Menio. Godigo sębę te bidide elalua paibao.

Matyu 16:16

Tama Saimon Pitago po wei ponoyu, te po wai, “Nage da, nage te Godigo te we bidi tau sabo sa muani bidi Krais dao, te nage bidibo ula elalubo Godigo Ogwa dao,” Pitago te po wai.

Matyu 8:11

Eno dagebolo obao, te sia pedalobo badu me, te sia aiyaba dega sigi pabo badu me, te si badu te we bidi hauwa aselama, tama augwali te polobadu e tǫde bidali bidi te Abraham me Aisak me Jekop te bidi dabe dali deliba dualama, tama dagalude te Godigo we bidi tonalubo madi tomode bidiyu moni nai tueibao.

Esekiel 20:20

‘Dagego te haniani Sabat bodolu side bugagia homu kone palama, te gasagi yai tedali sogo da homu eyu, te eno bodolu side tiwai mu dąį ilao. Te bodolu side te eno dage dali bomai po dąų walobo dąį tiwai yali. Dage te bodolu side toma neyu, tama dagego te tiwai bugagia koneama, ena digi ena God, dagego Genuai Bidi da,’ eno te po wai dao,” wali.

Esekiel 20:12

Tama eno te Sabat side bodolu muani, te eno po dąų walobo dąį tiwai augwali dali yali. Augwali te side toma neyu, tama augwa te tiwai konemainu yali, ena Genuai Bidigo eno augwali ena wiegi yai we bidi dabe pedalubo sę yalio.

Bomai Po 30:6

Tama Genuai Bidi dago God agai dage hauwa mu pedalomainu elama, tama nai dabe hauwa mu elalumainu yaibao, te duga polobadu bidali wąį dabe edelama elalueibao. Tama agai dage me duga wai puluba dabe dage homu kolesaga hasegelama, tama gesi noma bidi ma pedalomainu yaibao. Tama dagego agai po sese wali mu paibao. Tama tiyu, dagego duga homugo sese aga godolo mu yaibao. Tama dage te tǫde tigidali sogo mu bidaibao.

Ma Dobola Sali 31:17

Te side te po dąų wabo tiwai elama, te ena tomode me te dage Israel bage dali te po sesemane sogo elalua paibao. Magi baso meni, ena Genuai Bidi eno te dagalu de tǫ si nigali, te 6 te tama sogo nigilama, tama te 7 wali, te me deli sogo eno te sę tigidali tagalama, tama ena toma tuyu, olo bidai dao.”

Ma Dobola Sali 12:13

Tama dagego te be pilali kaneme te dagego dąį tiwai elaluaibao. Tama eno te Isip bage augwali dene ilibo sogo, eno te kaneme sulama, tama eno dage ela soaibao.”

Polgo Po Pas Rom Dabeba Asęani 9:33

Te tiwai po me deli te Godigo po bukude polobadu asęani, te po e tama wai, “Odao. Te Saion hanude eno te bidi sągą dani tuą palama tulaluabo masigi me deli mubao. Eno te bidi me deli tede mubao, tama we bidi augwaligo aga dali dwai homu yaibao, te augwali dani tuą palama tulaluabo masigi tiwai dao. Tama tiali goli we bidigo agaba konealubo po dąų wabo bage, agai augwali tau mu sabo usu mu yaibao, te augwali tulaluama hale me sogobeo,” te po asęani.

Tigidali Nai Gagalama Nigali Side 17:24

Abrahamgo kibu be te bidi sese a naga wabo pąde deli, te 99 kibu be elalubadi, te aga ogwa Ismaelgo kibu be te nogo si olama, sągą badu sela kibu be yai madi, tama augwaligo augwali si tigiwali togwai dao.

Godigo Nogi Ugwaba Sabo Tęąbi Po Wabo Buku Dabe 47:9

Te haniani we bidi hanigo te tobolu bidi dabe augwali te Abrahamgo God wali pabo we bidi dabe dali sisinama, bidibao. Godigo bomogo te tigidali ami dabego bomo aiyaba elalubo dao. Aga te polalubo king dao.

Dwagi Yai Gesi Po Jongo Asęani 3:33

Tialima, niwai bidigo agai te po selama, dąų wali da, agai te po usu da waibao, God agai mu po naga wabo dao.

Polgo Po Pas Rom Dabeba Asęani 3:30

God aga deli naga dao. Tama tialigo da, te tigiwali togolama Kraisde konealubo po dąų wabo Juda bidi, te Godigo aga doloba pai bidi nogi yaibao. Tama tigiwali togosiąma Kraisde konealubo po dąų wali bidi, te Godigo te bidi aga me te doloba pai nogi nogi yaibao.

Polgo Po Pas Rom Dabeba Asęani 4:10

Tialima, Abraham te mena tama bidibadi tama Godigo aga doloba pai bidi da homu yaliwe? Ma aga tigiwali togwai elalubadi, ma aga tigiwali togosiąbadi dawe? Te aga tigiwali togosiąbadi tama Godigo homugo aga te doloba pai bidi da te homu elama, tama aga doloba pai bidi nogi wai dao.