Polgo Po Pas Rom Dabeba Asęani 15:6 - Godigo dwagi yai po buku

⁶ Eno homugo dage te tama bidiyu, tama pedauwali deli elama, tama Godigo nogi ugwaba somainogo yao, aga God tama dago Genuai Bidi Jisas Kraisgo Aya dao.

Polgo Po Pas Rom Dabeba Asęani 15:6 Referans Kwoze

Kraisgo Geme Dualali Sę Pedelabo Po Jonbolo Ola Mani 1:6

Tama tiyu, agai da tau selama, tama dabolo genuai sę menama, tama da te tuni bidi kingo pris hani bidi dabe nigilama, tama megi da te Jisas aga Aya Godibolo me te lotu po weyu, sesemane sogo aga sę ebo pris bidi dabe bidibao. Tama tibaso, eno homugo agai genuai wiegi yai nogi dali, te we bidi tonalubo bomo dali me bidada peyu, bidada pomainao. Te mu tama dao.

Efesus 1:3

Dago Godibolo usu da po weyu, agai nogi ugwaba sao. Aga dago Genuai Bidi Jisas Kraisgo Aya dao, agai God dao. Tama da te Krais dali wadolama, tama te da we bidigo gedugo susiąbo bomo elalubo naide, te tobage naide Godigo wiegi yai homu ilibo sę tigidali da dali yai dao. Agai te dago homu noma bidi tau somainogo eyu te wiegi yai homu ilibo sę yai dao.

Godigo Sęba Tagala Palai Bidigo Po 4:24

Tama te Godigo po odama wali pabo bidi hani augwaligo te po odama, augwali deli homu ebadi, Godibolo te po wai, “Genuai Bidi, dago sę Tolalubo Bidi, te dagalu dede, tǫ dede, te tamu ąį dede, te augwali tomode bidibo nai tigidali me, nagaduba nigali.

2 Korin 11:31

God, te God tama dago Genuai Bidi Jisasgo Aya, dago sesemane sogo aga nogi ugwaba siyu tama bidada peyu bidada pomainao. Agai koneani, eno tibo po te enaba pedalali sęde me wagobeo.

1 Pita 1:3

Te dago dena Genuai Bidi Jisas Kraisgo Aya God aga nogi dago ugwaba sinao. Agai da moni homu dene mu eyu, tama da tau somainogo, agai Jisas Krais te isai bidi dabe bidibo digi tomodu ma hodolali. Tebogo dabolo te gesi noma ula mawai. Tama menama, da dwagi yai homu eyu, bugagia tonaluyu bidalubao.

2 Korin 1:3

Dago agabolo puba hwi po weyu, tama God nogi ugwaba sao, aga te God tama dago Genuai Bidi Jisas Kraisgo Aya dao. Aga te dago Aya, tama aga te hobede eyu tau sabo page bidi dao. Aga te tigidali sęgę elalubo bidigo homu nagame ilibo God dao.

Godigo Sęba Tagala Palai Bidigo Po 4:32

Te bidi Jisas konealubo we bidi augwali homu deli, kolesaga deli elama, bugagia bidali. Bidi mego “Te nai ena naga dao” po me wabe. Augwali tigidaligo augwa doado bage dobolama, tigidali we bidi usu yai.

Dwagi Yai Gesi Po Jongo Asęani 20:17

Jisasgo Maria dali te po wai, “Nago ena diągio. Ena eno Aya God bidibo digi dagaluba me pabeo. Tama tibaso, nago ena dąų ola sigio. Tialima, nage eno ama dabe bidibo digi pelama, augwali dali te po tama wagibao, ‘Ena eno Aya bidibo madigi dagaluba holobao, tama te aga dagego Aya me dao. Tama eno ena God bidibo digi pobao, tama te God dagego God me dao,’ te po eno ama dabebolo pusigi pao,” Jisasgo Maria dali te po wai.

Sefanaia 3:9

“Tama te sogo eno tigidali kantride we bidigo homu kolesaga hasesegele paibao. Augwaligo homu kolesaga gesi ma elama, tama augwaligo ena deliba naga gedu haluasa po weyu yaibao. Tama augwali homu deli naga elama, tama augwaligo eno po wali asaibao.

Sekaraia 13:9

Tama te me badu bugai elalubo te dwagi yai pedalabo sę usu sabo sę ilaibao, te bidi mebago te gol me silva te dwai hogomu sela sąmainogo te isiba ulubo tiwai yaibao. Tama augwaligo gedu haluasa po enaba obaso da, teda eno augwaligo gedu haluasa po wabo odaibao. Tama eno te tama po augwaliba walaibao, ‘Dage da, eno we bidi dabe da’ obaso, teda augwaligo te tama po waibao, ‘Nage God, dago Genuai Bidi dao,’ po waibao,” Genuai Bidigo te po wai dao.

Efesus 1:17

Tama God da dago Genuai Bidi Jisas Krais aga God da, te dago genuai nogi mu elalubo Aya dao. Tama eno aga dali po weyu, eno homugo agai aga Mobo Bidi dagebolo mao. Tama menama, tama te Mobo Bidi agai dage wiegi yai homu kolesaga menama, tama agai God dagebolo waselaibao, te dagego God aga bugagia kuna konea silimainogo tiaibao.

Kolosi 1:3

Te God agai dage tau somainogo da sigo gedu haluasa po wabo dao. Tama weyu, tama sesemane sogo te dago Genuai Bidi Jisas Kraisgo Aya Godibolo dago dagede puba hwi po wabo dao.