Polgo Po Pas Rom Dabeba Asęani 14:1 - Godigo dwagi yai po buku

¹ Tama bidigo Kraisde konealubo po dąų weyu da yali, tiali goli agai konealubo po bomo isąyu tama aga homu te God aga dali dwagi yai homu emainogo aga te bidigo nigali haniani bomai po aga wali pao homu ebo bidi dao. Te tobage bidi te dagego duga hani tomoba sela asao. Tiali goli tama tiyu te dagego homude aga dali gasa gasa konila po me olamu dao. Te menio. Te bidi olo mu sao.

Polgo Po Pas Rom Dabeba Asęani 14:1 Referans Kwoze

Polgo Po Pas Rom Dabeba Asęani 15:1

Te da Godigo we bidi hani tomode te we bidi meba augwaligo te Kraisde te konealubo po bomo meni yai bidiyu, tama augwaligo haniani sęde te habu selebo dao, te ena tamadi tama te sęde po asęani. Tama da meba te Kraisde te konealubo po bomo eyu dąų olama bidibao. Tama da augwali dali te nagamea pai kolesaga eyu augwali sao. Dago augwali dali tama tiyu, tama dago augwaligo sęgę tolao. Dago augwali sula tagalama tama dena homu kolesaga naga wali me piduamu dao.

1 Korin 9:22

Te Kraisde konealubo po dąų wabo bomo meni yani we bidi augwali eno tau sainogo eyu, tama ena te bomo meni yai bidi tiwai bidibo dao. Eno te tigidali sunumidu te gasa bidi dabego ebo kolesaga tigidali usu siyu, tama augwali tiwai bidibo dao. Augwali meba eno ma dobola somainogo tama ebo dao.

Polgo Po Pas Rom Dabeba Asęani 15:7

Dago te da pąde bidibo bidide homugo kone palao. Tama tibaso, duga hasi dage tigidali deli deligo te ama dede dabe selama, tama augwali dali deli homu elama bidao, te Kraisgo me da sali tiwai yaligi yao, te Godigo genuai nogi ugwaba pedalomainogo tiao.

Polgo Po Pas Rom Dabeba Asęani 14:21

Te doloba pai kolesaga e dao: nago amade kone palao. Aga te mi tubo kolesagade, ma te bomai wę tubo kolesagade, ma gasa sęde me te habu selai dwai sę dao homu ebaso da, teda agai nage te tobage kolesaga ebo sulama, tama aga homude elalubo habu selali po bolama tulaluidali weyu, nago te tobage kolesaga egio. Tama tiyu te nago te wiegi yai ilibo dao.

2 Jon 1:10

Tama tibaso, bidi me deli dage bidibo digi pedalama, tama agai Kraisgo ola mani po dagebolo sela asisąma olo asobaso da, dagego beba te bidi odasa pigio. Tama me dagego aga dali dwagi yai homu elama nage bugagia bidao po wagio.

Polgo Po Pas Rom Dabeba Asęani 4:19

Te Abrahamgo kibu be te bidi sese a naga te 100 kibu be pąde elalubadi, tama aga tigi te monu dabe tiwai elalualio. Tama aga we Sarago tigi me te mosi dabe tiwai yalio, augwali sigo wai ame nabo usubeo. Abrahamgo tede te homu yali, tiali goli agai Godigo wali pode konealubo po dąų wali te bomo kimi me isibeo. Te agai konealubo po dąų mu wai dao.

Dwagi Yai Gesi Po Lukgo Asęani 17:2

Aga te tobage sę eidali weyu, augwaligo aga magede moni masigi bonogo kęyu, te bidi te tamu ąį tomoba sąyu, aga tede isigi sogo da, teda te usu igi dao. Aga te tiwai isibaso, tama dwasianu dene saibao. Me ma, te bidi bidiyu, agai e nogi meni yai we bidi me deli te dwai sę ebo kolesaga tomoba gegeyu egi sogo da, teda agai te dwai sę mu egi dao. Te dwai sę eyu da, tama nosali Godigo agabolo moni dene mu mawaibao. Duga digi tobade te koneama, tonaluiąo, dwai sę edugio menio, bugagia bidiąo,” wali.

Matyu 14:31

Tama polo mu Jisasgo nogo munama, Pita nogogo tola sali, tama agabolo te po wai, “Nago naga homu tigidali enaba mubeo, dwasianu naga mawai. Magi baso nago homu si ebawe?”

Matyu 12:20

Te awi dili me deli dwasianu togwa painogo yali, te tigidali me agai togwa pogobeo. Tama te lamde mubo hobi dwasianu bogoli idubo, te me agai tigidali te isiligobeo. Menio. Agai te tobage bomo kimi meni yai we bidi tau sabo sę iduaibao, tama bomonama elama, te doloba pai sęgo te dwai sę aiyaba elaluaibao.

Aisaia 42:3

Tama te agai te bomo meni yai, te togwa painu ebo awi dili, te agai tigidali me togwa sągobeo. Tama agai te ula bugagia isiąbo lam sula somainu me iligobeo. Menio. Agai te bomo meni yai we bidi tau sabo kolesaga yaibao. Agai te doloba pai kolesaga pedalumainu bomo ilaibao, agai te sę ebo me tagalogobeo.

Aisaia 40:11

Agai te aga we bidi dabe bugagia tonalubao, te sipsip tonalubo bidi dabego te aga sipsip bugagia tonalubo tiwai ebao. Te tonalubo bidigo te sipsip wai dabe te hagawiade pageasa bilaibao. Te aga dua digi pidu, te dwasianu wai dabe elalubo sipsipba te sunumi ola mayu, ela pidubo dao.

Jopgo Po Asęani Elalubo Buku 4:3

Eno koneani, nago dwagi yai homu we bidi hauwabolo mani. Tama nago bomo menia we bidi bomo ma ilali. Tede nago homu kone palao.

Esekiel 34:16

Tialima, sipsip kibu meba hagabaso da, teda eno augwali gegegi pelama, tama eno augwali ma oda saibao. Ma, te sipsip dabe meba subigila pepelawai baso da, teda eno augwali gegegi oda sigi paibao. Tama meba dolama, keni elalubaso da, teda eno augwaligo keni sisaibao. Tama meba augwali gasi elalubaso da, te eno augwaligo gasi usu ma ilaibao. Tiali goli, eno te tumona pai boma pai sipsip dabe dolaibao. Magi baso meni, eno sipsip dabe tonalubo doloba pai kolesaga naga ebo dao,’ eno te po te tobolu bidi dabebolo obao,” wali.

Esekiel 34:4

Dagego te bomo meni yai sipsip dabe tau sabo menio. Tama me dagego te gasi yai sipsip dabe usu ilibo menio, me dagego te tigi selai sipsip kibu dabe keni dagego sįsįbo menio. Tama me dagego te hagawai sipsip gegegi pelama, tama dagego augwali ma oda sabo menio. Te dagego bomogo da, dagego augwali dali selebo sę eyu, tama sesanobo bidigo ebo kolesaga tiwai ebo dao.

Filipai 2:29

Dage dali, te bidi Epafroditus dali, te dage tigidali te Genuai Bidi Kraisgo hani deli dao. Tama tibaso, aga dageba asobo si, dagego aga duga ama tiwai ma sao. Te tobage bidigo nogi dagego ugwaba siyu, tama augwali dali dwagi yai homu yao.

Dwagi Yai Gesi Po Jongo Asęani 13:20

Eno dagebolo mu po obao, eno sę bidi tagala palobao. Tama gasa bidigo te eno tagala palai bidide dwagi yai kolesaga ebaso da, te agai enade me te dwagi yai kolesaga ebo tiwai dao. Te kolesaga me ela pabo. Te bidigo te dwagi yai sę te ena tagala palali bidibolo me te sę ebo tiwai dao, te Godibolo,” Jisasgo te po wai.

Matyu 18:10

Dage dua bugagia dao. Tiyu dagego te homu eyu, e dwasianu we bidi tomode me deli te olo nai tiwai da wagimio, augwalide tagala wagimio. Menio. Eno dagebolo te po obao, te Godigo bidibo madide bidibo ensel te mobo bidi dabe augwaligo sesemane sogo te eno Aya dagalude bidibo subo dao. Tama tiyu, te ensel mobo bidi dabego e tiwai dwasianu we bidi hani tonalubo dao.

Sekaraia 11:16

Magi baso meni, eno te ena hani we bidi dabe tonaluabo bidi me deli muani, augwali te sipsip hani dabe tiwai dao. Tiali goli te tonalubo bidigo te sipsip kibu dabe dolainu ebadi tau me sabeo, tama agai te hagabo kibu sipsip dabe gegeyu i ola bilibo sę me ebeo, tama agai te sipsip dabe keni yai sįsįbo sę me isąwai, tama agai te bugagia bidibo hani sipsip dabe nai mayu me ebeo. Menio. Aga digi te nisali kibu elama mi dabe tubo sę idu, te tigidali tula silibo sę yali, te augwaligo nogo sągą dani dabe dali tula siliboba usu nanio.

Dwagi Yai Gesi Po Makgo Asęani 7:19

Magi baso meni, te tiwai naigo te bidi homu tomoba mu pogobeo. Menio. Te haliga tomoba peyu, tama te di tabo sunumidu naga pelama, tama nosali te di beba paibao,” agai te po wai. Te pode Jisasgo te tigidali haniani tubo nai te wiegi yai da, te habu selebo menio, te po wai.

Polgo Po Pas Rom Dabeba Asęani 11:15

Edao. Godigo te Juda dabe augwali sela sąnama, tama tede agai te tigidali tǫde bidibo bidi selama, tama augwaligo deli homu aga dali pedalabo tų dawai. Te dwagi yai kolesaga dao. Tiali goli, Godigo te Juda dabe augwali ma sabo si, te wiegi yai mu yaibao, te isali bidi aga gų pagede ma hodalobo tiwai yaibao.

Polgo Po Pas Rom Dabeba Asęani 14:2

E tiwai yao. Bidi me deligo Kraisde konealubo po bomo elama dąų olama, tama agai tigidali haniani nai tubo dao. Tiali goli gasa bidi mego Kraisde konealubo po dąų olama gisiga konesiąwai bidi, te bidi agai te mi tubo sęde habu selama, tama te gide holobo nai naga agai tubo dao.

Polgo Po Pas Rom Dabeba Asęani 14:3

Tama tigidali nai tubo bidigo, agai te kibu me gasa nai mi tusiąbo bidi dali dwai homu me egio, bo wagio. Me ma, te kibu me gasa nai mi tusiąbo bidigo, agai homugo te tigidali nai tubo bidi te sęgę sali homu me egio. Menio. Godigo te bidi me selama, tama aga hani dali dagayani dao.

1 Tesalonaika 5:14

Dago abagi dage tuni bidi dabebolo dago po bomo elama dage dali obao. Dagego te sę hagela ebo bidi dabe augwalibolo po bomo elama, augwali homu kolesaga dagego bugagia ma dodolao. Tama te wi ebo bidi dabe augwaligo homu kolesaga dąų walao. Tama te bomo meni yai bidi dabe augwali dali dagego dwagi yai kolesaga naga eyu bidao, sębę egimio.

Hibru 5:14

Tiali goli te dili yai nai da te genuai bidi dabe augwaligo tubo dao. Te tobage bidi dabego te augwa digi augwa homude kolesaga hauwa sogo osola suyu, tama augwaligo te wiegi yai kolesaga ebo me te dwai kolesaga ebo me te augwaligo dagalabo usu dao.