Polgo Po Pas Rom Dabeba Asęani 11:25 - Godigo dwagi yai po buku

²⁵ Eno ama dede, dage homu hagoma me idali weyu tama eno homugo dage te polobadu geme dualali po page gisiga koneao. Te e tiwai dao: te Israel hani we bidi me badugo homu palia sali, tama te kolesaga augwalide osogo elalubadi tama te gasa haniani hani we bidi augwali te Godiba asiyu, tama te sogo augwaligo hani nambaba usu nagasaibao.

Polgo Po Pas Rom Dabeba Asęani 11:25 Referans Kwoze

Dwagi Yai Gesi Po Lukgo Asęani 21:24

Tama te boi bidi dabego te Juda dabe me badu moni hwągo ela muaibao, me badu nogo si dųlama, kalabus ilama, odasa pelama, tama tigidali gasa tǫba mugi paibao, tede mu bidimainu yaibao. Tama te boi bidi dabe, te Juda bidi hani isąwai dabe, augwaligo te Jerusalem hanu mu dola silaibao, te aiyaba elaluaibao. Tama nosali te Juda hani isąwai dabego Juda dabe aiyaba elaluabo si silaibao,” Jisasgo te po augwalibolo wai.

Polgo Po Pas Rom Dabeba Asęani 16:25

Dago Godigo nogi ugwaba mu sinao. Eno aga gesi wiegi yai po pusubogia tama God agai dage te Kraisde homu kęą pai we bidi mu dąų wabo usu yaibao. Te wiegi yai gesi po te Jisas Kraisde elalubao. Tama polobadu tigidali sogo te po te geme dualali po geme dualaluali,

Polgo Po Pas Rom Dabeba Asęani 12:16

Dagego duga ama dede augwali dali deli homu tiwai elama, te duga digi dugade ebo homu tiwai augwali dali yao. Dagego homu dage genuai bidi bidabo homu me ilamuo. Menio. Dage te nogi meni yai olo we bidi dabe dali abagi homu eyu bidiąo. Dagego te homu elama duga digi te po me wagio, “Eno naga eno koneai bidi dao,” te po me wagio.

Kraisgo Geme Dualali Sę Pedelabo Po Jonbolo Ola Mani 10:7

Menio. Tama nosali te nogo a naga olama me badu nogo si wali te ensel mobo bidi me deligo agai te ona tiwai nai elebadi, te sogo te Godigo homude polobadu dualali nosali yabo sę te hania pedalama, tama agai te sę yaibao. Polobadu agai aga sę ebo bidi augwalibolo te aga nosali yabo sę po pusali, tama augwaligo koneani, te sę hania pedalaibao,” te ensel mobo bidigo te po wai.

Kraisgo Geme Dualali Sę Pedelabo Po Jonbolo Ola Mani 7:9

Tama te we bidi sa mubo sę tigidali ela silai digi, eno tonolo ma bilibadi, tama eno te we bidi hauwa augwali sisinama bidibo suali, tama umabo mu, te bidigo te we bidi augwali nedebo usu me egobeo. Te we bidi augwali te tigidali bidi hani dao, tama te tigidali bulu tǫde me, te tigidali haniani tigiwali yai me, tama te tigidali haniani po wabo bulu bidi dabe dao. Augwali te tuni bidi duabo nai te gesabidide dali te kibu sipsip wai gedude augwali dolaluali. Tama augwaligo te bobobage tedela yai ugwa munama, tama augwaligo nogode te kokonas yabe tolaluai.

Efesus 3:9

Tama te tigidali nai nigai God, te hasia mu agai homude aga nosali yabo kolesaga dualai. Tama te homu kolesaga tigidali sogo polobadu aga homude dualaluai. Tama megi agai homu kolesagade dualaluali yabo sę po page eno haninama te tigidali we bidibolo pusumainogo agai enabolo te wiegi yai po pusubo sę mawai.

Godigo Nogi Ugwaba Sabo Tęąbi Po Wabo Buku Dabe 22:27

Te tǫde tigidali we bidigo augwaligo te Godiba homu koneama, tama augwa agaba ma asaibao. Te tigidali hani we bidi dabe augwaligo kidu sugunama, agaba lotu waibao.

Kraisgo Geme Dualali Sę Pedelabo Po Jonbolo Ola Mani 11:15

Te nogo a naga olama me badu nogo si wali te ensel bidi me deli agai te ona tiwai nai elali, tama tebadi, dagalude ensel mobo bidi meba augwaligo i bomonama weyu te po wali, “Dago Genuai Bidi God dali, te Godigo sa muani te we bidi tau somainogo tagala palali bidi Krais dali, augwali sigo te tigidali tǫde we bidi tonalubo bomo megi selama tama elalubao. Tama aga sesemane sogo te tuni bidi bidada peyu, bidada paibao,” te po wai.

2 Pita 3:8

Tiali goli, abagi dede dabe mu, dagego homugo te po me deli gegeda pigio. Te po e dao, te Genuai Bidigo gedude be deli sogo siade te kibu be hauwa mu 1,000 tiwai te si dao, tama te kibu be hauwa mu 1,000 wabo kibu be te deli sogo siade tiwai si dao. Te Genuai Bidigo homude te si te deli tigi tiwai dao.

1 Korin 10:1

Ama dedeo, dage ede gegeda pelamuo: dago wąį dabe tigidali te bidi meni yai dwai bulude bilibadi augwali te dagalu pǫ dologode bugagia bidali. Tama augwali tigidali te sągągo naga pelama, tama te tamu ąį nogeyu sana pai dao.

Polgo Po Pas Rom Dabeba Asęani 1:13

Eno ama dedeo, eno homugo dagego e po bugagia koneiąo, hauwa sogo eno te dage bidibo madi asaibao homu yali. Tiali goli sesemane sogo nai me deligo te ena tų palialubo dao. Te eno sęgo gasa bulude bidibo Juda hani isąwai we bidi augwali tau selama te augwaligo Godigo po wali pabo we bidi pedalali, tama eno dage tomode me te tau sabo sę egi pabo homu hauwa sogo yai dao.

Hosea 14:9

Te wiegi yai homu kolesaga elalubo bidi dabe, augwaligo te e bukude elalubo po konea sao. Tama eno homugo te augwaligo homu kone palama, tama te po wali pomainao. Te Genuai Bidigo kolesaga te dolo naga elalubao, tama te doloba pai bidi dabego te kolesaga wali peyu bidaibao. Tiali goli, te dwai sę ebo bidi dabe, te augwaligo Genuai Bidigo kolesaga wali pogobeo. Tama tiyu, augwali tulalubo dao.

Aisaia 5:21

Dage dolaibao. Te dage bidi duga homugo dagego kolesagago gasa bidi dabego kolesaga aiyaba elaluali dao homu ebo bidi dabe, dage.

Godigo Nogi Ugwaba Sabo Tęąbi Po Wabo Buku Dabe 72:17

Tama te bidi hani bagego te kingo nogi homu kone me gegeda palu tagaligio, tama agai genuai te sesabi gana elama, te giliga nanalubo sogo usu nama elalumainu yaibao. Tama tigidali hani we bidigo aga nogi ugwaba sao. Tama augwa te Godiba hanalu, te augwali wiegi yai homu ilibo nai momainu yao wao, te agai te king wiegi yai homu ilali tiwai emainu yao.

1 Korin 12:1

Eno ama dedeo, te Godigo Tedali Mobo Bidigo te haniani sę yabo homu kolesaga dabolo mabode, te dagego tede gisiga konesiąma bididali weyu eno tede dage homu dodolabo po me megi pusaibao.

Bugagia Bidibo Kolesagade Po Asęai Buku 26:16

Hagela bidigo te homu yai, te agai koneani kolesagago te nogo a naga olama, me badu nogo si wali bidigo te augwa bugagia konea pai te hania mu pusubo wiegi yai homu kolesaga te agai aiyaba elaluali homu ebo dao.

Bugagia Bidibo Kolesagade Po Asęai Buku 26:12

Te bidi me deli aga wiegi yai homu elalusiąbaso da, teda dago aga te konemainu tau sobaso, te usu yaibao. Tiali goli, te bidigo homugo te aga tigidali nai koneani homu ebaso da, teda te dago aga tau sabo sę te dene mu yaibao.

Godigo Nogi Ugwaba Sabo Tęąbi Po Wabo Buku Dabe 127:1

Te Genuai Bidigo te be me deli sę igi menigi sogo da, te kamda dabego sę odolali igi dao. Te Genuai Bidigo taun me deli tonalugi menigi sogo da, teda te tonalubo bidi dabe augwali te odolali tonalugi dao.

Godigo Nogi Ugwaba Sabo Tęąbi Po Wabo Buku Dabe 107:43

Tialima, dage te wiegi yai homu elalubo we bidi dagego te sę tigidali bugagia homu kone palao. Tama dagego te Genuai Bidiba po hanilama pusuyu, te sesemane sogo da wei mu ebo da po waiyąo.

Matyu 13:11

Agai po wei ponoyu te po wai, “Godigo agai we bidi tonalubo sę geme dualaluali po page haninama te agai dagebolo ola mawai dao. Tiali goli e bidi dabebolo te geme dualali po page te haninai menio.

Dwagi Yai Gesi Po Jongo Asęani 10:16

Eno gasa sipsip me elalubuo. Megi augwali e tomogai tomode bidibo menio. Te me eno sigi pelama, odasa asaibao, e tomogai tomoba muaibao. Tama augwaligo eno po odaibao. Tama deli kibu sipsip hani bidaibao, tama te sipsip dabe tonalubo bidi deli digi yaibao.

Polgo Po Pas Rom Dabeba Asęani 9:18

Tama tibaso dago koneani, te Godigo aga homu naga wali peyu te olo tau siyu mabo wiegi yai kolesaga te bidi me delibolo yainogo da, teda agai te olo mabo wiegi yai kolesaga te agabolo yaibao. Me ma, te bidi me deli agai te po odosiąbo bidi ilainogo homu eyu da, teda agai te bidi te po odosiąbo bidi ilibo dao.

Polgo Po Pas Rom Dabeba Asęani 11:12

Augwaligo te dwai sę ebaso, tama tede Godigo te tigidali tǫde bidibo we bidi tau mu sidubadi geaibao. Augwaligo te Godigo kolesagade tulalubaso, tama tede te Godigo te Juda ąǫ isąwai gasa we bidi hani augwalibolo wiegi yai kolesaga mu yai. Tama tibaso, tigidali Israel dabe Godiba ma geasa asobaso da, teda tigidali hani wiegi yai mu bidaibao, me deli dwai bidigobeo.

Polgo Po Pas Rom Dabeba Asęani 11:24

Magi baso meni. Dage gasa hani we bidi da, te buside holali ni oliv nologo naga tiwai dao, te ni oliv mugo nologo meni. Tiali goli Godigo dage te nide togolama, tama agai dage te gide elalubo ni oliv muba wadolali. Tama te Juda bage augwali da, te gide elalubo ni oliv dao. Tama tibaso, Godigo te augwali polobadu te ni nologo tiwai togwa sąnama, tama augwali te augwa oliv niba digi te augwa ma wadoloyu ebo usu mu dao, te pedalisiąbo sę meni.

1 Korin 2:7

Tiali goli dago te Godigo koneani kolesaga po pusubo dao. Te po te bidi dabego koneidali weyu geme dualaluali. Godigo te tǫ dagalu nigisiąbadi tama agai te koneani kolesaga sa muani te dabolo mayu, tama te koneani kolesagago dago te Godigo bomai ula digi nosali selama tama bugagia bidimainu yalio. Tama te tobage koneani kolesaga po dago te we bidibolo ola mabo da.

1 Korin 4:1

Dagego te ena Pol dali, Apolos dali, Pita dali te dade dagego homugo kone paluyu tama koneao, da te Kraisgo sę ebo bidi dabe tama Godigo te geme dualalubo po pusuyu tonalubo bidi dabe dao.

Efesus 4:18

Tama tiyu augwaligo homu kolesaga dwai eyu, be hulia sabo tiwai ebo dao, augwaligo ebo homu te kedu meni yai homu kolesaga dao. Tama te Godigo mabo bidada pabo ula augwaligo sogobeo. Magi baso meni. Augwaligo bomo elama konebo hagela homu eyu, tama augwali munu me konesiąyu bidibo dao.

Kraisgo Geme Dualali Sę Pedelabo Po Jonbolo Ola Mani 1:20

Tama nago eno dolo nogode te hǫ a naga olama me badu nogo si elalubo suali. Te lam sole gol a naga badi me si tama te me nago suai. Tama te nai dabe geme dualali page e dao: te hǫ a naga olama me badu nogo si wali, te Godigo po wali pabo bulu a naga olama me badu si te bulude bidibo we bidi tau sabo ensel mobo bidi dabe dao. Tama me te a naga olama me nogo si te lam sole po wali, te a naga olama me badu nogo si Godigo po wali pabo we bidi hani dabede po begelama weyu,” agai te po wai dao.