Kraisgo Geme Dualali Sę Pedelabo Po Jonbolo Ola Mani 5:11 - Godigo dwagi yai po buku

¹¹ Tialima, eno tonolo ma bilibadi, tama eno te Godigo dagalude bidibo ensel mobo bidi augwaligo pedauwalide moni po wabo odai. Tama te ensel dabe augwali hauwa mu te handet milion bidibao, tama bidigo augwali nedebo usu me egobeo, te tausen tausen te kisu umabo mu bidai. Tama augwali dolaluyu, tama te genuai tuni bidi duabo nai me, te bidibo ula elalubo hasa me si me si me, te polalubo tobolu bidi dabe me, augwali tomode bidiyu, tama te ensel mobo bidi dabe augwaligo te bage bagulama dolaluali.

Kraisgo Geme Dualali Sę Pedelabo Po Jonbolo Ola Mani 5:11 Referans Kwoze

Daniel 7:10

tama besela palalio. Te bidi sese umabo mu, te hauwa tausen we bidigo te Bidigo sę yali, tama te umabo hauwa milion we bidi aga pąde dolaluali. Tama mebago te buku dabe dagalama, te po tų kot hodolainu yai.

Hibru 12:22

Tiali goli dage, dage te tiwai naiba me asobeo. Menio. Dage te Saion bulu duba asai dao, tama te bidibo ula mabo God bidibo moni hanu te dao. Te bulu da te dagalude elalubo Jerusalem hanu dao. Te moni umabo ensel mobo bidi dabe augwali sisinama te wiegi yai homu pemene ebo madi, teba dage asai dao.

Kraisgo Geme Dualali Sę Pedelabo Po Jonbolo Ola Mani 4:6

Tama te genuai tuni bidigo gesabidide te magi nai me deli elalubao, te nai te genuai tamu ąį tiwai dao. Tama te gesabidi subo dula tiwai, te hania mu subo dao. Tama te bidibo ula elalubo hasa me si me si augwali te tomode bidiyu, tama augwali te tuni bidigo wiegi yai duabo nai sia sai bobegelalu bidiyu, tama augwali dolaluai. Te bidibo ula elalubo hasa me si me si augwaligo gedu te hauwa te gesabidide me elalu, te tudi badu me elalu, te tigi sibi mu simina selama halualubo dao.

Kraisgo Geme Dualali Sę Pedelabo Po Jonbolo Ola Mani 4:4

Tama te 24 wabo tuni bidi duabo nai sia saigo te genuai tuni bidi bidibo digi bobegela sai elaluai, tama te 24 polalubo tobolu bidi augwali te duabo nai sia saide dualama bidai. Tama te polalubo tobolu bidi dabe augwaligo te tedela ugwa muai elaluai, tama augwaligo tobolude te kapa golgo nigai wiegi yai madi muai elalubo, te eno suai dao.

Godigo Nogi Ugwaba Sabo Tęąbi Po Wabo Buku Dabe 148:2

Dage tigidali ensel, te Genuai Bidigo nogi ugwaba siąo. Dage tigidali dagalude ami dabe, te agai nogi ugwaba siąo.

Godigo Nogi Ugwaba Sabo Tęąbi Po Wabo Buku Dabe 68:17

Genuai Bidi te hwįbo bomai hauwa tausen karisde dugawali ami bidi dabe dali asaibao. Aga te Sainai bulu duba aselama, tama aga te gasa wiegi yai be mu tomoba bula sagasaibao.

Kraisgo Geme Dualali Sę Pedelabo Po Jonbolo Ola Mani 19:6

Tama eno odali, te genuai we bidi hani sisinama bidibo digi po me deli tiwai pedalai. Ma, te ąį hauwa kulu kulu weyu u wabo tiwai yai. Tama te dagalu be kulu wabo tiwai genuai u wabo tiwai yai, te eno odali. Te augwaligo i bomonama wai, “Dago God nogi ugwaba sao! Genuai Bidi, aga e dago God, te Tigidali Bomo Elalubo Bidi, megi aga te tuni bidi mu bidibao.

Kraisgo Geme Dualali Sę Pedelabo Po Jonbolo Ola Mani 7:11

Tama tigidali ensel mobo bidi augwaligo te genuai tuni bidi duabo nai dali, te polalubo tobolu bidi dabe dali te bidibo ula elalubo hasa me si me si tama bobegelaluyu augwali dolaluali. Tama augwali te tuni bidi dulalubo digi te badu basi gulama, tama gesabi tǫba munama, augwaligo te Godibolo aga nogi ugwaba sabo lotu po wali.

Kraisgo Geme Dualali Sę Pedelabo Po Jonbolo Ola Mani 5:14

Tama te bidibo ula elalubo hasa me si me si augwaligo te pode te po wai, “Mu dao.” Tama te polalubo tobolu bidi dabe augwaligo basi gulama, lotu po God de Krais si dali wai.

Kraisgo Geme Dualali Sę Pedelabo Po Jonbolo Ola Mani 5:6

Tama te sogo eno suali, te kibu sipsip wai dolalubo suai, te augwaligo aga hwągo ela muai subo tiwai homu yai. Tama aga te genuai tuni bidi duabo nai dali te bidibo ula elalubo hasa me si me si te pąde aga dolaluyu, tama te polalubo tobolu bidi dabe tomode bidai. Tama agai te bulmakaugo tobolude elalubo gąų tiwai te a naga olama me badu si badi, te agai gedu me te a naga olama me badu nogo si elalubo. Tama te gedu dabe augwali te Godigo mobo bidi a naga olama me badu nogo si dao. God agai augwali te tigidali tǫba tagala palai dao.

Te Israel me Juda Hani Sigo Tuni Bidigo Po Elalubo Buku Deli 22:19

Tialima, Mikaiago po wadolama weyu, te tama po wai, “Tialima, megi da, eno homu nago olo bugagia munama, odao, te eno nagebolo te Genuai Bidigo enabolo ola mani nai dabede po waibao. Eno suali, te dagalude Genuai Bidi te aga dugulalubo sia saide dugulaluali, te tigidali mobo bidi ensel dabe aga pąde dolalubo suai dao.

Godigo Nogi Ugwaba Sabo Tęąbi Po Wabo Buku Dabe 103:20

Dage tigidali Genuai Bidigo ensel mobo bidi, dagego genuai bomo elalubao. Dagego agai po wali pabo bage, dagego olo agai po wabo digi bugagia mubo dao. Tialima, dagego Genuai Bidi nogi ugwaba sao.

Bomai Po 33:2

Agai te po wali, “Genuai Bidi Sainai bulu dude bidama asali. Aga te Idom bulu ugwadu te giliga tiwai asali, tama agai ula te Paran bulu dude elaluali, tama te ula aga we bidiba ula yali. Te ensel sibi tausen hauwa aga dali bidali, tama agai dolo nogo badu isi bogoli genuai mu iduali.

Jutgo Asęani Pas 1:14

Te polobadu bidi Adam aga ogwago ogwa tama nedada peyu, te nogo a olama me badu nogo deli wali, te bidi mego ogwa te Inok da, aga polobadu mu bidai bidi dao. Tiali goli, agai te sogo polobadu te megi bidibo tibo po ola mabo bagede te po wai, “Suao, Genuai Bidi aga ensel mobo bidi umabo mu dali asaibao.

Kraisgo Geme Dualali Sę Pedelabo Po Jonbolo Ola Mani 5:8

Tama agai te buku sai digi, te aga genuai bidi mu bidibaso, te bidibo ula elalubo hasa me si me si badi, te bidi sese olama me badu nogo me si me si te polalubo tobolu bidi augwali te kibu sipsip wai pąba pelama, kidu sugunigi pai. Tama te tigidali tobolu bidi deli deli augwaligo te elebo nai gita tiwai badi, te wiegi yai kapa golgo nigai pou te tola sobadi yai. Tama me te pauda denami ebo nai te tigidali poude elalubo siago deyu, tama te holobo denami yai hano te Godigo we bidi augwaligo Godibolo wabo gedu haluasa po tiwai holobo eno suai.

Kraisgo Geme Dualali Sę Pedelabo Po Jonbolo Ola Mani 9:16

Tama te kibu hosde duawali ami bidi dabe hauwa mu, te bidi sese hauwa mu da wali, te 200 milion. Te tama nogi ebo eno odai.