Kraisgo Geme Dualali Sę Pedelabo Po Jonbolo Ola Mani 22:2 - Godigo dwagi yai po buku

² Tama te ąį te duabo sai pagedu pedalama, tama te ąį te hanu moni pabo tų tomodu mu pabo dao. Te wę sesege u badu me, te wę sesege e badu, tede te bidabo ula mabo ni dabe elalubao. Te ni dabe augwaligo du walobo sogo te kibu be delide te nogo si olama sągą badu si sogo walobo dao. Te tigidali poluade walobo dao. Tama te ni yabego te tigidali tǫde we bidi hani augwali usu ilibo dao.

Kraisgo Geme Dualali Sę Pedelabo Po Jonbolo Ola Mani 22:2 Referans Kwoze

Kraisgo Geme Dualali Sę Pedelabo Po Jonbolo Ola Mani 22:1

Tama te ensel mobo bidigo pabo ąį me deli ena ola mawai, te bidibo ula mabo wę, tama te wę te dula ula mu gegemani ebo tiwai ula yai. Tama te ąį aga gomo, te God dali te Sipsip Wai augwali sigo tuni bidi duabo sai pagede te ąį gomo elalubao.

1 Pita 2:24

Tama aga digi agai dago yali dwai sę sęgę aga tigigo selama, tama te niba dąų wagi pai. Tama tiyu, agai homugo dago te dwai sę ebo kolesaga tagalaibao, te isai bidigo dwai sę ebo tagalali gilama. Tama dago te dwai sę ebo tagalama, tama dago doloba pai kolesaga naga eyu bidaibao, te me aga homu dao. Tama augwaligo aga tigi doloyu dene mawai, tama tebogo da tau selama dwagi yai ilali.

Kraisgo Geme Dualali Sę Pedelabo Po Jonbolo Ola Mani 2:7

“Te olo elalubo bidi, agai te Godigo Mobo Bidi agai Godigo po odobo we bidi hani dabebolo e wabo po bugagia odao: ‘Niwai bidi agai bomogo te dwai sę ebo kolesagago bomo aiyaba elaluyu da, te bidibolo eno aga usu da weyu, tama agai te bidi bidibo ula mabo ni du sela tumainao waibao. Tama te bidi bidibo ula maiabo ni te God aga gide elalubo dao.’”

Tigidali Nai Gagalama Nigali Side 2:9

Tama Godigo te gide haniani ni dabe pedelao obaso pedelai. Augwali te gasa wiegi yai au yai mu, tama augwaligo dwagi yai nai walai. Tama te gi tomode te we bidi bidibo ula maiabo ni me deli digi elaluali. Tama gasa ni me deli te bidigo mena kolesaga ebo dwagi yai dawe, ma mena kolesaga ebo dwai dawe, te konemainogo yabo du elalubo ni me deli elaluai.

Kraisgo Geme Dualali Sę Pedelabo Po Jonbolo Ola Mani 22:14

Te we bidi augwaligo augwa ugwa we telabo bage, te we bidi augwaligo wiegi yai homu yao. Augwaligo te bidabo ula sabo nide te du sabo usu yaibao. Tama augwali te hanu tomoba pabo tųdu pabo usu yaibao.

Bugagia Bidibo Kolesagade Po Asęai Buku 3:18

Wiegi yai homu ebo kolesaga te bidibo ula mabo ni tiwai yaibao. Tama te wiegi yai homu ebo kolesaga te dali kęą pabo bidi dabe, augwa te bidabo ula wiegi yai mu elalubaso, tama augwa wiegi yai homu pemene yaibao.

Kraisgo Geme Dualali Sę Pedelabo Po Jonbolo Ola Mani 22:19

Me ma, bidi me deligo te e bukude elalubo po, te nosali pedalabo sę po, te po meba agai sela sąyu da, teda Godigo te agabolo maiabo sa muani nai sela sąwaibao. Tama tiyu, te bidigo te bidabo ula mabo nide te du sogobeo. Tama aga te dwai sę isiąbo wiegi yai hanude bidabo madi tede bidigobeo. Te nai side po e bukude elalubao.

Kraisgo Geme Dualali Sę Pedelabo Po Jonbolo Ola Mani 21:24

Tama tigidali tǫde bidi hani augwali te hanu ula ebode biliyu bidaibao. Tama haniani tǫde tuni bidi augwaligo nogi elalubo au dobage tigidali te hanu tomoba naga selasa asaibao.

Kraisgo Geme Dualali Sę Pedelabo Po Jonbolo Ola Mani 21:21

Te nogo si olama sągą badu si obo tų te nogo si olama sągą badu si te tedela yai bis te wiegi yai mu dao. Tų me deli augwaligo te genuai bis mu me deligo naga nigai. Te tigidali hanude pabo tų te wiegi yai kapa golgo naga nigai, tama hania mu te glas tiwai yai eno suali.

Dwagi Yai Gesi Po Lukgo Asęani 4:18

“Genuai Bidigo Mobo Bidi ena dali bidibao. Agai dwagi yai po eno te nai meni yai we bidibolo ola momainu ena sa muai dao. Agai ena tama po pupusu bilimainu tagala palai dao, ‘Dage kalabus yali bage kalabus tagala piąo. Gedu widai bage, dage duga gedugo ma sueibao.’ Kalabus sęgo tabibo bage augwaligo sę togolomainu agai ena tagala palai dao.

Malakai 4:2

“Tiali goli dage eno po wali pabo we bidi, te eno bomogo dage ma saibao. Eno bomo te giliga ulago bomo tiwai elalu, tama dage we bidi te giligago tigi dili ilibo tiwai yaibao. Te dage wiegi yai pemene eyu, te bulmakau wai dabe te banis tomode bidai te buluba dinibo side te sasa mano pabo tiwai ebo dao.

Esekiel 47:1

Tialima, te bidigo ena Godigo tempel be polalubo sunumiba ma odasa asali. Tama eno te ąį te sunumi dologodu pedelama, tama giliga asoboba geasa pabo suali. Magi baso meni. Godigo be giliga pedaloboba gesabidi tonalubo suali. Tama te ąį te sunumi saut badu pedelama, tama te ąį te saut badu te alta sesegedu peyu, te alta edelebo suali.

Godigo Nogi Ugwaba Sabo Tęąbi Po Wabo Buku Dabe 147:3

Te dwai sęgęgo te augwali homu dolama, te augwa dwai dene ebo we bidi dabe, te agai usu ma ilibo dao. Tama agai te augwaligo keni sįsįbo dao.

Hosea 14:4

Genuai Bidigo te po wai, “Tialima, ena te tagalali we bidi dabe eno ma dobola saibao. Te eno haligago augwali godolo mu eyu, te eno augwaliba wado yabo homu begelama, munu me egobeo.

Jeremaia 17:14

Genuai Bidi, eno homugo nago ena gasi usu ilama, te ena wiegi yai ma pedelaio. Nago ena me selama, te ena bugagia bidainogo yao. Eno nageba naga genuai nogi mabo dao.

Aisaia 6:10

Magi baso meni. E we bidi hanigo homu kolesaga te puna pai dao. Tama augwaligo odogo po odobo hagela eyu, tama augwaligo augwa gedu palia sai. Tiyu, augwaligo gedugo te magi nai me deli suidali weyu tiali, tama augwaligo odogo po odidali weyu tiali, tama augwaligo homude te po page ma koneama, tama augwali begasa, enaba ma aselama, tama eno augwali usu ma ilidali weyu, augwaligo tama kolesaga yai dao,” wali.

Sekaraia 14:8

Te sogo te wiegi yai ąį te Jerusalemde pedelama te soaibao. Te ąį me badu bugai te sigi ąį Detsiba peyu, te bugai me badu te genuai tamu ąį nogi Mediterenianba paibao. Te soabo ąį te tulubage tulubo sogo me te giliga nanobo sogo soaibao. Te ąį me sula sogobeo wali.