Kraisgo Geme Dualali Sę Pedelabo Po Jonbolo Ola Mani 14:15 - Godigo dwagi yai po buku

¹⁵ Tama gasa ensel mobo bidi te Moni Lotu Be tempel bede bidai buluba soali. Agai te dagalu pǫde dulalubo bidi dali bomonama i weyu, te po wali, “Nago hwągo te nai togwao. Tigidali tǫde elalubo nai te inilama tau ela silali dao. Tama megi da, te nai sabo sogo dao,” te po wai.

Kraisgo Geme Dualali Sę Pedelabo Po Jonbolo Ola Mani 14:15 Referans Kwoze

Joel 3:13

“Te hani we bidi dabe te dwai mu dao. Te augwali te bidigo inawai tau yai wit nai togobo tiwai togwao. Te augwali bomonama agawaibao, bidigo te wain wai ge du te sągągo agabo tiwai yao. Te halobage tiwai nai te mu pągąna pelama, te wain ąį buluba gelaibao. Tialima, te hani dabe mu dolaibao,” wai dao.

Dwagi Yai Gesi Po Makgo Asęani 4:29

Tama nosali te nai genuai elama te nai inabo si da, teda te bidigo te hwą ge dali sę yaibao. Te nai sabo sogo bodolu te pedalali dao,” Jisasgo te po wai.

Matyu 13:39

Te boi bidigo dwai noswai ge tedela bilagasali, te bidi da Satan dao. Te nai sabo sogo bodolu wali, te e tǫ silabo sogo dao. Te gi nai sabo bidi dabe augwali da, te Godigo sę ebo ensel mobo bidi dabe naga dao.

Jeremaia 51:33

Tigidali Bomo Elalubo Genuai Bidi, aga Israelgo God, agai e tiwai po wali, “Te boi bidi dabego Babilon agabo te bidigo tubo nai wit agabo tiwai yaibao. Bidigo te tau yali nai togobo tiwai eyu, te boi bidi dabego Babilon togolama, dolaibao. Tama te sę yabo sogo pąba pedelalio,” wali.

Kraisgo Geme Dualali Sę Pedelabo Po Jonbolo Ola Mani 14:18

Tama gasa ensel mobo bidi me ma te nai ula mabo alta saide bidali tagalama asai. Te ensel bidi agai te sia tonalubo bomo elaluai. Te ensel bidi agai te poa pai hwą ge tolalubo ensel mobo bidibolo i bomonama mu wai. Agai te po wali, “Nago naga te poa pai hwą ge selama, tama nago te tǫde te wain bonode walali du tigidali togolama, tama sisinama elaluao. Te tigidali nai polo inilama tau yai dao,” agai te po wai.

Matyu 13:30

‘Dagego te si dali si holomainao, te si holama, tama te nai sabo sogode te usu naibao. Tama te nai sabo sogo eno te nai togwa sabo sę ebo bidi augwalibolo te po waibao, “Dagego te dwai noswai bolo hasia sisinama, tama dunama, siade ulainogo kęnama muao. Tiali goli, dagego te wit da, te te sisinama te eno nai mubo beba muao,” eno te po waibao,’ te bidigo te po wali,” Jisasgo te po wai.

Kraisgo Geme Dualali Sę Pedelabo Po Jonbolo Ola Mani 16:17

Te a naga olama me badu nogo si wali ensel mobo bidigo aga pou te wali elalubo digi gelai. Tama te Moni Lotu Be tempel be tomode te God dulalubo digi tuni bidi bidibo nai tedu te pedauwali me delidu i bomonama wali, tama te i wali te bulu badu pedalai. Agai te po wai, “Te sę megi tama silai dao,” te po wai.

Matyu 23:32

Tama tibaso, megi da dage pelama, duga wąį dabego yali dwai kolesaga usu nigi pao.

Kraisgo Geme Dualali Sę Pedelabo Po Jonbolo Ola Mani 15:6

Tama te nogo a naga te me badu nogo si ensel mobo bidigo te a naga olama me badu nogo si te bidi dolabo dwai nai mu tolaluai, te augwali te Moni Lotu Be tempel bede bidali tagalama buluba teda asai. Augwaligo magi meda mu meni yai tedela yai te ula mu yai ugwa gudai. Tama augwaligo te kapa golgo nigai kukulu te augwa hagawiade bagulama muai.

Kraisgo Geme Dualali Sę Pedelabo Po Jonbolo Ola Mani 14:14

Tialima, eno ma tonono bilibadi, tama eno suali, te tedela yai dagalu pǫ me deli elaluai, tama bidi me deli te pǫde dulaluai, te da tǫde bidi tiwai, aga te Godigo Bidi Mu tiwai dao. Te agai tobolude te kapa golgo nigai wiegi yai madi elaluali, tama agai poa pai hwą ge mu agai nogode tolaluai, te gi nai togobo hwą ge dao.

Kraisgo Geme Dualali Sę Pedelabo Po Jonbolo Ola Mani 6:10

Tama te noma bidi augwaligo i bomonama weyu tama wai, “Tigidali nai tonalubo Genuai Bidi, nage magi sę me esiąyu wiegi yai mu bidibo, tama nago kolesaga te mu naga ebo dao. Te tǫde we bidi augwaligo dwai sę da dali elama, tama da ela muani. Tede dago homugo nago augwali dali po tų eyu, dago kanemede augwalibolo wei ponao. Nisu naga sogo bidai madigi tama nago augwalibolo wei nisu ponaibawe?” te po wai.

1 Tesalonaika 2:16

Tama boi bidi mu bidiyu, augwaligo dago sę yabo tų pania sabo sę ebo dao. Tama te Juda hani isiąwai we bidi Godigo augwali ma somainogo, dago Godigo po augwalibolo pusainogo ebadi, te Juda bage augwaligo da dali “Te po wagio,” wabo dao. Tama tiyu, augwaligo dwai sę yali te hauwa mu yai dao, te genagi naigo pągąwai tiwai. Tialima, God agai moni sębę ebo augwali pąba mu bidagasai elalubao.

Kraisgo Geme Dualali Sę Pedelabo Po Jonbolo Ola Mani 13:12

Te nosali pedalali genuai dwai hudigi ebo hasa agai te hasia te dwai hudigi ebo hasago sę yabo bomo tigidali sai, tama agai sę te bomogo te hasia hudigi ebo hasago gesabide te sę yai. Agai te mani bomogo te tǫde we bidi tigidali augwaligo te hasia hudigi ebo hasabolo aga nogi ugwaba sabo po wabo sę ilali, te hasia hasa polobadu gasa bidigo aga te ela muainogo yali dwai keni te pedala sai.

Aisaia 62:1

Jerusalem, nage tobade te eno po hanilama, bomo elama weyu, te Genuai Bidigo nageba wiegi yai sę yao po obao. Te eno pedauwali me pania sogobeo. Mu menio. Te eno Genuai Bidiba i udu, te Genuai Bidigo te bugagia wiegi yai doloba pai kolesaga nageba eyu, te kigamu nanobo giliga ula tiwai eyu, te hulide domanobo sole ula ebo tiwai teba usu numainogo yaibao.

Tigidali Nai Gagalama Nigali Side 15:6

Tama Abramgo te po mu po naga dao homu eyu, tama te Yawego wali po aga homude dąų wai. Tama tibaso, Yawego aga doloba pai bidi nogi poai dao.

Kraisgo Geme Dualali Sę Pedelabo Po Jonbolo Ola Mani 11:19

Augwaligo po ola silama, tama augwaligo te Godigo dagalude elalubo Moni Lotu Be tempel te be tų dawai. Tama polobadu Godigo te Israel we bidi dali po dąų olama, tama augwaligo te asęani po te halobage me deli tomoba muani. Tama te halobage te Lotu Be tomode munalubo eno hania suali. Tama te sogo tama te be sele eyu, tama moni u wabo me, te be kulu wali me, tama tǫ mali ebadi, te kedau ebo nai talua ge tulubage hauwa te dagaludu tǫba tulaluai.

Kraisgo Geme Dualali Sę Pedelabo Po Jonbolo Ola Mani 14:16

Tibaso, te pǫde dulaluali bidi agai te hwą ge nogogo tolaluyu, tama agai te tǫde elalubo inawai nai hwągo togolama sai dao.

Kraisgo Geme Dualali Sę Pedelabo Po Jonbolo Ola Mani 14:17

Tama gasa ensel mobo bidi te Moni Lotu Be tempel bedu buluba teda soai. Agai me te poa pai gi nai togobo hwą ge nogode tolalubo dao.