Godigo Nogi Ugwaba Sabo Tęąbi Po Wabo Buku Dabe 50:14 - Godigo dwagi yai po buku

¹⁴ “Te dagego enaba usu da mu waiyąo, tebo te dagego yabo ofa tiwai tama. Te dagego te enaba olo mabo tigidali nai maiyabo po wali, te Ugwadu Bidibo God Mu te enaba dagego maiyąo.

Godigo Nogi Ugwaba Sabo Tęąbi Po Wabo Buku Dabe 50:14 Referans Kwoze

Hibru 13:15

Tama tibaso, Jisasgo nogide Godibolo wiegi yai homu pemene elama, tama dago te aga nogi ugwaba sabo kolesaga te sesemane sogo agabolo mayu, te ofa tiwai yao. Awe, dago pedauwaligo aga dago Genuai Bidi dao te po wabogo dago Godibolo dena ofa tiwai mabo dao.

Godigo Nogi Ugwaba Sabo Tęąbi Po Wabo Buku Dabe 56:12

God, te polobadu eno yaiba olama po dąų wali sę, te sę eno yaibao wali. Nago ena ma dobola saligo tama, ena me isibeo. Nago ena tau saligo te boi bidi dabego ena me aiyaba elalubeo. Tama tialima, God, ena te nage dali sesemane sogo bilibao, tama ena te nago ulade bilidubadi, te ena isiboba usu naibao. Tama eno nageba usu da mu weyu, tama eno te usu da wali po dąį iliyu, te eno ofa me deli yaibao.

Bomai Po 23:21

“Tialima, dagego Genuai Bidi dago God agabolo po me deli dąų olama wai baso da, teda dagego te po polo usu nao. Teda Godigo dagego dąų wali te po gegeda pogobeo, tama dagego te dąų wali te po usu nisąma ebaso da, teda Godigo gedude sęgę saibao.

1 Pita 2:5

Tama bidi me deligo aga bidabo be te masigigo sę ebo tiwai te Godigo dage aga we bidi hani ilibo dao. Tama tiyu, dage tedali gasagi yai magi sę isiąwai we bidi hani bidaibao, te pris bidi hani tiwai. Tama te pris bidi dabe augwaligo Godibolo dwagi yai nai ula mabo sę eyu, tama agabolo ofa nai mabo dao. Tama tede Godigo dwagi yai homu ebo dao. Tama te tiwai me Krais agai dage tau selama, dagego Godigo homu wali peyu dwagi yai sę yaibao. Tama dagego te dwagi yai sę te tiwai ebaso, God agai te dagego ebo sęde dwagi yai homu yaibao.

Hosea 14:2

Dage te Genuai Bidiba ma aselama, tama te gedu haluasa po dagego Godiba te ofa tiwai iyagameo. Dagego gedu haluasa po e tiwai wagameo, “God, nago dago sęgę tigidali sela sąyu, tama dago gedu haluasa po wabo odao. Tama dago te bulmakau elama, tama nageba ofa ebo usu egobeo. Menio. Te dago te dena polobadu dąų walali po wali gilama, te dwagi yai kolesaga naga yaibao.

Godigo Nogi Ugwaba Sabo Tęąbi Po Wabo Buku Dabe 76:11

Nago te naga Genuai Bidi Godiba te bomai po dąų walali, teda nago te dąų walali po wali pao. Nago tibo po me wagio. Dago te Genuai Bidide wi elama, tama tiyu, te tigidali we bidigo te agaba wiegi yai olo maiyabo nai dabe selasa pao.

1 Tesalonaika 5:18

Te dage dali magi sę me ebaso da, dagego God dali buba hwi po wao. Te dage Krais Jisasde wadolama, tama God agai homugo dagego tama kolesaga emainogo tebo dao.

Polgo Po Pas Rom Dabeba Asęani 12:1

Eno ama dede, eno homugo te Godigo da dali homu dene eyu tama haniani olo tau mani wiegi yai kolesaga genuai mu yali, eno te homu ebaso, eno e po megi dagebolo hanilibao. Bidigo hasa ela munama tama Godibolo olo mabo sę, te ebo sę nogi poai te ofa dao. Tama te tiwai gilama dagego duga tigi te Godibolo olo mabo ofa tiwai yao. Te tigi bidibo ula elalubadi tama dagego Godibolo menama, tama te God aga deliba naga mao, te dwai sę me isąwai nai ofa dao, tama dagego te Godigo godolo ebo kolesaga yaibao. Dagego tama tiyu, tama dage te tiwai God dologode bidiyu, tama duga lotu po mu te Godibolo waiyąo.

Godigo Nogi Ugwaba Sabo Tęąbi Po Wabo Buku Dabe 50:23

Te enaba usu da weyu, gedu haluasa po weyu, te enaba ofa mabo tiwai ebo bidi, agai te eno nogi ugwaba sobao. Tama eno te po wali pabo bidi dabe te eno ma dobola saibao,” po wai.

1 Pita 2:9

Me ma, dage da, dage te sa muani we bidi hani dao. Bidi meba augwali te we bidi dali, God dali tomode bidiyu, tama pris bidi sę eyu, augwaligo Godibolo te dwagi yai nai ula mabo sę ebo dao. Tama te tiwai dagego me te dago genuai tuni bidigo sę ebo dao. Dage da, te tedali gasagi yai doloba pai we bidi hani dao, God aga we bidi hani mu te dage dao. Tama agai dage i olama, tama dage te hulia sai bidibo digi tagalama, tama agai wiegi yai ula yai buluba bidagasai dao. Tama dagego agai yali wiegi yai sęde po te gasa we bidibolo pusumainogo te agai dage sa muani.

Nahum 1:15

Suao. Bidi me deli te bulu du sunumi dabedu asiyu, te wiegi yai po selasa asobao. Aga asobo te hwįani silali po pusagasu asobao. Tialima te Juda we bidi dabe, dage te genuai side sisinama, te Godiba lotu weyu, tama agabolo dagego te mawaiba po dąų wali nai maiąo. Tama te bidi dwai dabego te dagego tǫ somainu ma egobeo. Godigo augwali dolai dao.

Godigo Nogi Ugwaba Sabo Tęąbi Po Wabo Buku Dabe 147:1

Te Genuai Bidigo nogi ugwaba sao. Te dago balia po weyu, tama te dena God nogi ugwaba sabo te wiegi yai dao. Te agai nogi ugwaba sabo te wiegi yai doloba pai kolesaga dao.

Godigo Nogi Ugwaba Sabo Tęąbi Po Wabo Buku Dabe 65:1

O God, da te Saionba pelama, tama nago nogi ugwaba saibao. Te kolesaga ebo te usu mu yaibao. Tama dago te po dąų waliyu, te polobadu yaiba wali sę tigidali usu nama yaibao.

Godigo Nogi Ugwaba Sabo Tęąbi Po Wabo Buku Dabe 27:6

Tama tiyu, te ena bobegelalubo boi bidi dabe augwali eno aiyaba elaluaibao. Te eno wiegi yai homu pemene umabo mu elama, tama i weyu, te Godigo tedali wiegi yai bede ofa yaibao. Te eno aga nogi ugwaba sabo balia po waibao.

Godigo Nogi Ugwaba Sabo Tęąbi Po Wabo Buku Dabe 22:25

Te lotu wainu sisinibo genuai pesagede te eno nago nogi deli naga ugwaba saibao, te nago ebo sę tigidalide te tama tiaibao. Te polobadu eno yaibao po dąų wali ofa, te eno te nagede wi ebo we bidi gedude yaibao wali.

Godigo Nogi Ugwaba Sabo Tęąbi Po Wabo Buku Dabe 61:8

Nago tama tibaso da, teda te tigidali side te eno polobadu te po nageba dąų walali po, te eno wali peyu, tama eno nago nogi ugwaba sabo tęąbi po te sesemane bidada pabo sogo udaibao.

Bomai Po 23:22

Me ma, dagego Genuai Bidiba po me dąų wasiąma yali da, teda dagego sęgę me sogobeo.

Bomai Po 23:23

Tiali goli, dagego duga digi duga homugo Genuai Bidiba po me dąų walai baso da, teda dagego te dąų wali te po wali pelama, tama mu tama yao,” wali.

Bomai Po 23:24

“Tama dagego duga abagi dedego wain gidu nogegi soayu da, teda duga homugo te wain du meba selama tuiąo. Tiali goli, dagego te du hauwa wade bulama, sela pelamo dao.

Jopgo Po Asęani Elalubo Buku 22:27

Tama nago agaba gedu haluasa po olama, tama agai nago gedu haluasa po wabo odama, tama nago hanalubo nai dabe nage mawaibao. Tama naga Godide dąų wali po wali peyu, dwagi yai homu elama, te dąų walali po usu naibao.

Godigo Nogi Ugwaba Sabo Tęąbi Po Wabo Buku Dabe 22:26

Te magi nai doado bage meni yai bidi augwali eno i obaso, augwali aselama, te nai tulama, haliga mu pągąna paibao. Tama te Godiba pabo bidi dabego, teda augwaligo aga nogi ugwaba saibao. Eno homugo Godigo augwali sesemane sogo bugagia wiegi yai ilama, bidimainu yao.

Godigo Nogi Ugwaba Sabo Tęąbi Po Wabo Buku Dabe 69:32

Te sęgę tolali we bidi dabe augwaligo te sulama, tama wiegi yai pemene yaibao. Tama te Godiba lotu wabo we bidi dabe, augwaligo te bomo ma saibao.

Godigo Nogi Ugwaba Sabo Tęąbi Po Wabo Buku Dabe 76:12

Agai te hagoma ebo king dabe te aiyaba elalueibao. Agai te tǫde king dabe te wi mu ilibo dao.

Nahum 2:1

Te boi bidi dabego te Israel dabe dolama, tama augwaligo te wiegi yai nai doado bage tigidali sela palio, tiali goli megi Genuai Bidigo homugo te Israelgo genuai nogi ma ilaibao, te polobadu tiwai yaibao. Te Ninive dabe, te boi bidi dabego dageba boi hwįagasai dao. Te dage dolabo bidi dabe asalio. Te duga ami bidi dabe te taungo genuai obode tonalumainu muao! Te sunumi dabede tonaluao! Dage te bomo elama dolalu, te hwįabo sisi elaluao!