Godigo Nogi Ugwaba Sabo Tęąbi Po Wabo Buku Dabe 47:1 - Godigo dwagi yai po buku

¹ Dage tigidali we bidi, te wiegi yai pemene elama, nogo elao. Dagego wiegi yai pemene ebo i weyu, tama Godigo nogi ugwaba sabo tęąbi po wao.

Godigo Nogi Ugwaba Sabo Tęąbi Po Wabo Buku Dabe 47:1 Referans Kwoze

Godigo Nogi Ugwaba Sabo Tęąbi Po Wabo Buku Dabe 106:47

God, dena Genuai Bidi, nago da te gasa hani dabego nogode ma sao. Tama nago da te dena tǫba ma odasa asao. Tama tiyu, dago nageba homu kone paliyu, te nage tedali wiegi yai mu da, te homu elama, tama dago nago nogi ugwaba siyu, tama nageba te usu da weyu, te wiegi yai pemene dali mabo dao po wagameo.

Godigo Nogi Ugwaba Sabo Tęąbi Po Wabo Buku Dabe 98:4

Dage tǫde we bidi dabe i hae weyu, Genuai Bidiba pemene yao. Te bugai haliga ebo tęąbi hodolama weyu, tama agai nogi ugwaba sao.

Jeremaia 31:7

Genuai Bidigo te tiwai po ma wali, “Te Jekopgo haniba wiegi yai pemene ebo tęąbi po wao, te hanigo te tigidali gasa hani dabe edelama, polalubo mu dao. Te enabolo genuai nogi mabo tęąbi weyu, te tiwai po wao, ‘Genuai Bidi, naga we bidi dabe ma sao, te me badu bidali hani Israel pedai dao,’ te po wao.

Aisaia 55:12

“Te dage wiegi yai pemene elama, Babilon taga somainu elama, te dage eno odasa asiyu, te dage wi ilabo magi sę deli me pedalugobeo. Te bulu du dabego wiegi yai pemene ebo tęąbi po weyu, te ni dabego pemene homu elama, augwa nogo elaibao.

Godigo Nogi Ugwaba Sabo Tęąbi Po Wabo Buku Dabe 46:1

God aga te da seselalubo bidi da, tama agai sesemane sogo da bomo mabo dao. Aga te pąde bidiyu, te dago genuai sęgę sabo sogo tau sainu sisi elalubo dao.

Godigo Nogi Ugwaba Sabo Tęąbi Po Wabo Buku Dabe 47:5

God te dagaluba pali. Te Genuai Bidi ugwaba holali sogo, te we bidi dabe wiegi yai homu pemene elama, tama bomonama i weyu, tama biugel bu weyu dali yai.

Te Israel me Juda Hani Sigo Tuni Bidigo Po Elalubo Buku Si 11:12

Ami soldia bidi dabe dola selama silali, tama tilama, te pris Jehoiadago te Joas odasa te buluba teda aselama, tama agai te Joas tobolude te kingo wiegi yai madi bulali. Tama me agai te Joasbolo te bomai po elalubo buku me deli agabolo mani. Tama nosali augwaligo te oliv wel te Joas agai toboluba gelali, te aga king bidi nigiliyu, te dąį ilama tama tiali. Tama te tigidali we bidi dabe augwaligo bugai homu pemene eyu, tama augwaligo nogo eleyu, e tama tiwai i wali, “Joas, dena homugo nage king bidi bidiyu, te bobobage sogo mu bidagameo,” wali.

2 Samuel 6:15

Tama te tama kolesaga yaligo te Devit dali te tigidali Israelgo te Genuai Bidigo Dąų Wali Bomai Po Muani Halobage te Jerusalemba selasa soali. Augwa wiegi yai homu pemene eyu, tama i weyu, tama te bu wabo nai biugel dali pomono pai dao.

Sekaraia 9:9

Dage Saion taun Jerusalem we bidi dabeo, dage homu pemene umagia mu eyu, hae wao. Suiąo. Dagego king te asobao. Te agai bidi dabe aiyaba elaluali genuai nogi elalubao. Tiali goli, agai nogi aga digi ugala me sabeo. Menio. Aga te nogi meni yai bidi asobo tiwai eyu, aga te donki kibu me deli daide ugadu dugulasa asaibao. Aga te ogwa bidi donki kibude dugulasa asaibao wali.

Sekaraia 4:7

Tialima, genuai nai dabe te bulu du tiwaigo nago sunumi palia sobaso da, teda eno tigidali sela sąwaibao. Tama nago eno be ma sę yaibao. Tama nago namba wan masigi aga pesagede mubo si da, teda te we bidigo hai bomona weyu e tama po waibao, ‘Te da, wiegi yai be mu dao,’ augwaligo te po waibao,” wali.

Godigo Nogi Ugwaba Sabo Tęąbi Po Wabo Buku Dabe 98:8

Te genuai soabo ąį dabe, dagego te nogo eliyąo. Tama te bulu du dabe, dagego tęąbi weyu, te Genuai Bidi gedude pemene yao.

Tuni Bidi Dabego Po Elalubo Buku Si 13:15

Tama te Juda dabego i hai bomo elama geninama mu wali. Tama augwaligo te hai wabo si, Godigo Jeroboam aga hani dali wi ilama, augwa wi pomainu ilali.

1 Samuel 10:24

Tialima, Samuelgo te we bidibolo te po wai, “Te Genuai Bidigo sa muyu nigilali bidi suao. Te tobage bidi tiwai me deli te da tomode me menio.” Tama tigidali bagego po dagą genuai olama, i weyu, te tiwai wai, “Aga te dago king bidi dao. Aga te kibu be hauwa te king bidimainao!” wali.

Sefanaia 3:14

Dage Israel dabe, dage i olama, homu pemene ebo balia po waiąo. Dage Saionde bidibo bage, dwagi yai homu eyu, tęąbi po waiąo. Dage Jerusalem dabe, dage wiegi yai homu elama, homu pemene geninama mu iyąo.

Godigo Nogi Ugwaba Sabo Tęąbi Po Wabo Buku Dabe 42:1

Uni hasa te węde nogene eyu, tama te tubo dwasianu węba udua pabo dao. Tama te tiwai naga, God, eno homu wei eyu, te nage pąde bidabo homu ebao.