Godigo Nogi Ugwaba Sabo Tęąbi Po Wabo Buku Dabe 138:2 - Godigo dwagi yai po buku

² Eno te nago tedali wiegi yai tempel bego gedude kidu sugunama, tama nago nogi ugwaba sobao. Magi baso meni, nago ena sesemane sogo godolo mu elama, tama nago ena bugagia tonalubo dao. Nago dabolo ola manio, nage dali, te nago po dali, te mu polalubo dao.

Godigo Nogi Ugwaba Sabo Tęąbi Po Wabo Buku Dabe 138:2 Referans Kwoze

Matyu 5:18

Te eno mu po dagebolo obao. Te dagalu dali tǫ si silisąbadi da, tama te asęani bomo yai po dwasianunu me deli munu me siligobeo. Menio. Te po tigidali augwali elaluaibao. Tama elalubadi te bomo yai pogo aga sę tigidali silaibao. Tama aga sę silibaso da, te sogo naga te bomo yai po me silaibao.

Aisaia 42:21

Genuai Bidigo te doloba pai kolesaga naga eyu, tama agai te we bidi dabe ma dobola sabo kolesaga ebode dwagi yai homu ebao. Tama tibaso, aga bomo yai po dageba mobao, te gasa bage dabego sulama, te tiwai konemainu ebao, te bomo yai po te wiegi yai mu, te mu polalubo dao.

Godigo Nogi Ugwaba Sabo Tęąbi Po Wabo Buku Dabe 56:10

Eno te Godiba homu konealu, tama eno agai dąų wali poba homu konealuai. Tama tiyu, eno agai nogi ugwaba sabo dao. Mu tama, eno te Genuai Bidigo dąų walali poba homu kone palama, tama eno aga nogi ugwaba sabo dao.

Matyu 24:35

Te dagalu de tǫ si da, te silaibao, tiali goli eno po da, te munu me sia sogobeo,” Jisasgo te po wai.

Godigo Nogi Ugwaba Sabo Tęąbi Po Wabo Buku Dabe 5:7

Tiali goli, nago ena sesemane godolo mu ebo da. Tama ena te nago be tomoba asabo usu ebo tiwai yali. Eno te kidu sugunama, te nageba te nago tedali genuai lotu be tempel tomode lotu obaso, te usu yaibao.

Godigo Nogi Ugwaba Sabo Tęąbi Po Wabo Buku Dabe 28:2

Te eno nageba i weyu, nago ena tau sao wabo sogo, te nago eno gela wabo odao. Eno gedu haluasa po weyu, tama eno nogo ugwaba siyu, te nago wiegi yai be elalubo madiba nogo dų yaibao.

Dwagi Yai Gesi Po Jongo Asęani 1:17

Te bidi nogi Moses agai da Juda dabego wąį mu augwalibolo agai Godigo bomo yai po ola mawai. Tiali goli, Jisas Krais agai genuai olo tau sabo sę dali mu po dali si magasai.

Godigo Nogi Ugwaba Sabo Tęąbi Po Wabo Buku Dabe 56:4

Eno konealubo homu Godiba kęą pelama, tama eno agai mu poba homu konealubao. Tama tiyu, eno agai nogi ugwaba sobao. Eno konealubo homu Godiba munama, tama ena te magi nai mede wi me egobeo. Te bidi dabego mena sę enaba yaibawe? Menio.

Godigo Nogi Ugwaba Sabo Tęąbi Po Wabo Buku Dabe 115:1

Genuai Bidi, sesemane sogo nago da wei mu ebo da, tama nago da me tagalubo menio. Tama tialima, dago nago genuai nogi naga ugwaba saibao. Dago digi dena nogi ugwaba me sogobeo.

Daniel 6:10

Tama Danielgo te po dąų walali po odobo sogo, aga te aga beba hogodasa palio. Tama aga te ugwa badu elaluali be habu dai badu holama, tama te windo pąde kidu sugunama, te Jerusalemba tonono yalio. Tama agai te sesemane sogo gedu haluasa po weyu, te nage usu da po te Godiba wabo tiwai yali. Agai te deli deli sogo bubugade te gedu haluasa po sela sogo weyu yai dao.

Aisaia 63:7

Te eno Genuai Bidigo wiegi yai olo mu tau sabo kolesaga po pusubao. Te eno aga nogi ugwaba siyu, te agai da tau siyu, wiegi yai kolesaga hauwa yali po pusaibao. Awe, te aga genuai olo mu tau sabo wiegi yai kolesaga, me homu dene ebogo, agai te Israel haniba wiegi yai sę mu yalio.

Godigo Nogi Ugwaba Sabo Tęąbi Po Wabo Buku Dabe 99:9

Te dena Genuai Bidi Godigo nogi ugwaba sao. Tama aga bulu dude te agaba lotu wao. God, dena Genuai Bidi, aga te tedali wiegi yai mu bidibo dao.

Godigo Nogi Ugwaba Sabo Tęąbi Po Wabo Buku Dabe 99:5

Dagego te Genuai Bidigo nogi ugwaba siąo, aga te dena God dao. Dage pąba pelama, tama agaba lotu waiyąo. Aga te tedali wiegi yai mu dao.

Godigo Nogi Ugwaba Sabo Tęąbi Po Wabo Buku Dabe 86:15

Tiali goli, Genuai Bidi, nagede te homu dene ebo, me olo tau mabo wiegi yai kolesaga pągąnalubao, tama nage da, te bobobage guni yai bidi dao. Nago da wei mu eyu, tama nago homugo da dali kęą mu pai dao.

Godigo Nogi Ugwaba Sabo Tęąbi Po Wabo Buku Dabe 85:10

Te sogo da, te we bidi dabego te gasa bage wei mu elama, tama wiegi yai kolesaga augwaliba yaibao. Tama augwa dolasa bidiyu, tama haliga nagame elama, tama hodobo bugagia bidaibao.

Dwagi Yai Gesi Po Jongo Asęani 10:35

Tama dago koneai, Godigo te bukude asęani po te mu po tigidali sogo mu po dao. Tama te po tomode God agai te gasa we bidi tonalubo we bidi augwali god dabe dao wai. Te we bidibolo God agai po mawai dao.

Te Israel me Juda Hani Sigo Tuni Bidigo Po Elalubo Buku Deli 8:15

Tialima, agai te tama po wali, “Te Godigo nogi ugwaba sao,” wali, “te Israel dabe dago Genuai Bidi dao. Magi baso meni. Aga digi agai te eno aya Devit dali dąų wali po te bugagia wali pali. Devitgo homugo te we bidi God pąba sisinagasabo be me deli sę emainu homu yai, te dago Genuai Bidi, te agaba lotu po omainu yali. Tiali goli, Genuai Bidigo agabolo te tama po wai, ‘Te eno ena we bidi te Isipde gagalasa sela asali, te megi sogoba usu nagasu, eno te Israel dabe augwaligo enaba lotu omainu ebo be sę yabo te hani me deligo hanu me deli te eno sa me musiąwai dao. Tiali goli, Devit, eno nage sa muani, te eno we bidi nago tonalumainu yali. Nago te eno genuai be me deli sę yabo homu ebo, tama nago te ebo homu te wiegi yai homu dao.

Te Israel me Juda Hani Sigo Tuni Bidigo Po Elalubo Buku Deli 8:20

“Genuai Bidigo te bomai po dąų waligo da, tama megi da, agai te tigidali usu nanio. Eno te ena aya Devitgo sę yali pesage hasegelama selama, tama ena te dage Israel bagego king bidibao, te Genuai Bidigo bomai po dąų wali gilama te tiwai yali. Tama te dena Genuai Bidi te Godigo be me deli te eno sę yani, te da Genuai Bidi pąba pomainu yabo be dao.

Te Israel me Juda Hani Sigo Tuni Bidigo Po Elalubo Buku Deli 8:24

Naga digi nago te eno aya Devit te naga sę bidi dali polobadu te bomai po dąų wali, tama naga digi te po bugagia wali pelama, tama megi da, nago naga te dąų wali bomai po te usu nani dao,” wali.

Godigo Nogi Ugwaba Sabo Tęąbi Po Wabo Buku Dabe 5:8

God, te boi bidi hauwago ena dolainu ebao. Tama tiyu, nago eno sągą dodolobaso, teda eno nago doloba pai kolesaga wali paibao. Awe, te nago homugo ena somainu homu ebo sunumi te enaba ola mao.