Obadia 1:12 - Godigo dwagi yai po buku

^12-14 Genuai Bidigo te po me wali, “Dagego te duga ama dede te Juda dabeba yali sę hauwa te dolo yai sę me ebeo. Dagego te augwali dwai dene sabo sogo, te dagego bugai haliga eyu, wiegi yai homu pemene yali. Te dagego hagoma eyu, te augwali dwai dene ebadi, te gagali ilibo po wali. Te eno we bidi augwali dene sabo sogo, te dage augwaligo taun tomoba pelama, te augwali dene sabode te wiegi yai homu pemene elama, te augwaligo wiegi yai nai dabe elali. Dage te sunumi tumage age siba doligi pelama, te meba Juda wi painu sobadi, te pageabi elama tualio. Tama dagego augwali te boi bidi dabego nogoba muani. Dagego te yali sę dabe, te dolo yai sę mu me ebeo,” wai dao.

Obadia 1:12 Referans Kwoze

Maika 4:11

Megi da, te boi bidi hauwago te dage dali hwįainu sisinanio. Augwaligo posobo po te tiwai obao, “Tegobao, dago te Jerusalem mu dolama, tama suao, aga te tiwai naga me elalua pomainu yaibao,” obao.

Esekiel 35:15

Dagego te eno we bidi Israel dabe dolobode dage wiegi yai homu pemene yai dao. Tialima, eno dage Idom dabeba me deli tiwai sę naga elama, dage Idom dabe me dolaibao. Tama te bulu du Seir, me te gasa bulu dabe te kantride elalubo bulu dabe te olo bulu mu pedelaibao. Tama te Israel dabe augwaligo e tama bugagia koneaibao, ena deli naga ena Genuai Bidi dao homu yaibao.’ Te po te Idom bagebolo wao,” Genuai Bidigo enabolo te po wali.

Bugagia Bidibo Kolesagade Po Asęai Buku 17:5

Godigo tigidali bidi nigali. Tama tiyu, te bidi me deligo te magi doado bage meni yai bidi dabeba te dwai posobo po obaso da, te agai Godiba te dwai posobo po obao. Te bidigo suali, te gasa bidi dolai baso, te aga homu wiegi yai pemene ebaso da, te aga digi dwai dene saibao.

1 Samuel 2:3

“Da we bidigo bugagia koneao, Genuai Bidi aga God te dago ebo sę tigidali koneama, tama agai dago ebo kolesaga dagalubao. Tama tibaso, dage we bidigo duga digi duga nogi ugaba siyu, te po dagą wabo, dage pedauwali pania selama, tama te tobage po wabo tagaliąo.

2 Pita 2:18

We bidi meba augwali te Godigo po odisąwai bage tomode bidai digi, tama tamadi tama augwaligo te kolesaga ebo tagalali. Tama te we bidi dabebolo te tibo po ola mabo bage augwaligo te genuai po weyu, tama augwaligo te dwai kolesagade te po dwai dabe wabo dao. Augwaligo te homu begelai we bidi te homu hodolobo kolesaga eyu, te penani me te tigigo haniani dwai kolesagago augwali te dwai kolesagaba ma kekebo sę eyu tama augwali te kolesaga wali pabo dao.

Jutgo Asęani Pas 1:16

Te dage tomode bidibo tibo po ola mabo bidi dabe, augwali te tigidali pedalobo naide hagela homu eyu, tama sesemane sogo augwaligo gasa we bidide dwai homu naga ebo dao. Tama augwaligo tigigo ebo kolesaga hodolama, tama augwaligo te kolesaga naga wali pabo dao. Augwaligo genuai po weyu, tama augwa nogi augwaligo ugwaba sabo dao. Te gasa we bidi dabebolo augwaligo po mumubo po weyu, tama te bagego nai dabede pesą elama sabo dao.

Godigo Nogi Ugwaba Sabo Tęąbi Po Wabo Buku Dabe 37:13

Tiali goli, Genuai Bidigo te sogo me deli te bodolu pedalubo koneyu, tama te sogo te dwai sę ebo bidi dabe dolaibao. Tama tiyu, Genuai Bidigo augwaliba gisugu mabo dao.

Godigo Nogi Ugwaba Sabo Tęąbi Po Wabo Buku Dabe 31:18

Te bidi dabe augwaligo te hagoma eyu, te posobo po weyu ebo da, tama doloba pai bidi dabeba po dwai weyu ebo dao. Augwaligo tibo po naga wabo da. Nago augwali dolama, tama augwa pedauwali te mu pania somainu yao.

Godigo Nogi Ugwaba Sabo Tęąbi Po Wabo Buku Dabe 22:17

Eno tigi dili tigidali te hania pedelali. Tama te bidi dabego ena sulama, tama ena dolali sęde te augwa wiegi yai homu pemene yai.

Jopgo Po Asęani Elalubo Buku 31:29

“Ma, eno ena boi bidi dabe dwai dene sabo sogo me, teda eno augwali dene sobaso, usu da homu me yai menio.

Kraisgo Geme Dualali Sę Pedelabo Po Jonbolo Ola Mani 13:5

Tama Godigo te dwai hudigi ebo hasa sula tagalali, tama agai dwai dwai po ola biliyu, God dali posobo po weyu, “Ena, ena digi ena God dao,” te tobage dwai po weyu bidai. Tama tiyu, agai te dwai kolesaga eyu, te we bidi tonalubo sę yabo bomo te polua bidi sese si olama me si, te 42 polua tama te usu nama elaluai.

Jems 3:5

Te tiwai gilama, te da bidigo kele te dago tigide elalubo dwasianu nai dao. Tiali goli te kelego genuai po hauwa wabo dao, tama te wali pogo genuai sę ebo usu dao, te sę meba dwagi yai dao, meba dwai sę dao. Kone palao, te dwasianu sia dabogo te genuai sia mu deyu, tama te bulu tomode elalubo ni dabe tigidali te siago dainogo ebo te dagego konebo dao.

Dwagi Yai Gesi Po Lukgo Asęani 19:41

Te Jisas te Jerusalem moni be nani pąba asiyu, te be nani suyu, agai te be nanide bidibo we bidide homu dene eyu, gela wali.

Te We Bidi Dabego Jerusalem Hagede Gela Wali 4:21

Kantri Idom, megi nage Usgo tǫde bidibao. Megi da, nage gisugu dwai olama, tama nage Saion dolaibaso, wiegi yai homu pemene megi yao. Genuai Bidigo sębę te wain wę kapu deli tiwai dao. Tama agai te Saiongo te kapude tumainu ilalio. Tiali goli, agai nagebolo nosali me maiwaibao. Tama nage dolama mu polaibao. Tama nago naga tigide ugwa peda sąnama, tama nage hale genuai mu yaibao.

Aisaia 37:24

Nago po te naga ami tobolu bidi ofisabolo mayu, te augwaligo nago nogi ugwanu mu sali, tama te enaba posobo po wali. Te eno augwaligo pedauwalide te tiwai po odali, nage Senakerip, nage te naga karisde dolugulama, te nage ugwanu mu igulama, te Lebanon genuai bulu du dabeba te nago tobolu usu nama, nage te Lebanon genuai busi tomoba mu pali, te bidi me pisąbo buluba pali, tama nago te bobage bobage ni sida dabe, me te wiegi wiegi yai ni pain dabe togwali.

Godigo Nogi Ugwaba Sabo Tęąbi Po Wabo Buku Dabe 92:11

Eno te ena boi bidi dabe dolobo sulama, tama eno te dwai bidi dabego gela wabo odali.

Godigo Nogi Ugwaba Sabo Tęąbi Po Wabo Buku Dabe 59:10

Te eno God agai ena wei eyu, godolo mu elama, tama aga aselama, ena tau sagasali. Godigo te agai eno boi bidi dabe te aiyaba elalubo te enabolo sumainu yaibao.

Godigo Nogi Ugwaba Sabo Tęąbi Po Wabo Buku Dabe 54:7

Nago ena tau selama, tama enaba te pedelali tigidali sęgęgo te ena aiyaba me elalubeo. Tama eno suali, te nago eno boi bidi dabe aiyaba elalubo subo dao.

Jopgo Po Asęani Elalubo Buku 18:20

Tama te giliga asobo badu bidibo bidigo me, giliga dega sabo badu bidibo bidigo me, te dwai sę te bageba pedelali po odama, tama augwali noma selama, wi mu yaibao.

Godigo Nogi Ugwaba Sabo Tęąbi Po Wabo Buku Dabe 35:15

Tiali goli, te sęgęgo ena gegebo sogo, augwali sisinama, te wiegi yai homu pemene yai. Augwali sisinama, ena elaluainu yali. Te eno konesiąwani bidi meba, augwaligo enaba te dwai po kisilibo sę te toma me nabeo.

Te We Bidi Dabego Jerusalem Hagede Gela Wali 2:16

Te naga boi bidi dabego nagede kęnę po weyu, posobo po wabo dao. Augwali gisugu dwai mu weyu, e tama tiwai po obao, “Dago bomogo mu dao, dago te taun mu dolama, tagalali dao. Te taun Jerusalem dolali dao, dago. Tega! Dago te si tonaluali, megi da, te si polo megi pedelali dao,” boi bidi augwaligo te tobage po wabo.

Esekiel 35:12

Tama dage Idom dabego e tama bugagia koneaibao, ena Genuai Bidigo dage Idom dabego Israel tǫba dwai po e tama wabo odali da homu yaibao, “Te Israel dabego bulu du dabe polo dolai dao. Tama megi da, da Idom bage dago te tǫ kantri selama, tonaluaibao.” Dagego te po wabo eno odali.

Esekiel 36:5

Tama tialima, God ena Genuai Bidi ena haliga sębę posolo tiwai eyu, eno bomai po te kantri Idomba, me kantri dage pąde elalubo, te kantri dabeba te obao. Augwaligo homugo ena te olo nai dao tiwai homu elama, tama augwaligo eno tǫ sainu homu mu gana pai dao. Magi baso meni. Augwaligo te tǫ me badu te augwaligo kau kibu dabe me sipsip kibugo nosai tede tumainao homu yali.