Matyu 8:20 - Godigo dwagi yai po buku

²⁰ Jisasgo te po agabolo wali, “Te uni yowi dabe da, augwali pibo dedage te tǫde elalubao, tama te ba dabe da, te augwali me pibo be elalubo dao. Tiali goli Godigo Bidi Mu da, te aga tobolu munama piabo digi te bulu pesage menio,” wali.

Matyu 8:20 Referans Kwoze

Godigo Nogi Ugwaba Sabo Tęąbi Po Wabo Buku Dabe 84:3

Genuai Bidi Te Tigidali Bomo Elalubao, nage te king, me eno God dao. Te dwasianu ba dabe te nago alta pąde be sęnama, tama augwaligo te augwa wai dabe tonalubo dao.

Dwagi Yai Gesi Po Lukgo Asęani 2:7

Tama Maria agai hasia ogwa ame nani. Tama pedai ugwa nanamenu dabego belama, tama kibu bulmakaugo nai tubo halobageba te ogwa wai pilagalama elalualio. Magi baso menio. We bidi osogo pibo be pągąna saide.

2 Korin 8:9

Magi baso meni. Dagego te dago Genuai Bidi Jisas Kraisgo olo tau sabo wiegi yai kolesaga ebo sę koneai. Aga God dali hodobo bidiyu, tama genuai nogi dali, bomo yai ula dali si umabo elalubadi, tiali goli agai dage tau somainogo eyu tama aga magi nai meni yai bidi pedalali. Tama aga te magi nai meni yai bidi tiwai pedalaligo te dagebolo te God dali bidiyu bomo yai ula umabo sabo tų dawai dao.

Dwagi Yai Gesi Po Lukgo Asęani 2:16

Tama augwali polo pali. Gege pelama, Maria me Josep dali augwali si suali, te wai bǫų me bulmakaugo tubo nai halobage tomode pila mubo suali.

Dwagi Yai Gesi Po Lukgo Asęani 2:12

Dagego gegegi peyu da, te wai bǫų me ugwa nanamenu dabego mesega galama, tama bulmakaugo nai tubo halobage tomode pilai elalubo sueibao. Telalubo sulama, dagego te po mu daba homu yaibao,” te enselgo te po wai.

Godigo Nogi Ugwaba Sabo Tęąbi Po Wabo Buku Dabe 109:22

Ena dwai bidi mu bidiyu, tama ena odolali bidibao, tama ena dwai dene mu ebao.

Godigo Nogi Ugwaba Sabo Tęąbi Po Wabo Buku Dabe 69:29

Tiali goli, ena te genuai sęgę me dene tolali. God, nago ena ma selama, tama ena usu ma ilao.

Dwagi Yai Gesi Po Lukgo Asęani 8:3

We me nogi Joana, Herotgo bede sę ebo genuai bidi Kusago we dao. We me nogi Susana. Me badu we dabe hauwago augwa monego Jisas me, Jisas aga dali bilibo bidi dabe me tau sali.

Matyu 12:32

Tama bidi mego dwai po me deli te Godigo Bidi Mu dali obaso da, teda Godigo te bidi agai sęgę te sela sąbo usu yaibao. Tiali goli bidigo dwai po te Godigo Mobo Bidi dali weyu da, te bidi agai sęgę te megi e tǫde bidibo sogo me te nosali me munu me te sęgę me sela sągobeo. Te sęgę me elalua peyu, bidada paibao,” Jisasgo te po wai.

Godigo Nogi Ugwaba Sabo Tęąbi Po Wabo Buku Dabe 104:17

Ba dabe augwaligo te ni sidade be sę ebo dao. Tialima, dogoni bobobage yai bago be gasa nide sębo dao.

Matyu 19:28

Tama Jisasgo augwali dali te po wali, “Eno mu po dagebolo obao, te tigidali nai gesi noma ma pedalobo sogo, te Godigo Bidi Mu aga genuai nogi me bomo dali te sogo te tuni bidi duabo sia saide dulaluyu, te sogo te dage, dage ena wali asali bidi dabe me, dage tuni bidi dabe bidiyu, tama te 12 wali te duabo sia saide dualama, tama te 12 te Israel hani augwali tonalubo sę yagameo.

Matyu 17:9

Te augwali te bulu dude bidali tagalama dulubadi, Jisasgo bomo elama, augwalibolo te po wai, “Dagego megi suali sę po te gasa bidi dabebolo wagio. Dagego te po osogo hogwa sao. Tama nosali te Godigo Bidi Mu aga isama, tama ma hodalobode, tama te sogo dagego megi suali sę po te we bidibolo wagameo,” Jisasgo te po wai.

Matyu 16:27

Magi baso meni. Nosali Godigo Bidi Mu te aga Ayago genuai bomo me, ula me dali, te ensel mobo bidi dabe dali hodobo si asaibao. Te sogo te agai tigidali we bidigo yali kolesaga usu nama wei ponaibao.

Matyu 16:13

Te Jisas te gasa tǫba pali, te tǫde te hanu me deli nogi Sisaria tede elaluali, te gavman bidi nogi Filip agai te bulu tonaluali. Tama te badu pelama, tama te sogo Jisasgo agade digi te aga wali pabo bidi dabe augwalibolo hanaluyu, te po wai, “Te we bidi augwaligo homu te Godigo Bidi Mude aga de dawe, augwaligo magi po agade wabo dawe?” Jisasgo aga digi te po wai.

Matyu 12:40

Tama polobadu te tiwai yai te bidi Jona sela sogo giligade me sela sogo hulide te genuai sųgų haliga tomode bidai, tama te tiwai yali gilama naga te Godigo Bidi Mu aga me te sela sogo giligade me sela sogo hulide e tǫ tomode bidaibao, te isai we bidi bidibo madide.

Matyu 12:8

Magi baso meni. Ena da, te Godigo Bidi Mu da. Ena da te Sabat sogode te genuai bidi dao. Tama tibaso, bidigo Sabatde mena sę yagameo wabo po te eno digi waibao,” Jisasgo te po wai.

Godigo Nogi Ugwaba Sabo Tęąbi Po Wabo Buku Dabe 40:17

Tiali goli, ena te bomo meni yai bidi, tama ena te tigidali doado bage sǫą pai elalubao. Tama nage, Genuai Bidi, nago ena homu koneani. God, nago digi nago ena tau sabo bidi da, tama nago ena ma sabo dao. Nago me tonalugio, nago ena polo tau sao.

Daniel 7:13

Eno te hulide yali nade, eno te bidi me deli te da tǫde bidi tiwai tobage suali. Aga te dagalu pǫ dabe tomode bidiyu, tama ena pąba asali. Tama augwaligo aga te Polobadu Polobadu Bidada Aselama, te Megi Me Bidada Peyu, Bidada Pabo Bidiba sela palio.

Godigo Nogi Ugwaba Sabo Tęąbi Po Wabo Buku Dabe 104:12

Ba dabe augwaligo pibo be te ąį sesegede elalubo nide be sę yai, tama augwali ni nologode dulaluyu, augwa po wabo dao.

Matyu 13:37

Te Jisasgo po wei ponoyu te po wai, “Te wiegi yai nai ge telala pali bidi po wali da, te bidi da te ena dao, Godigo Bidi Mu dao.

Dwagi Yai Gesi Po Makgo Asęani 8:38

Tama te megi e sogo tǫde bidibo we bidi dabe augwali da, te aga bidi taga soayu penani ebo we tiwai da, augwaligo Godigo po taga soali, tama haniani dwai sę ebo dao. Te bidi augwali bidalubo tomode bidiyu, tama agai enade me te eno ola mabo pode me hale eyu ebaso da, teda nosali ena te Godigo Bidi Mu, ena me te bidide hale eyu aga nogi geme dualaluaibao, te eno ena Ayago genuai bomo yai ula dali, te wiegi yai tedali ensel mobo bidi dabe dali e tǫba ma asobo sogo tama tiaibao,” Jisasgo te po wai.

Dwagi Yai Gesi Po Lukgo Asęani 9:58

Jisasgo te po agabolo wali, “Te uni yowi dabe da, augwali pibo dedage te tǫde elalubao, tama te ba dabe da, te augwali me pibo be elalubo dao. Tiali goli Godigo Bidi Mu da, te aga tobolu munama piabo digi te bulu pesage menio,” wali.

Dwagi Yai Gesi Po Lukgo Asęani 12:8

Jisasgo te po ma wadolali, “Eno dagebolo obe dao. Bidi sabode bidibadi ‘Ao, ena da te Jisas wali pabo bidi dao’ wabo bidi, te bidi Godigo Bidi Mu eno dagalude Godigo ensel dabe sabode eno te po waibao, ‘Ao, te bidi ena wali asobo bidi dao.’

Dwagi Yai Gesi Po Lukgo Asęani 18:8

Eno dagebolo obao, menio, augwaligo hanalu wabo po agai odoyu, tama te tau sabo bodolu asobo si, agai tau mawaibao. Tiali goli, ena Godigo Bidi Mu ena e tǫba ma asobo si, enaba homu kolesaga mani we bidi eno sugowe?” Jisasgo te po wali.

Dwagi Yai Gesi Po Lukgo Asęani 21:36

Sesemane sogo dage bugagia suao, dua dao. Te sę eyu, tigidali sogo dage God hanalu wao, agai dagebolo aga bomo momainu yao. Tama tilama, tigidali te sę dageba pedelainogo yali da, te dage geda munama ela soeibao. Tiyu da, dage ena gesabide bugagia dolaluaibao, ena da te Godigo Bidi Mu dao,” Jisasgo te po wai.

Dwagi Yai Gesi Po Jongo Asęani 1:51

Tama Jisasgo agabolo ma naga wai, “Mu tamao, eno mu po dagebolo obao, nosali dagego dagalu dala pabo sueibao. Tama dagego Godigo dagalude sę ebo ensel mobo bidi augwali ugwaba holoyu, aiyaba duluyu ebo dagego sueibao. Tama augwali enaba asiyu yaibao, ena da te Godigo Bidi Mu dao,” Jisasgo te po wai.

Dwagi Yai Gesi Po Jongo Asęani 3:13

Gasa bidi me te Godigo bidibo madigiba me holobeo. Ena da Godigo Bidi Mu da, tama ena naga te dagalu tagalama, e tǫba dulai, enaduba deli digio.

Dwagi Yai Gesi Po Jongo Asęani 3:14

Polobadu Mosesgo te kapago nigai tibo hasamani te bidi meni yai bulude ni donogo ugwaba sai. Te tiwai yali gilama, tama augwaligo te Godigo Bidi Mu ugwaba sela mueibao.

Dwagi Yai Gesi Po Jongo Asęani 6:27

“Dagego te mobia pabo nai naga sabo sę tiwai dagego egimio. Te menio. Dagego te bidada peyu bidabo bomo mabo nai sabo sę yao. Te tiwai nai Godigo Bidi Mu agai dagebolo mawaibao. Magi basowe? Aga Aya Godigo te bidide dwagi yai homu eyu, sa muai,” Jisasgo te po wai.

Dwagi Yai Gesi Po Jongo Asęani 6:53

Tama Jisasgo augwalibolo te po wai, “Eno mu po dagebolo obao, dagego Godigo Bidi Mu agai tigi tusiąwani da, agai kaneme tusiąwani da, tiali da, dagego te bidabo bomo elalugobeo.

Dwagi Yai Gesi Po Jongo Asęani 6:62

Tialima, dagego suali ma te Godigo Bidi Mu aga polobadu bidali buluba hodobo suyu da, magi yaibawe?” Jisasgo te po wai.

Dwagi Yai Gesi Po Jongo Asęani 12:34

Te we bidi augwaligo Jisasbolo po wei ponoyu, te po wai, “Dago bomo yai pode tama po elalubo dao, Godigo sa muyu, asaiba wali bidi Krais aga bidada peyu, bidada paibao, te po wai. Tama tibaso, magi baso nago te po obawe, augwaligo te Godigo Bidi Mu ugwaba sao, po wai. Te Godigo Bidi Mu wali te de dawe?” augwaligo te po wai.

Dwagi Yai Gesi Po Jongo Asęani 13:31

Te Judas te be buluba pai digi, tama Jisasgo te po wai, “Megi tama te Godigo Bidi Mu aga genuai bomo dali genuai nogi dali te we bidi augwaligo koneaibao. Tama Godigo Bidi Mu agai Godigo genuai bomo dali genuai nogi dali augwalibolo ola mawaibao.

Godigo Sęba Tagala Palai Bidigo Po 7:56

Stivengo te po wai, “Suao. Eno megi suba, dagalu dalalubo. Tama tede Godigo Bidi Mu megi Godigo dolo nogo badude dolalubo eno subao,” te po wai.