Matyu 5:22 - Godigo dwagi yai po buku

²² Tiali goli megi eno po dagebolo obao: Tama bidi mego aga ama dali sębę eyu da, te bidi aga po tuba odasa paibao, tama dene saibao. Tama bidi mego aga ama dali dwai po obaso da, teda te bidi aga te polalubo kaunsil bidibo digiba pelama, po tų emainogo yao. Tama bidi mego aga ama dali nogi posobo po weyu, nage sę isiąbo homu meni yai dwai bidi dao weyu da, teda te bidi aga te dwai madigi sia dabo dene sabo buluba paibao.

Matyu 5:22 Referans Kwoze

1 Jon 2:9

Niwai bidi me deligo te po weyu, “Ena te ulade bidibo dao” obaso da, tialima te po wabo bidigo aga ama dali sębę elama boi bidi homu eyu da, te bidi aga be hulia sai digi me bidibao.

Jems 3:6

Te sia dabo tiwai da bidigo kelego wabo po tiwai dao. Tama te sia dabo tiwai, dago wali dwasianu dwai po te genuai mu pedaluama, dago tigi tomode dwai meda mu elama, tama da dolobo page elalubo. Tama dago wabo dwai po aga page bulu da te Satan aga moni dwai sia dabo bulu dao.

Taitus 3:2

Augwaligo bidi mede dwai po olamuo. Te menio. Augwali homu nagame elama, tama abagi homu eyu bidao. Tama sesemane sogo augwaligo tigidali we bidi dali te imilai homu eyu, tama augwali tau sao. Te po augwali ola mao.

Matyu 10:28

Dagego tigi naga ela mubo bidi dabe te dage wi egio. Augwaligo dagego po wabo mobo noma bidi te dali me ela mugobeo. Menio. Te Godigo dagego tigi me noma bidi dali te genuai dene sabo te siade mu dolobo bomo elalubaso, te dage agade naga wi yao.

Matyu 18:35

Te tiwai me, dagego homu mu esiąyu, dagego duga ama dabego dage dali yali dwai sę sela sąsiąwani da, teda eno Aya dagalude bidibo bidi agai me te dagego dwai sę ebo te aga sela sągobeo,” Jisasgo te po wai.

1 Pita 3:9

Bidi mego dage dali dwai sę ebo si, tama dagego dwai sę eyu ma wei ponogio. Ma, bidi mego dage dali dwai dwai po wabo si, dagego te dwai po me weyu wei ponogio. Te menio. Dagego God hanalu wabo po wao, agai augwali dali dwagi yai sę emainogo yao. Te God agai dagego te tobage sę emainogo dage i wali dao, tama nosali agai dagebolo dwagi yai kolesaga mu yaibao.

Polgo Po Pas Rom Dabeba Asęani 12:10

Dage da, te deli hani bage dao. Tama tibaso, te deli hani we bidi dabego yabo kolesaga bomo eyu, tama duga hasi duga ama dede abe dede augwali dali dwagi yai homu eyu godolo mu yao. Dage tigidali deli deligo duga nogi aiyaba elaluyu, te gasa bage augwali nogi naga ugwaba sao.

1 Pita 2:23

Augwaligo aga dali dwai dwai po wabo si agai augwali dali dwai po wei ponobe, sagia sai. Tama augwaligo aga dene maidu gebo si, agai te boi bidi homu eyu, po wei munu me ponobeo. Woo. Te menio. Aga te homu yali, ‘God agai te augwaligo ena dali yali sęde te po tų dolo mu yaibao,’ te homu yai. Tama te homu eyu, agai te po tų yabo sę Godigo nogoba maidu geai.

Matyu 18:21

Tama te sogo Pita Jisas pageba asama tama aga dali te po wai, “Genuai Bidi, nisu naga sogo ena amago dwai sę enabolo emainogo yai, tama agai enabolo dwai sę yali te sęgę eno nisu naga sogo sela sągowe? Ma a naga olama me badu nogo si tama sogo te sęgę sela sąbo usu egowe?” Pitago Jisas dali te po hanalu wai.

Godigo Nogi Ugwaba Sabo Tęąbi Po Wabo Buku Dabe 109:3

Augwaligo po dwai mu enade wali, tiali goli augwaligo po te odolali walio. Te po page menio.

Godigo Nogi Ugwaba Sabo Tęąbi Po Wabo Buku Dabe 37:8

Nago wado po me wasiąyu, tama nago te haliga sębę ebo kolesaga me tagalao. Nago homu te nai dabede kekeli elama, homugo pesa me elamuo. Te kolesagago nage kekelama, te dwai kolesaga emainu yaibao.

Jutgo Asęani Pas 1:9

Augwaligo te posobo po olamuo. Suao. Polobadu te ensel mobo bidi dabego polalubo ensel nogi Maikel, agai te dwai haubo mobo tuni bidi Satan dali augwali si po konila yai, te isai bidi Mosesgo tigi hagede konila yai. Tama te sogo Maikel agai te Satan dwai nogi posobo po me wabeo. Te meni. Agai Satanbolo te po wai, “Genuai Bidi aga digi nage osola sulama, tama sęgę mawaibao,” te po wai.

1 Jon 3:10

Edao. Te Godigo wai dabe dali, te Satango wai dabe dali, augwali dagalama hania koneabo tų e dao: dwagi yai doloba pai kolesaga wali pisąbo bidi, aga te Godigo wai menio. Tama aga ama dali dwagi yai homu eyu godolo isąbo bidi, te bidi me aga te Godigo wai menio.

Godigo Sęba Tagala Palai Bidigo Po 17:18

Tama te Epikuria hani po ola mabo bidi dabe me, te Stoik hani po ola mabo bidi dabe me, augwaligo Polgo po aiyaba elaluai hagede, pogo wąbi hwįai ąǫ yali. Te bidi me badugo te po wai, “Te bidi aga da, te mu konesiąwai bidi da. Agai dabolo magi po obawe?” Me badu bidigo te po wali, “Agai te po wabo gasa habuba bidibo Godigowe?” te po wai. Pol agai te Jisasde po ola mobadi yaide, isai bidi te gų pagede ma hodaloabo po ola mobadi yaide, augwaligo te tobage po tama wali.

1 Tesalonaika 4:6

Tama God agai ebo homu e dao. Dagego te we sabo sę po bolama, tama duga abagi dali dwai sę egimio. Magi baso menio. Genuai Bidi Jisas agai te tobage dwai sę ebo kolesaga ebo bidi augwali tigidali agai wei ponobo dao. Tama polobadu da dage dali bidibadi, e sęgę yai po dao homu eyu, dago te po hanilama, dage dali wai dao, dage tau somainogo.

Dwagi Yai Gesi Po Makgo Asęani 14:55

Tama te genuai pris dabego me te tigidali kaunsil dabe augwali te bidi dabe meba i olama asobo side, te augwaligo te Jisasgo yali kolesaga po pusumainu yai. Augwaligo te aga ela muabo homu ebaso, tama te dwai sę yali sunumi me deli te gegali. Tiali goli te augwaligo agai dwai sę yali te me gegebeo.

Matyu 26:59

Te pris tobolu bidi dabe dali, te tigidali kaunsil dabe dali, augwaligo te Jisasde tibo po omainogo yabo bidi dabe gegebo sę yali, tama augwaligo aga ela muabo po dąų wabo tų gegemainogo yalio.

Bomai Po 15:11

Tigidali sogo dage Israel dabe meba te nai dabe sǫą peyu bidaibao. Tama tibaso, eno dagebolo te po te wabao, dagego augwali hobede elama, tama augwaligo habuge yali nai dabe tau sao, tama augwali dali wiegi yai sę yao,” Mosesgo te po wai.

Dwagi Yai Gesi Po Jongo Asęani 11:47

Tama tibaso, te Farisi hani bage me, te pris hani tobolu bage me, augwaligo te kaunsil bage dali sisinama, Jisasde te po wai, “Dago te bidide magi yaibawe? Agai bomai sę hauwa mu ebo dao.

Kraisgo Geme Dualali Sę Pedelabo Po Jonbolo Ola Mani 20:14

Agai te isibo bomo dali, te isai bage osogo bidali madi dali si te genuai sia dabo dedage pageba aiyaba sąwai. (Te genuai dedage sia dabo elalubo te si wali isibo bomo dao.)

Godigo Sęba Tagala Palai Bidigo Po 7:37

Te bidi Moses agai tigidali Israel we bidibolo te po wai, ‘Godigo te po pusabo bidi me deli dagebolo tagala palaibao, ena tiwai. Te bidi duga hani bidi digi dao,’ te po wai.

Dwagi Yai Gesi Po Lukgo Asęani 12:5

Te eno po hanilama, dage dali obe dao. Te dagego mena bidide wi yaibawe? Te dagego wi yabo bidi dagebolo eno ola mawaibao. Te God dali dagego wi iyąo. Te Godigo bidi elama, te noma bidi dali siaba sąbo bomo agai usu yaibao. Eno mu tama dagebolo obe dao. God dali naga wi iyąo,” wali.

Matyu 5:44

Tiali goli megi eno dagebolo obao, dagego duga boi bidi dali dwagi yai homu eyu tama godolo eyu yao. Tama bidi meba augwaligo dagebolo dene mobaso da, teda dagego gedu haluasa po Godibolo wao, te agai augwali dali dwagi yai sę emainogo.

Matyu 5:34

Tiali goli megi eno e po dagebolo obao: dagego te duga nosali yabo sęde po weyu, tama we bidi augwaligo te mu po dao homu emainogo dagego te po dąų wabo po munu me wagio. Mu menio. Dagego po me deli dąų waliyu, dagalu me nogi ilamuo. Magi basowe, dagalu da, te God dulalubo sia sai dao.

Matyu 3:17

Tama pedauwali me delide te dagaludu i weyu, te tiwai po wai, “Te aga eno Ogwa dao. Eno aga godolo mu ebao. Tama eno homu agade te pemene wiegi yai ebo dao,” te po wai.

Obadia 1:10

Genuai Bidigo te tiwai po ma wali, “Dage Idom dabego te duga ama dede dabego nai doado bage dabe wi sali, augwali te Jekopgo hani dabe, te augwali ela muai dao. Tama tibaso, eno dage hale mu iliyu, tama dage mu ela silaibao, dage munu me ma pedalogobeo.

Bugagia Bidibo Kolesagade Po Asęai Buku 14:16

Te wiegi yai homu kolesaga elalubo bidigo da, te Genuai Bidide wi eyu, te bugagia tonalu, tama te sęgę sabo sę dabe te agade ela soaibao. Tiali goli, te wiegi yai homu elalusiąbo bidi, agai te homu eyu, te tobage tigidali sę yabo homu elama, tama agai te ebo kolesagade te homu bugagia me egobeo.

Godigo Nogi Ugwaba Sabo Tęąbi Po Wabo Buku Dabe 7:4

tama eno ena abagi dali geagano bilibo sę eyu, tama eno te ena boi bidi dolobo sę olo eyu ebaso da,

Tigidali Nai Gagalama Nigali Side 37:4

Te aga ama dedego suali, te ayago Josep dali wiegi yai homu pemene mu eyu, tama augwali te godolo kuna me ebe. Tama tibaso, augwaligo dwai homu mu te Josep dali elama, tama augwaligo abagi homu eyu, wiegi yai po aga dali me wabeo.

1 Jon 5:16

Bidi me deligo aga amago dwai sę ebo suyu da, tama te dwai sę ebogo te yali bidi aga dwai madigi pisąbo dwai sę elaluyu da, teda aga amago Godibolo gedu haluasa po wao. Tama weyu, tama Godigo te dwai sę yali sela sąnama tama bidibo ula te bidibolo mawaibao. Te dwai sę tedali tedali dao, mebago te sę yali bidi dwai madigi tagala palabo dao, mebago meni. Tama te sę yali bidi dwai madigiba pisąbo dwai sę ebode eno te po wai, Godibolo gedu haluasa po wao. Tiali goli te bidi dwai madigi tagala palabo dwai sę, tede eno dagebolo “Gedu haluasa po wao” wabeo.

Jems 2:20

Nage homu kolesaga meni yai bidi, te nago konealubo po naga dąų weyu, tama nago wiegi yai kolesaga dali esiąyu, tama nago te konealubo po dąų wabo te olo nai tiwai eyu te usu menio. Tama tibaso, nago te po page mu koneai homu ebawe?

Hibru 12:25

Dage dua dao. Tiyu dage olo pania selama tama megi e po wabo bidigo po sela sąyabuo. Polobadu digi e tǫde Godigo bomai po te we bidi augwalibolo mani, tiali goli augwaligo agai po sela sąwai. Tama te sogo polobadu, te augwali wi me pabo usu meni eyu, tama augwa sęgę te geda sabeo. Megi God te dagalude bidiyu dabolo agai po mawai. Tama dago aga tudiba muyu da, te da wi peyu te dabolo mabo sęgę geda sabo usu egowe? Mu menio.

Hibru 5:9

Te tama tialigo aga te usu mu ilama, tama aga te we bidi ma dobola sabo bidi pedalama, tama agai po wali pabo we bidi tigidali ma siyu, augwali bugagia bidada peyu, bidada pabo bidi dao.

1 Korin 6:10

tama te nai wi sabo bidi dabe tama te gasa bidi dabego doado bagede pesa homu ebo bidi dabe me, tama te bomai wę tubo bidi me, tama te gasa bidi dali posobo po wabo bidi dabe me, tama te gasa bidi dabego doado bage anoma elama sabo bidi dabe me, te tobage kolesaga ebo bidi dabe tigidali te augwali Godigo we bidi bugagia tonalubo bomo tomoba pabo usu me egobeo.

1 Korin 6:6

Tiali goli dagego te tiwai ebo meni. Te po pagede naga te ama me deligo te gasa ama me te po tų ela mayu, tama te Kraisde konealubo po dąų wasiąwani bidi dabe gedude te po tų ilibo da. Te dwali.

Godigo Sęba Tagala Palai Bidigo Po 5:27

Augwaligo te bidi dabe te be tomoba dodoligi pali, te kaunsil dabe gesabide. Tede dolalubadi, te pris tobolu bidigo augwalibolo te po wai,

Dwagi Yai Gesi Po Jongo Asęani 15:25

Tama polobadu God agai po obaso, te bidi mego te po bukude asęani, augwaligo bomo yai po bukude. Tama augwaligo megi ebo boi bidi homu ebo sęde, augwaligo te po wali peyu, te po usu nuyu nai gilama walobao. Te polobadu asęani po e dao, ‘Augwaligo olo dali ena dali boi bidi yabo homu yai dao,’ te po wali,” Jisasgo te po wai.

Dwagi Yai Gesi Po Jongo Asęani 8:48

Te Juda bagego Jisasgo po wei ponoyu, te nogi posobo po wai, “Dago nagede tama po wai dao, ‘Aga da dwai Samaria hani bidi dao. Tama dwai haubo mobo bidi agade bidibao,’ dago te po nagede wai dao. Dago mu po tamao,” Juda bagego Jisas dali te po wai.

Dwagi Yai Gesi Po Jongo Asęani 7:20

Te we bidi augwaligo Jisasbolo po wei ponoyu, te po wai, “Dego nage elainogo ebawe? Woo, noma bidi dwai me deli nagede bidibaso, nago te po wali,” te olo we bidi augwaligo te po wai.

Dwagi Yai Gesi Po Makgo Asęani 15:1

Te kigamu mu te genuai pris dabe dali, te tobolu bidi dabe me, te bomai po page koneai bidi dabe me, te tigidali kaunsil dabe badi, te augwaligo po me deli miani. Tama augwaligo Jisas te bonogo nogo si dunama, tama augwaligo aga selama, tama aga te Rom gavman polalubo tuni bidi Pailat agabolo mawai dao.

Matyu 25:41

“Tama tuni bidi agai te pobase nogo badu bidibo we bidi augwalibolo e tobage po waibao, ‘Dage haga yabo bidi dabe dao. Dage enade geda selama, tama dage te munu me sula sisąbo siaba pao, te sia te Ayago sisi ilali elalubo, te dwai sę yali tobolu bidi Satan aga wali bilibo mobo ensel bidi dabe augwali dali mumainogo yai.

Matyu 23:33

Dage dwai hasamani dabe dao. Dage dwai hasamanigo wai puluba dao. Godigo dage po tų ilibaso, tama dage te dwai sia dabo madi pageba paibao. Mena tama dage menadu wi paibawe? Menio.

Matyu 23:15

“Dage bomai po page ola mabo bidi dabe me, dage Farisi dabe dali, hobede ya. Dageba te dwai sogo mu pedelaibao, dage tibo po wabo bage. Dage te tamu ąįde badi, te tǫde dali bilibao, te bidi me deli gegelama, tama te bidi me deli aga dage dali bilabo bidi sainogo dagego bomonama gegebo dao. Aga te dage dali bilibo bidi pedalama, tama dagego aga te moni sia dabo buluba pomainogo ilibo dao, te duga tiwai ilibao. Dagego aga te dwai sę ebo tomoba kegelama, tama agai ebo dwai sęgo dagego ebo dwai sę aiyaba mu elalubo dao,” wali.

Matyu 17:5

Tama Pitago te po odubadi yaide, tama ula mu ebo pǫ me deligo augwali tigidali polo mesega sagasali. Te pǫgo augwali mesega sagaselama, tama te pǫ tomodu po me weyu te po wali, “E bidi da, eno Ogwa dao, te eno aga godolo mu ebo dao, eno aga dali dwagi yai homu mu ebo dao. Agai wabo po dagego mu odiąo,” te po wai.

Matyu 12:24

Tiali goli te Farisi dabe augwaligo te po odolama, tama augwaligo te po wai, “Woo, te dwai haubo mobo bidi te Belsebulgo bomode naga te bidigo te dwai haubo sela sąbo dao. Te Belsebul aga te dwai haubo mobo bidi dabego tobolu bidi dao,” te Farisi bagego te po wai.

Matyu 10:17

Tama dage te dwai kolesaga ebo bidi dabede dua dao. Te augwaligo dage augwa kaunsil bidi dabede po tų ilainogo sela peyu, tama augwaligo dage te bomo yai po ola mabo be tomode te keloago elaibao.

Obadia 1:12

Genuai Bidigo te po me wali, “Dagego te duga ama dede te Juda dabeba yali sę hauwa te dolo yai sę me ebeo. Dagego te augwali dwai dene sabo sogo, te dagego bugai haliga eyu, wiegi yai homu pemene yali. Te dagego hagoma eyu, te augwali dwai dene ebadi, te gagali ilibo po wali. Te eno we bidi augwali dene sabo sogo, te dage augwaligo taun tomoba pelama, te augwali dene sabode te wiegi yai homu pemene elama, te augwaligo wiegi yai nai dabe elali. Dage te sunumi tumage age siba doligi pelama, te meba Juda wi painu sobadi, te pageabi elama tualio. Tama dagego augwali te boi bidi dabego nogoba muani. Dagego te yali sę dabe, te dolo yai sę mu me ebeo,” wai dao.

Daniel 3:19

Nebukatnesargo haliga sębę te Satrak, me Mesak, me Abetnego, te bageba eyu, tama agai guni buyu, gedu me gesabidi me pęgo sela pali. Tama agai te aga sę bidi dabeba olama, te sia nogonama, te bogoli mu dwai pedalumainu ilao wali. Polobadu augwaligo sia nogani posolo ebo te tiwai posolo yai me pedalubeo, te genuai mu.

Daniel 3:13

Kingo te tama po odolama, tama aga wado po dwai mu olama, tama te po weyu, augwaligo te bidi sela agaba odasa asao wai.

Te We Bidi Dabego Jerusalem Hagede Gela Wali 3:52

Te bidi mebago ena dali olo dali boi bidi homu elama, tama ena olo dali elama, isilainu yali. Tama augwaligo ena bidigo ba pobeasa pabo tiwai yai.

Jeremaia 17:11

Te bidigo kolesaga dolo isąbadi, te mone hauwa sobaso da, te aga te ba me deligo te gasa bago ge wi selama, tama te gede pedelali wai dabe sabo tiwai ebao. Te bidigo mone tigidali te aga monu dabe isąbadi hagawaibao. Tama nosali, te bidi dabego koneaibao, aga te homu kolesaga meni yai bidi tiwai yalio.

Bugagia Bidibo Kolesagade Po Asęai Buku 18:6

Te wiegi yai homu kolesaga elalusiąbo bidigo te gasa bidi dabe dali te konila po waibao. Tama augwaligo agai po odainu ebo sogo, augwaligo te aga keloago elabo homu ebo dao.

Godigo Nogi Ugwaba Sabo Tęąbi Po Wabo Buku Dabe 92:6

Te homu kolesaga meni yai bidi, te umawai bidigo, te tama sę ebo dabe me koneainu ebaso, usu me egobeo.

Godigo Nogi Ugwaba Sabo Tęąbi Po Wabo Buku Dabe 69:4

Te enaba odolali boi bidi ebo bidi dabe, augwali te hauwa umabo mu dao, te eno tobolu nisigo namba te augwalide usu isąwai. Te boi bidi dabego enaba dwai sę yainu yali, tama augwaligo te ebo kolesaga pagede tibo po wali. Te bidi dabego bomo mu elama, te ena ela muabo homu yali. Eno te augwaligo nai doado bage me deli te eno wi me sabe, tiali goli augwaligo te po hauwa enaba kisilama wali. Tama tialima, eno ena doado bage digi te augwaliba mawai.

Godigo Nogi Ugwaba Sabo Tęąbi Po Wabo Buku Dabe 49:10

Da tigidaligo koneai, kolesaga koneai bidi, augwali me isibo dao. Tama dwai kolesaga ebo bidi, te kolesaga meni yai bidi me, augwali isibo dao. Te bidi dabe augwaligo walu me mone masigi tigidali nai isu, taga peyu, tama gasa bidi dabego te nai sabo dao.

Godigo Nogi Ugwaba Sabo Tęąbi Po Wabo Buku Dabe 35:19

Te bidi mebago ena dali odolali boi bidi ebao. Tiyu, augwaligo ena aiyaba elalu, te kęnę wabo te nago sula me tagaligio. Augwaligo odolali ena dali dwai homu ebao, tama tiyu, nago eno sęgęde te wiegi yai pemene emainu sula me tagaligio.

Godigo Nogi Ugwaba Sabo Tęąbi Po Wabo Buku Dabe 25:3

Awe, nageba te konealubo homu ąų wabo bidi dabe, te augwaligo konealubo odolali dąų omainu elama, tama me tagaliyu me egobeo. Menio. Te nageba hagoma polo ebo bidi dabe, augwali naga te dwai dene somainu elama, tama augwa yali kolesagade hale yaibao.

Godigo Nogi Ugwaba Sabo Tęąbi Po Wabo Buku Dabe 14:1

Kolesaga meni yai dwai sę ebo bidi dabe augwa hasi te po wabo dao, “God bidibo menio,” wabo dao. Te bidi dabe augwali te dwai bidi dao. Augwaligo dwai kolesaga mu naga ebo dao. Bidi me deligo dwagi yai kolesaga me ebo menio.

Nehemia 5:8

Augwali sisinagasai madi, te eno augwaliba te tiwai po wali, “Dago te dena abagi dabe te Israel hani isąwai bidi dabego abelama, te olo sę ebo bidi bidibaso, te dena ma sainu te mone sisinibo sę dene mu ebo da. Tiali goli, megi dagego te duga abagi dabeba dwai sę iliyu, tama augwaligo te dugago digi te olo sę ebo bidi bidibo tiwai emainu ilali.” Eno te tama po obaso, te polalubo bidi dabe te pedauwali pania selama, te augwaligo po wei ponabo usu meni yai dao.

Tuni Bidi Dabego Po Elalubo Buku Si 16:10

Te profet Hananigo te wali pogo king Asa sębę dwai mu ilali. Tama agai pode augwaligo Hanani kalabusiba muani, tama agai sągą ni namego dąų walali. Tama te sogo naga Asago bomonama dwai sę te Juda we bidi meba dali yali.

Te Israel me Juda Hani Sigo Tuni Bidigo Po Elalubo Buku Deli 21:4

Ahapgo Nabotgo te wali po odama, te aga wado homu elama, haliga sębę me dwai yali. Tama aga be elalubo madi Samariaba pelama, te betba pigi palima, te gesabidi be dagaba begaluai. Te aga nai tubo gisilai dao.

2 Samuel 16:7

Simeigo Devitba te dwai po te tama wai, “Nage gedao! Nage te bidi ela mubo bidi dao! Nage dwai bidi, nage gedao!

2 Samuel 6:20

Tama Devit aga beba ma pelama, te aga hani sibi wiegi yai ilimainu, te Godiba hanalugi peyu pali. Tama Mikal te bedu buluba dia solama, tama aga dali deliba gesabidi ilama, tama agai te po wali, “Ae, te Israel kingo te aga genuai nogi ola mayu, tama te bugagia sasa mano pali. Tama aga ofisa dabego olo sę ebo we dabego gedude te aga hale gagolobo sę ebo sumainu yalio. Nago te tama tiali, te homu kolesaga meni yai bidigo ebo tiwai yali dao,” te we Mikalgo te po wali.

Tigidali Nai Gagalama Nigali Side 37:8

Te aga ama dedego agabolo te po wali, “Nago homugo te nage dago tuni bidi pedelama, tama da tonaluainogo ebawe?” Tama aga ama dede augwaligo te na yali po odama, tama augwaligo aga dali sębę mu yai.

Bomai Po 16:18

Tama Mosesgo po geninama weyu, te po wali, “Te dage hani deli deli tomode, dagego te jas me te ofisa dabe sa mumuna pao, te Genuai Bidi dago God agai dage mawainogo ebo te hanu dabede bida bida pabo, te bidi dabe.

Tuni Bidi Dabego Po Elalubo Buku Si 19:5

Tama Jehosafatgo te po tų ebo odabo bidi dabe sa munama. augwali te tigidali bomai obo elalubo taunde tatagalo pali.

Dwagi Yai Gesi Po Lukgo Asęani 22:66

Te nosali te giliga pedelai, tama te Israel bidi hani tobolu bidi dabe dali, te pris tobolu bidi dabe me, te Juda dabego bomo yai po page koneani bidi dabe me, augwali tigidali sisinai, tama augwaligo po kaunsil bidigo po wabo gilama, te po wainogo yai. Tama te Jisas tonalubo bage augwaligo Jisas kaunsil geduba odasa pai. Te kaunsil dabe augwaligo te po wai,

Godigo Sęba Tagala Palai Bidigo Po 4:15

Sulama, te po magi ilama, aiyaba elalugobeo. Tama tibaso, augwaligo Pita de Jon sibolo “Gasa habuba dage si osogo piąo,” wali. Genuai bidi dabe augwa hasi tega si po dodolali.

Godigo Sęba Tagala Palai Bidigo Po 5:21

Tama Jisasgo tagala palai bidi dabe augwaligo te po wali pelama, kigamu hulide te Moni Lotu Be tempel tomoba pelama, tigidali we bidibolo te po ola mabo gagalali. Te pris tobolu bidi dali, agai abagi solo dabe dali, augwaligo te Juda bidi monu dabe i olama, te kaunsilde moni po tų miainu yai. Augwali deliba sisinagaselama, augwaligo enesigi bidi dabe te kalabus beba tagala palama, “Te Jisasgo tagala palai bage eba odasa asao,” wali.

Godigo Sęba Tagala Palai Bidigo Po 6:12

Augwaligo te sę elama, te we bidi dabe dede, te genuai monu dabe dede, te Mosesgo bomo yai po ola mabo bidi dabe dede, augwali moni sębę yai, Stivende. Augwali pelama, Stiven nogo bono duąsa aselama, te kaunsil gesabiba dolaluagasali.

Godigo Sęba Tagala Palai Bidigo Po 6:15

Tama olama, te kaunsil dabe dali dualu tonalubo bidi dabe augwaligo Stiven bomona tonaluali. Augwaligo te bidi gesabidi suali da, te Godigo dagalude sę ebo ensel bidi gesabidi tiwai suali.

Godigo Sęba Tagala Palai Bidigo Po 22:30

Te do te enesigi bidi dabe augwa tobolu bidigo Pol nogode aligabo bono kęani pisagana palali. Tama agai homugo te Juda hanigo Pol po tų ebo po page mu gegai hagede tiali. Tama te ami tobolu bidigo te enesigi bidi dabe augwalibolo te po wai, “Dagego te pris hani tobolu bidi me, te Juda hani kaunsil bidi dabe me, sisinao,” wali. Tama augwali sisinagaselama, ami tobolu bidigo Pol te po miboba odasa dulama, doligiluali.

Godigo Sęba Tagala Palai Bidigo Po 23:1

Tama te moni po mibode Pol dolalu, te kaunsil tobolu bidi dabe bomonama gedugo tonalu, tama agai te po wali, “Dage eno deli hani dao. Eno te tiwai kolesaga Godigo susa aselama, megi eba usu naga sobao. Eno God dali dwai kolesaga me ebeo. Te tibo kolesaga yalide ena ma po tų ela mabeo,” wali.

Godigo Sęba Tagala Palai Bidigo Po 24:20

Tiali goli te bidi dabe eba sabolali bidi dabe, augwaligo nagebolo eno dwai kolesaga yali po pusao wao, te eno moni kaunsil bidi gedude dolalubadi yali sę po pusao.