Matyu 3:5 - Godigo dwagi yai po buku

⁵ Tama te sogo te Jerusalem moni hanude bidai we bidi dabe me, te Judia genuai tǫ we bidi me, te Jordan pabo ąį pąde bidali we bidi me, te augwali tigidali Jon bidibo digi asai.

Matyu 3:5 Referans Kwoze

Dwagi Yai Gesi Po Makgo Asęani 1:5

Tama te Judia tǫ pedai provinsde bidali we bidi dabe umabo mu Jon pageba sisinigi pai, te Jerusalem moni hanu we bidi dabe umabo me agaba asali. Tama augwali deli deligo augwa dwai sę yali sęgę hania hanilama, tama te po wai, “Eno dwai sę dabe yai dao.” Tama tibadi Jongo augwali te Jordan pabo ąįde baptais mani.

Dwagi Yai Gesi Po Jongo Asęani 5:35

Jon da, te sole ula ebo gilama, agai ula we bidi dabebolo mawai dao. Tama dagego pęwadage side te ulade dagego dwagi yai homu osogo yai dao.

Dwagi Yai Gesi Po Jongo Asęani 3:23

Jongo me te we bidi baptais mani bulu me nogi Ainon, te Salim bulu pąde o, tede te we bidi baptais mani. Ąį hauwa te mu te bulude elalubo. Tama we bidi augwali Jon bidibo digi aselama, baptais sagasali.

Dwagi Yai Gesi Po Lukgo Asęani 16:16

Te Jisasgo te po me wali, “Te polobadu bidali bidi Moses agai Godigo bomo yai po bukude asęani. Tama Godigo wali po pusa mani bage augwaligo agai wali po me bukude asęani. Tama bidaluama, te po kibu be hauwa bidabo po mu dao. Tama te pogo dage ola mani. Tiali goli, te bidi nogi Jon ame nenama, genuai elama, tama agai Godigo po pusa mabo gagalali. Agai te we bidibolo gesi po dwagi yai po ola mayu, God agai we bidi tonaluyu, augwali aga bomode bidaibao, wali. Tama Jongo te po pusa mabo gagalama, hauwa we bidi Godigo be tomoba pai hagede bomo elama, tomoba pabo dao.

Dwagi Yai Gesi Po Lukgo Asęani 3:7

Tama we bidi hauwa mu Jon agai augwali baptais momainu Jon aga pageba beasagasali. “Dage dwai hasamani dabe,” agai augwalibolo te po wali. “Godigo dage dali yabo sębęde dage sana pagameo po tego dagebolo waliwe?

Matyu 4:25

Tama te genuai we bidi hani hauwa, te genuai tǫ Galilide bidibo we bidigo me, te Dekapolis tǫde bidibo we bidigo me, te moni hanu Jerusalem we bidigo me, te Judia genuai tǫde bidibo we bidigo me, te Jordan pabo ąį te tǫ u badu bidibo we bidigo me, te tǫ tigidalide bidibo we bidi mebago naga te aga wali pai.

Matyu 2:1

Te Mariago Jisas te Betlehem bulude ame nani, te Judia tǫde. Tama te sogo te moni gavman tuni bidi nogi Herot aga bidali. Tama Mariago te wai Jisas ame nai digi, tama nosali te sia ge pedalobo badu bidali po page koneai bidi dabe augwali meba te Jerusalem moni hanuba sabolali. Tama augwali te dagalu hǫde haniani po page mu koneai dao. Tama augwali Jerusalem hanuba sabolama, tama augwaligo te po wai,

Dwagi Yai Gesi Po Lukgo Asęani 3:3

Godigo po Jonbolo ola mobaso, Jon aga te pabo ąį nogi Jordan sesege bulu dabeba pali. Agai te bulu we bidi dabebolo po pusuyu, tama te po wali, “Dagego dwai sę eboba tudi ilama, dage tigidali baptais sao, tama Godigo dagego dwai sę yali gegeda palomainu,” tama po pusudu geani.