Malakai 3:6 - Godigo dwagi yai po buku

⁶ Genuai Bidigo po ma weyu, te po wai, “Ena naga ena Genuai Bidi, tama eno homu kolesaga me hasegeligobeo. Tama tibaso, dage te Jekopgo bulai wąįgo wai dabe, dage tigidali me hagabe dao.

Malakai 3:6 Referans Kwoze

Israel Hanigo Namba 23:19

God da, aga te tǫde bidi mu menio. Godigo da bidigo yali gilama ili po me wabo menio. Agai homu da bidigo yali gilama me hasegelebo menio. Mu menio. Te agai magi sę me yainogo eyu, po dąų wali da, teda agai tama ebo dao. Agai te po wabogo naga te sę tama pedalobo dao.

Hibru 13:8

Jisas Krais aga munu me hasegelegobeo. Polobadu aga hasegelebeo, megi aga hasegelebo meni, nosali aga munu me hasegelegobeo. Aga ebo kolesaga deli naga me ela piduaibao.

Jeremaia 32:27

“Ena digi ena Genuai Bidi, ena te tǫde we bidi hani tigidaligo God dao. Eno tigidali sę ebo usu dao.

1 Samuel 15:29

Nago homugo Godigo te e po hasegelaiba te homu me elamuo. Mu menio. God, te da Israel dabego wiegi yai ula yai bomo agade elalubao, tama agai tibo po me wagobe, ma agai homu me hasegeligobeo. Menio. God te da bidi tiwai meni, tama tiyu agai wali po ma hasegeligobeo,” wali.

Hibru 6:18

Tama tibaso, te Godigo mu po dąų wabo me, te aga teba aga nogigo bomo manubo me, te sę si me hasegelegobeo. Te sę side Godigo tibo po munu me wagobeo. Tama tibaso, tebogo da te God pąba wi pelama geme duala sigi pali we bidi da homu bomo mayu, mu dąų ilimainogo yai. Tama tiyu, dago homugo te Godigo po dabolo weyu te dąų olama, te agai da dali nosali yabo dwagi yai sę dago tede dwagi yai homu eyu tama tonalubo dao.

Kraisgo Geme Dualali Sę Pedelabo Po Jonbolo Ola Mani 1:8

Te Tigidali Bomo Elalubo Genuai Bidi God agai aga bidibo pagede te po wai, “Ena da, ena digi te hasia bididuali bidi dao, ena te nosali sogo mu bididueibao wabo bidi mu dao,” agai te po wai. Te God aga te megi bididubao, tama polobadu mu aga bididuai, tama nosali aga ma asaibao.

Kraisgo Geme Dualali Sę Pedelabo Po Jonbolo Ola Mani 22:13

Ena da, ena digi te hasia bididuali bidi dao, ena te nosali sogo mu bididueibao wai bidi mu dao. Ena naga te polasa mu peyu, te ena nosali mu eyu ebo bidi dao. Te ena tigidali nai page bidi, tama eno ebo sę tigidali ela silibo dao,” agai te po wai.

Aisaia 44:6

Tigidali Bomo Elalubo Genuai Bidi, aga te Israel king da, te dage tudibadu pogalu, te dage tau sabo bidi, agai te po wai, “Ena Genuai Bidi, ena hasia polasa mu bidali, tama ena nosali te sabi badu mu bidaibao. Te gasa god munu me bidibeo, enaduba deli naga bidibo dao.

Godigo Nogi Ugwaba Sabo Tęąbi Po Wabo Buku Dabe 103:17

Tialima, Genuai Bidi agai nogi ugwaba sabo we bidi augwali sesemane bidada pabo sogo agai godolo mu ebo dao. Tama aga te dwagi yai aga wąį dabe augwali nosali pedalobo te dwagi yai yaibao.

Godigo Nogi Ugwaba Sabo Tęąbi Po Wabo Buku Dabe 102:26

Te tigidali nai te hagawaibao. Tiali goli, nage te sesemane bidaibao. Te augwali te poloba ugwa badia pabo tiwai pedelama, te dolaibao. Tama nago augwali hasegelama, te bidigo ugwa hasegelibo tiwai yaibao, tama augwali pela siliyu, tama me elalugobeo.

Filipai 1:6

Tama tiyu, eno homu si menio, eno mu koneai, te God agai dage deli deligo homu tomode te dwagi yai sę gagalama, tama te sę ela peyu, mu ela pelama, tama Krais Jisas tǫba ma asobo side naga agai te dagede ebo dwagi yai sę silaibao. Te eno mu koneanio.

Aisaia 41:13

Ena Genuai Bidi, te duga God dao, eno dage ugwaba sagualu tonalu, te eno te tiwai po dageba obao, dage wi me igio. Te eno dage tau saibao, te po wai dao.”

Hosea 11:9

“Eno dageba haliga sębę yali, tiali goli eno dageba te dwai dene da me magobeo. Magi baso meni, eno kolesaga te bidigo kolesaga tiwai menio. Ena God, te eno kolesaga tedali gasagi yai elalubao, tiali goli ena te dage dali bidibao. Eno wado elama, te eno dage doloyu da me egobeo,” wabo dao.

Godigo Nogi Ugwaba Sabo Tęąbi Po Wabo Buku Dabe 78:57

Augwa hagoma elama, agai po sela sąwani, te augwa wąį nǫų dabego te polobadu yali tiwai yalio. Augwali te gagea pai enesigi te enebo dolo pisąbo tiwai yai dao.

Godigo Nogi Ugwaba Sabo Tęąbi Po Wabo Buku Dabe 78:38

Tiali goli, Godigo te olo tau mabo wiegi yai kolesaga augwaliba elama, tama augwaligo te dwai sęgę sela sąwani, tama agai augwali me dolobeo. Hauwa sogo te agai wado yali, te palia selama elalu, tama augwaliba haliga sębę me ebeo.

Tigidali Nai Gagalama Nigali Side 15:7

Tama Yawego Abrambolo te tiwai po wai, “Ena Yawe dao. Eno nage i obaso, te naga bidali bulu Ur te Kaldia tǫ pedaide bidali te taga soai. Eno tama tiali, eno e tǫ nagebolo mawainogo yali, tama e tǫ nago tǫ mu pedelaibao.”

Polgo Po Pas Rom Dabeba Asęani 5:10

Polobadu dago God dali boi bidi homu elama bidibadi, tama te sogo Godigo Ogwa isai. Tama te isaligo agai te dago boi bidi yali kolesaga silama, tama da God dali deli homu ilama pedalali. Tama agai tama tialigo da, teda dago mu kuna koneani, te dago dene sidali weyu, te Ogwago bidibogo te Godigo da ma dobola sainogo tiaibao.

Tigidali Nai Gagalama Nigali Side 22:16

“Yawego te tiwai wali, ‘Te ena nogide digi eno mu dąų walai bomai po obao. Nago naga te deli naga elalubo ogwa me yoga sabeo. Tama tibaso, mu tama, eno nage dali wiegi yai sę mu yaibao.

Tigidali Nai Gagalama Nigali Side 15:18

Te side digi tama te Yawego tau sabo bomai po Abram dali dąų weyu, tama agai tama po wali, “Te eno te e tǫ tigidali te nago nosali ame nabo bulai wai, te hani dabe augwalibolo mawaibao. Tama te tǫ dąį te wę sesedu te Isip dabe tǫ pedai badu gagalasa, te genuai wę Yufretis teba saboligi paibao, moni tǫ mu.

Godigo Nogi Ugwaba Sabo Tęąbi Po Wabo Buku Dabe 102:27

Tiali goli, nage da, me bididubadi, tama nage me isigobeo.

Daniel 6:26

“Dage eno bulu tǫ pedai kantri dabe we bidi dabeo, eno te po odiąo. Dage tigidaligo genuai nogi te Danielgo Godiba menama, tama te God dologoba pelama bidao. Te God te sesemane sogo bidada pobao. Aga te king sesemane sogo bidada pidu, bidada paibao, tama aga te we bidi tonalubo bomo te me siligobeo.

Habakuk 1:12

God, polobadu mu me, megi tama me, nage Genuai Bidi me te bidibao. Eno Genuai Bidi, nage te tedali wiegi yai doloba pai kolesaga ebo God dao, tama nago da isimainu sula tagalogobeo. God, nage eno Genuai Bidi dao, tama nage te bomai masigi tiwai dao, tama da te tudi badu te tiwąį madide duala sabo tiwai dao. Nago te Babilon dabe magi elama, tama augwali bomo ilama, tama augwaligo da tonalubo sę emainu magi ilai dao, te dago dwai sęgę wei ponoyu tiai dao.

Godigo Nogi Ugwaba Sabo Tęąbi Po Wabo Buku Dabe 102:28

Tama nago dago wai dabe tonalu, tama augwali bugagia bidaibao. Tama nago te augwa wąį nǫų nosali pedalubo hani dabe selama, tama augwali te nage dali sesemane bidada pomainu yaibao.

Aisaia 46:4

Ena duga God dao, te eno dage tonalua pidubadi, te dage monu dabe eboba usu nama, te ayadeba nisi elaluaibao. Ena digi eno dage deli hani we bidi pedalumainu ilali, te sesemane sogo eno dage auąlu, te tonalu, te dage ma dobola saibao.”