Maika 2:7 - Godigo dwagi yai po buku

⁷ Dage Israel dabe, dage Jekopgo hani bage da, dagego te tobage po obao, agawe? Dagego homugo te Genuai Bidigo dage dali homu sębę eyu, agai dageba magi dwai sę deli me egobeo oba, agawe? Genuai Bidigo dage dali e po elalubao, “Eno te nagame yai po dua digi te doloba pai bidi dabeba waibao, eno augwali me dolobo menio.

Maika 2:7 Referans Kwoze

Godigo Nogi Ugwaba Sabo Tęąbi Po Wabo Buku Dabe 84:11

Genuai Bidi, te da seselalubo bidi, te dago genuai nogi elalubo king dao. Agai te olo tau sabo wiegi yai kolesaga dabolo eyu, tama daba genuai nogi mayu yali. Agai te bugagia dolasa bilibo we bidi dabede te mena nai me deli me dąų me ela sogobeo.

Jeremaia 15:16

Nago po enabolo mobaso, te eno sali, te bidigo nai sabo tiwai yali. Tama nago te pogo ena pemene eyu, wiegi yai haliga mu yai, magi baso meni, ena nagaba elalubao, God Genuai Bidi Tigidali Bomo Elalubo Dao.

Godigo Nogi Ugwaba Sabo Tęąbi Po Wabo Buku Dabe 15:2

Bidigo God agai homu kolesaga tigidali wali painogo ebo bidi, tama sesemane sogo doloba pai kolesaga naga eyu, tama tigidali sogo mu po naga weyu ebo bidi, aga te Genuai Bidigo bede bidibo usu yaibao.

Sekaraia 4:6

Tama tialima enselgo enabolo Genuai Bidigo te po te polalubo gavman bidi Serubabelbolo pusa mao po wali. Genuai Bidigo te po wali, “Nago naga bomogo o naga ami dabego bomogo te sę dabe ebo usu egobeo. Menio. Eno Mobo Bidi Spiritgo bomo nage dali bidaibao, tama te bomo deligo naga nago te sę yaibao.

Hosea 14:9

Te wiegi yai homu kolesaga elalubo bidi dabe, augwaligo te e bukude elalubo po konea sao. Tama eno homugo te augwaligo homu kone palama, tama te po wali pomainao. Te Genuai Bidigo kolesaga te dolo naga elalubao, tama te doloba pai bidi dabego te kolesaga wali peyu bidaibao. Tiali goli, te dwai sę ebo bidi dabe, te augwaligo Genuai Bidigo kolesaga wali pogobeo. Tama tiyu, augwali tulalubo dao.

Aisaia 50:2

“Eno dage gegagasali sogo, magi baso eno te bidi me deli bidibo subewe? Te eno dage i wali sogo, magi baso dagego eno i wali wei ponobewe? Dagego homugo te eno dage ma sabo bomo meni da homu yali da, agawe? Odao. Eno te po obaso, te tamu ąį tigidali mu sula saibao. Eno te po obaso, te genuai soabo ąį te masigi sane olo elalueibao. Te sųgų dabe isilama, kugumini dwai yaibao.

Bugagia Bidibo Kolesagade Po Asęai Buku 28:18

Te bidigo doloba pai kolesaga wali peyu da, te Godigo aga tonaluyu, aga bugagia bidaibao. Tiali goli, te bidigo dwai kolesaga yali da, te polo mu tama aga dolaibao.

Bugagia Bidibo Kolesagade Po Asęai Buku 10:29

Te doloba pai bidi dabego Genuai Bidigo po wali pobaso, agai augwali bugagia tonaluaibao. Tiali goli, te dwai kolesaga ebo bidi dabego agai po wali pisąbaso, augwali dolaibao.

Bugagia Bidibo Kolesagade Po Asęai Buku 10:9

Te doloba pai bidi dabe te bugagia bidaibao. Tiali goli, te dwai sę ebo bidi dabe te geme me duala sobaso, te usu me egobeo.

Polgo Si Wali Pas Timotiba Asęani - 2TI 3:5

Te augwaligo te Godigo po odobo we bidi mu tiwai me sogo bilaibao. Tiali goli augwa homu ugwadu daidu naga tama tiyu, tama Godigo augwaligo kolesaga hasegelabo bomo te augwa tudiba mubo dao. Te tama kolesaga ebo bidi dabe augwalide te nage ibaba kisa selama bidamuo.

2 Korin 6:12

Dago dena homu dagede me palia sabeo. Menio. Dago dage godolo mu ebao. Tiali goli duga digi duga homu da dali palia selama, tama da deli homude me bidibeo.

Polgo Po Pas Rom Dabeba Asęani 7:13

Tialima megi dago magi homu yagawe? Ma te wiegi yai bomai po agai ena te Godide dagalaliwe? Mu menio. Te eno dwai sę ilabo kolesagago naga ena te Godide dagalali, tego ena isai bidi tiwai ilalio. Te dwai sę yabo kolesagago te bomai pogo ena te isai bidi tiwai ilalio. Magi baso meni, te dwai sę ebo te hania pedaluyu tama te bomai pogo da ola mani, te dwai sę ebo te dwai dwai kolesaga mu dao.

Dwagi Yai Gesi Po Jongo Asęani 8:39

Augwaligo Jisasbolo po wei ponoyu, te po wai, “Dago ayago hani page bidi da te Abraham dao,” te po wai. Jisasgo augwalibolo te po wai, “Dage Abrahamgo wai dabe tigi sogo da, teda dage Abrahamgo yali kolesaga gagawai eyu, Godigo po odigi da.

Matyu 3:8

Tama dagego homu kolesaga begelebaso da, teda dagego dwagi yai kolesaga naga yao. Tama tiyu da, dagego duga homu kolesaga mu begelali te dago hania koneaibao.

Maika 3:9

Dage Israel tobolu bidi dabego odiąo. Dagego te doloba pai kolesaga godolo homu meni isąwai. Dagego te wiegi yai kolesaga te dwai kolesaga pedalumainu ilibo dao.

Jeremaia 2:4

Dage Jekopgo bulai wąį wai puluba dabe, dage tigidali te Israel hani dao, dagego te Genuai Bidigo te tiwai po odiąo.

Aisaia 58:1

Genuai Bidigo enabolo te tiwai po wali, “Nago genuai po dągą mu olama, i wao, dua digi i me wagio. Nago bomonama i wabo, te bu wabo nai biugel bu wabo tiwai yao. Te eno we bidi dabeba weyu, te Jekopgo hani dabe, te augwa dwai sęgę me dwai kolesaga po wao,” po wali.

Bugagia Bidibo Kolesagade Po Asęai Buku 14:2

Te doloba pai kolesaga wali pabo bidi, aga te Genuai Bidi wi eyu, aga dologode bidibao. Tiali goli, te tibo po wabo kolesaga wali pabo bidi dabego homugo te Genuai Bidi te olo nai me tiwai da, te homu ebo dao.

Bugagia Bidibo Kolesagade Po Asęai Buku 2:7

Agai te doloba pai bidi dabego homu kolesaga dodoliyu, tama augwaligo te augwa wali pabo kolesaga te bugagia dagalaibao. Tama agai augwali bugagia seselalubaso, te augwali me dologobeo.

Godigo Nogi Ugwaba Sabo Tęąbi Po Wabo Buku Dabe 119:65

Genuai Bidi, nago wiegi yai kolesaga naga sę bidi, enabolo yai dao. Nago naga dąų wali po wali mu pabo dao.

Israel Hanigo Namba 11:23

Tama Genuai Bidigo Mosesbolo po wei ponoyu, e tama po wali, “Te eno bomo usu meni yali bogo. Te pęwadage sogo tama nago suaibao. Tama nago koneama, nago homugo eno nagebolo mawaibao wali te nai te yabao po waibao. Te nai pedalogowe, ma meniwe?” wali.

Godigo Nogi Ugwaba Sabo Tęąbi Po Wabo Buku Dabe 119:68

Nago wiegi yai mu eyu, tama nago olo mu tau sabo kolesaga enade ebao. Nago bomo yai po ena bugagia ola maduao.

Godigo Nogi Ugwaba Sabo Tęąbi Po Wabo Buku Dabe 18:26

Te bidi me deligo te meda mu meni yai kolesaga ebaso da, teda nago me agaba te wiegi yai kolesaga ola mabo da. Tiali goli, te bidigo dwai kolesaga wali pobaso da, teda nago agaba te dwai kolesaga wei ponobo dao.