Maika 2:12 - Godigo dwagi yai po buku

¹² Te Genuai Bidigo po ma weyu, te po wali, “Tialima, nosali eno te dage te sogo me bidibo tigidali Israel we bidi sisinani elalueibao. Te eno dage ma sisiniyu, te sipsip tonalubo bidigo te sipsip dabe te oboba ma sela asobo tiwai gilama yaibao,” wali. “Tama te we bidi hauwa dagego tǫde pągąnalueibao, te sipsip dabe te wiegi yai nosai tubo madi pągąnalubo tiwai yaibao,” wali.

Maika 2:12 Referans Kwoze

Esekiel 36:37

“Ena God Genuai Bidi eno te po obao. Te Israel dabe augwaligo enabolo te augwa we bidi hauwa ilao po hanalubo sogo da, teda eno augwaligo te gedu haluasa po wabo me odaibao.

Maika 7:18

Genuai Bidi, te god me deli nage tiwai me menio. Nago te naga we bidi dabe, te augwali kalabus igi peyu, meba ma asali bage, te augwaligo sęgę nago sela sądubadi gebao. Nago wado po wabo homu sębę te sesemane me elaludubeo. Menio. Sesemane sogo nago wiegi yai pemene eyu, te da godolo mu eyu, tau sabo dao.

Maika 7:14

Genuai Bidi, naga digi te naga dąų olama, sa muani we bidi dabe te naga tonalubo bidi bidao. Augwali te moni genuai dulu te wiegi yai tǫ elalubo bulu du dabe bagede bidibao, tama te gi bulabo wiegi yai tǫ me aiyadu elalubao. Tialima, nago augwaliba te wiegi yai tǫ elalubo madiba te gi bulugi pomainu yao, te Basan me Gileatde, te polobadu yali tiwai yao.

Maika 5:7

Tama te Israel hani meba te boi bidi dabego me dolisąwai bage, augwali te gasa hani hauwa tau sabo bidi pedelaibao, te Genuai Bidigo te hulide tulubage segeni wę te nosaiba tulumainu tagala palobo tiwai eyu, te olo tulubagego te ni dabe wiegi yai pedalumainu ebo tiwai yaibao. Tama augwaligo te sę te Genuai Bidigo bomode naga yaibao, te augwaduba bomogo digi te tegobeo.

Amos 1:12

Eno te isi aiyaba tula palama, tama te Teman taun, me Bosra taun sigo elalubo bomai be dabe te isigo domainu ulaibao,” te po wai dao.

Hosea 1:11

Tama te hani Juda me Israel hani si te ma gesabidi deliba elama, tama te bulu tǫ kantri dedeli naga pedelaibao. Tama augwa polalubo bidi deli naga te nigilaibao, tama augwali te bomai kantri pedelama, tama augwaligo ebo sę tigidali te wiegi yai naga pedelaibao. Augwali te Godigo nigali wiegi yai gi tiwai pedelaibao. Mu tama, Godigo te sę ebo sogo, te genuai side mu yaibao,” wali.

Esekiel 37:21

Tialima, nago augwalibolo e tama po walao, ‘Ena God Genuai Bidi, eno te po obao, eno te tigidali Israel dabe augwali te bidibo te tigidali kantri dabede oda selama, sisinama, tama augwali augwa tǫ muba eno odasa paibao.

Esekiel 34:31

Dage eno we bidi, dage eno sipsip kibu tiwai dao, tama dage ena tǫde bidiyu, tama eno dagebolo nai mabo dao. Tama ena dagego God bidibao, Genuai Bidi eno po polo wali.’ Te po augwalibolo pusao,” God Genuai Bidigo te po wali.

Esekiel 34:22

Tiali goli, eno ena te sipsip hani dabe ma oda selama, tama eno augwaliba te dwai nai dabe augwaliba ma asomainu sula tagalogobeo. Tama eno ena sipsip dabego kolesaga osola sulama, tama wiegi yai sipsip dabe meba muyu, me dwai sipsip dabe meba muyu yaibao.

Esekiel 34:11

“‘Ena God Genuai Bidi, eno te po te obao, te ena digi ena sipsip dabe gegelama, tama augwali ma oda selama, tama ena digi augwali bugagia tonaluaibao.

Jeremaia 23:3

Tama ena digi eno te dwasianu elalubo sipsip hani te eno augwali sela sąwani tǫ kantride sisinaibao. Tama eno te augwali te augwa obo tomoba ma odasa asaibao. Tama augwaligo te wai hauwa ame nenama, te umabo hauwa pedelaibao.

Aisaia 34:6

Tialima, te Idom dabego kaneme me iligo te Genuai Bidigo bainat hwą halua saibao. Te sipsip me meme dabe te bidi dabego te ofa yainu elama, te ofa yainu ebo bidi dabego nogode kaneme piliga pabo tiwai yaibao. Genuai Bidigo te genuai hani we bidi dabe mu te taun Bosra te Idom bulu tǫ kantride elaibao wali, te aga digi genuai ofa ebo tiwai dao.

Aisaia 27:12

Tama te sogo Genuai Bidigo aga we bidi gasabulude dabe bidibo we bidi ma oda saibao. Te węYufretisdu gagalama, te Isip buluba usu nigi paibao. Agaiaugwali deli deli saibao, te bidigo aga wit dili dali bo dalisela sąnama, te du naga elalubo tiwai yaibao. Tama tewiegi yai wit du selama, te tǫgo nigai senede mubo tiwaiyaibao.

Aisaia 11:11

Tama te sogo Genuai Bidi agai bomo te si wabo sogo ma ola mayu, tama aga we bidi hani augwa buluba ma odasa asaibao. Te we bidi dabe te bulu Asiria, me Isip, me Sudan, me Elam, me Babilon, me Hamat, me te Mediterenian tamu ąįde ailande bidibo dabe me dao.

Jeremaia 3:18

“Te sogo te Juda dabe augwali te Israel augwali dali deliba sisinama, te augwa kantri te not badu, te megi bidibo madi tagalaibao. Tama augwali te eno duga wąįba mani tǫba bidagasaibao, te augwa hanigo te tǫ sesemane elalua pidu bidaibao,” wai.

Tigidali Nai Gagalama Nigali Side 36:33

Te Bela isibaso, tama te Jobap, te bidi Serago ogwago, te aga te Bela tuni bidi sęde hasegelama, bidali. Bosra te bulu te Jobapgo page bulu dao.

Aisaia 5:17

Te hanu dabe sese dolaibao. Tama nosai dabego bulu mesega saibao. Tama sipsip kibu de meme kibu sigo te mone hauwa elaluali bidi dabego be elaluali pesageba nosai tuagasaibao.

Maika 2:13

“Godigo te aga we bidi kalabuside bidali tagala palama, te augwali buluba dinaibao. Augwaligo te taun obo aluama, te buluba teda soaibao, te augwa king da, te Genuai Bidi digi da, te augwali asobodu polasa paibao,” Genuai Bidigo te po wai dao.

Maika 4:8

Taun Jerusalem, God nagede bidiyu, te naga we bidi dabe tonalubao, te kibu sipsip page bidigo te sipsip dabe tonalubo tiwai ebao. Tialima, nosali nage te polalubo taun pedaliyu, te hasia polasa tǫ kantri elaluali tiwai ma pedelaibao.

Maika 5:8

Te Israel hani te gasa hani tomode bidiyu, te laiongo buside te hasa sibi ela tueinu gegebo sę tiwai eyu, ma te sipsip obode ela tueinu ebo tiwai yaibao. Aga te sipsip dabe tomoba pelama, te augwali daiba samonama, te augwali gąųgo subigila tologa sąsąbo tiwai eyu, tama te sipsip dabe tau sabo bidi me deli meni ebo ąǫ yaibao.

Tuni Bidi Dabego Po Elalubo Buku Deli 1:44

Tama Bela isibaso, Jobap, te Serago ogwa, te taun Bosra bidi, te king pedelai dao.

Esekiel 34:13

Te eno augwali gasa kantriba ma oda sigi pelama, tama augwali te kantri Israelba ma odasa asaibao, te augwa tǫ mu dao. Tama augwali tigidali sogo bulu du dabede bidiyu, me wę pąde bidiyu yaibao.

Sefanaia 3:20

Te asobo bubugade, eno dage te tigidali pesagede bidalubo te pesagede ma oda saibao, tama eno dage duga bulu muba ma odasa asaibao. Tama me eno dage genuai nogi menama, tama tigidali tǫde we bidigo dagego nogi ugwaba saibao. Tama te sogo eno dagego sę wiegi yai pedelemainu ilama, tama dage wiegila bidibo elaluaibao. Dagego te sę pedelebo te duga gedugo mu sueibao. Ena Genuai Bidi, eno po polo walio,” tama wali.