Maika 1:3 - Godigo dwagi yai po buku

³ Genuai Bidigo te aga wiegi yai bulu digi te tagalama, te asabo homu ebao. Aga dulama, te bulu du padode daidu bilagasaibao, wai.

Maika 1:3 Referans Kwoze

Amos 4:13

Godigo naga te bulu du dabe nigali, te wali me pedalumainu ilibao. Agai aga homu kolesaga te we bidibolo haniliyu, ola mabo dao. Agai bomogo naga te be posobo ula hasegeleyu, tama be hulibo dao. Aga te bulu du dabe daide ugwadu biliyu, te tǫ habu tigidaliba tonalubao. God, Tigidali Bomo Elalubo Genuai Bidi, aga digi te kolesaga ebo dao.

Aisaia 26:21

Suao, Genuai Bidi aga bulu dagalu tagalama, e tǫba te asobao, te e tǫde we bidi dene mawainu, tama augwa yali dwai sę wei ponainu. Tama tǫgo te bidi dabego kaneme me geme dualogobeo, te gasa bidi dabego augwali ela wialali dabe. Menio. Agai te bidi dabego yali dwai kolesaga dabe sese tama haninaibao.

Bomai Po 32:13

“Godigo augwali sula tagalu, te bulu du dabe tonalumainu ilali, tama te gide bulali nai dabe te augwaligo sela tuyu yali. Tama augwaligo te pusu nai te hani bunu ge te masigi dedagede sela tuyu yai dao. Tama me augwaligo oliv ni bugagia holali, te masigi hauwa yai tǫde.

Habakuk 3:19

God eno Genuai Bidi da, agai enabolo bomo mobao. Agai eno sągą bomo ilali, te bulu du polo holobo uni hasa dia dabego sągą tiwai ilama, tama agai ena te bulu du dabe daide ugadu bugagia bilimainogo yai dao.

Godigo Nogi Ugwaba Sabo Tęąbi Po Wabo Buku Dabe 115:3

Dago God te dagalude bidibao. Te agai magi sę me deli yabo homu ebaso da, teda agai te sę eyu naga ebo dao.

Esekiel 3:12

Nosali Godigo Mobo Noma Bidigo ena ugaba sagoasa holali. Te ena tudi badu, te pedauwali me delidu te tiwai i bomonama wabo odali, “Genuai ula me bomo te dagalude bidibo Genuai Bidi elalubao. Te aga nogi ugaba sao,” walio.

Aisaia 25:10

Genuai Bidigo Saion bulu du bugagia tonaluaibao. Tiali goli, agai te Moap dabe mu dolaibao. Agai te boi bidi dabego augwali dolama, mesegelama, agayagasomainu yaibao. Te kau kibu dabego nosai augwa diba agalama, ela bulubo tiwai yaibao.

Jopgo Po Asęani Elalubo Buku 40:12

Awe. Nago dwai kolesaga ebo bidi dabe sulama, tama augwali aiyaba elaluao. Tama nago dwai kolesaga ebo bidi augwa bidibo bulude sągągo agayagameo.

Bomai Po 33:29

Te Israel dabe, dage wiegi yai homu pemene mu yao. Genuai Bidigo dage tau selama, ma oda sali tiwai, agai gasa we bidi hani me tau sai menio. Genuai Bidi aga digi te dagego awa tiwai elama, me dagego moni ge hwą tiwai dao. Agai dage obo ela selama, tama dagego wąbi hwįbode dagego gasa bidi dabe elalumainu ilibo dao. Dagego boi bidi dabe dageba aselama, tama dagego augwali hobede emainogo dageba gela wagasaibao. Tiali goli, dagego augwali agalama, tama augwali aiyaba elaluaibao,” Mosesgo te po wai.

Sekaraia 14:4

Te sęgę pedalubo sogo Genuai Bidi te bulu du Oliv pąde te Jerusalem giliga pedalubo badu dolaluaibao. Tama te bulu du Oliv si badu pedasa pelama, tama genuai bulu odogo te tomode elaluaibao. Te bulu du me badu pedai te bugasa te not badu peyu, te me badu pedai te saut badu pedasa paibao.

Amos 9:5

God, Tigidali Bomo Elalubo Genuai Bidigo, agai nogogo te tǫ diąnubaso, te tǫ memenege yaibao. Tama tigidali tǫde bidalubo we bidi, augwali te haliga sęgę elama, gela waibao. Tigidali pedai badu tǫ te ugwaba samanu posogą palama, te ma degasa dulaibao, te wę asobogo te wę Nail ge bo delama, te nosali ma keka sabo tiwai yaibao.