Dwagi Yai Gesi Po Lukgo Asęani 7:44 - Godigo dwagi yai po buku

⁴⁴ Te sogo naga Jisas te we pageba ugwaba begegi soyu, Saimonbolo te po walio, “E we nago subawe? Ena nago beba asali goli, nago ena bugagia gesesiąwai, eno sągą ąį tela yabo ąį me mawai meni. Tiali goli, e wego gela guago eno sągą sawali ąį tedalama, aga bobobage tobolu nisigo eno sągą holali.

Dwagi Yai Gesi Po Lukgo Asęani 7:44 Referans Kwoze

2 Timoti 5:10

Tama e tobage haniani wiegi yai sę yai nogi elalubo we tiwai: agai te aga wai puluba bugagia tonaluali. Tama agai te gasa bulu we bidi augwali te agai beba asobode nai mayu yali. Tama imilai homu eyu, agai te Godigo po odobo we bidi tau siyu sągą we tedabo sę yai dao. Tama agai te sęgę dali dene dali sali we bidi dabe tau siyu yai. Tama te wilawe we aga te tobage haniani we bidi tau sabo dwagi yai sę ebo kolesaga wali pabo we bidali da, teda nago te tobage we dabe augwali naga nogi te bukude asęąo.

Te Israel Tobolu Bidi Dabe 19:21

Tialima, agai augwali te aga beba odasa pelama, tama agai te donki si me nai mani. Agai te wę augwaliba menama, tama augwali sągą wę tedelama, tama nosali augwali nai me wę me tuali.

Tigidali Nai Gagalama Nigali Side 43:24

Tama agai augwali Josepgo beba odasa pali. Agai augwalibolo te sągą wę telabo wę mayu, te nai meba te donkibolo mayu yai.

Tigidali Nai Gagalama Nigali Side 19:2

tama agai te po wai, “Abagi, dage si aselama, duayagasu bolo yao,” te po wali. “Dage si eno beba asiąo. Dage si sągą bolo wę tedelama, tama dage si megi hulide ede piagameo. Tama kigamu duga si hogodama, pagameo.” Tiali goli, augwali sigo po wei ponoyu, te tiwai po wali, “Menio. Da si te bede me pigobeo. Te da si e bidi sisinibo pesagede piaibao,” wali.

Tigidali Nai Gagalama Nigali Side 18:4

Te eno bidi me deli i olama, te wę sela asama, dage sągą wę telamainu yaibao. Dage te ni pagede toma tuyu, dulaluiagameo.

1 Samuel 25:41

Abigelgo te po odama, teda aga kidu sugunama, tama tobolu tǫba basi gulali. Tama aga te tiwai po wai, “Ena te aga odolali sę ebo we tiwai dao. Tama eno ena te genuai bidigo sę ebo bidi dabego sągą wę telawaibao,” wali.

Jems 2:6

Tiali goli dagego te magi nai meni yai bidi augwali gisugu mabo dao. Tama dagego bugagia kone palao. Te walu hauwa munalubo bidi augwaligo Godigo po wali pisiąbadi, augwaligo dage dali dwai sę haniani eyu, tama dage aiyaba elaluama, tama dagebolo sęgę mabo dao. Tama te bidi dabe augwaligo naga dage te po tų ebo digi kegasa pabo dao, augwaligo dagego nai somainogo.

2 Samuel 11:8

Devitgo Uriabolo tama po wai, “Wiegi yai mu dao. Eno odalio. Megi nage te naga beba pelama, tama wę payu, toma nao.” Tialima Uriago te king tagalama, buluba dia soali. Tama nosali Devitgo te bidi me deli tagala palama, te wiegi yai homu ilibo nai te Uriaba selasa pali.

Dwagi Yai Gesi Po Lukgo Asęani 7:38

Jisasgo sągą pagede tudi badu dolaludu, gela weyu, aga gela guago Jisas sągą sawali nadugwali. Tama te we aga bobobage tobolu nisigo Jisasgo sągą sawali holama, sągą sawali si nono nenama, te denami wel aga sągąde pilali.

Dwagi Yai Gesi Po Lukgo Asęani 7:43

Saimongo te po wali, “Eno homugo mone genuai mu sali bidigo te bidi dali homu mu kęąluaibao,” wali. “Nago po dolode walao,” Jisasgo te po wali.

Dwagi Yai Gesi Po Jongo Asęani 13:5

Tama tilama, agai ąį moni pouba gelama, tama agai wali pabo bidi dabego sągą ąį telabo gagalama, tama aga tigi holobo ugwago sągą ma holai.