Kolosi 2:12 - Godigo dwagi yai po buku

¹² Magi baso meni. Te dagego duga homu begelama tama ąįba dulali sogo, te sogo dage Krais dali hodobo pubulali tiwai yai. Tama te sogo me te dage te ąįdu ma hodaluali sogo, te dage Krais dali hodobo gų pagede ma hodaluali tiwai yai. Aga te isali we bidi tomode osogo bidama tama Godigo aga tedu ma hodolali, agai sę yabo bomogo. Tama dagego te bomode duga homu bugagia dąų obaso, God agai dage me Krais dali hodobo hodolali tiwai yai.

Kolosi 2:12 Referans Kwoze

1 Pita 3:21

Tama te ąį te augwaligo dage baptais mani ąį tiwai dao. Tama Jisas Krais aga te gų pagede ma hodalobaso, Godigo te baptais mani ąįgo dage tau siyu ma dobola sali. Te ąįgo te dagego tigide elalubo meda sela sąyu, tama dage tau siyu ma dobola sabo menio. Te meni. Te dagego te doloba pisiąwai sę idali weyu, tama dagego Godibolo te da tau sao po weyu, tama augwaligo dage baptais mawai dao. Tama te tiwai ebogo dage tau siyu ma dobola sabo dao.

Galesia 3:27

Tama dagego duga homu tigidali Kraisba munama tama baptais selama, tama dage aga dali wadolama tama bidibao. Tama bidiyu, bidi aga gudubo ugwa gudubo tiwai eyu, dagego Kraisgo digi homu kolesaga duga homude dąų walao, te dagego te homu kolesaga wali pomainogo tama yao.

Godigo Sęba Tagala Palai Bidigo Po 2:24

Tiali goli, Godigo te bidi ma hodolobaso, tama aga ma hodaloai dao. Bidi isibo sęgo Jisas kalabus usu isąbaso, aga dene hauwa dali isama, Godigo agade te dene silali.

Efesus 3:17

Eno homugo dagego Kraisde konealubo po dąų obaso da, teda te Kraisgo dage tau siyu dage homude wiegi yai kolesaga ola mayu bidaibao. Tama dagego God dali we bidi dali wiegi yai homu eyu godolo ebo kolesaga bugagia emainogo eyu, tama agai dage te sęde tau somainogo eno God dali hanalu wabo po wabo dao. Tama eno homugo dagego te God dali we bidi dali godolo ebo kolesagade te dage dolaluao, te ni pedali tǫde dąų olama te ni dąų weyu dolalubo tiwai yaibao.

Polgo Po Pas Rom Dabeba Asęani 4:24

Menio. Agai te po dabolo me walio. Te Godigo dago Genuai Bidi Jisas te gų pagede ma hodolali. Tama te sęde dago konealubo po dąų obaso da, teda Godigo homugo da te doloba pai we bidi dao, te homu agai da dali me yaibao.

Efesus 4:5

Tama dago Genuai Bidi deli naga elalubao, tama Kraisde dago konealubo po deli naga elalubao, te baptais sabo kolesaga me te page deli digi naga elalubo dao.

Efesus 2:8

Tama tiyu, Godigo da olo tau sabo kolesaga naga tego dage tau selama, dage Satango nogode ma sali dao. Tama dagego te Krais hagede te konealubo po duga homu dąų olama, tama God agai dage tau siyu ma sali dao. Te dagego bomogo me ebeo. Te menio. Te God agai dage olo tau sai dao.

1 Korin 15:20

Tiali goli te tiwai me egobeo. Mu menio. Te Krais isali, tama mu tama Godigo aga te isai we bidi tomodu ma hodolali. Aga te isali we bidi dabe hodalomainogo te hasia polasa hodaluali bidi aga dao. Tama te gide nai inabo hasia pedalali nai tiwai aga te gų pagede hasia mu ma pedalai dao. Tama tibaso, dago koneani, agade konealubo po dąų wali we bidi tigidali augwali me te Godigo ma hodolaibao.

Hibru 12:2

Tama tiyu dago gedugo Jisasba naga tonono iyąo, aga te dago agade konealubo po dąų wabo kolesaga page bidi, tama nosali agai dago agade tią pabo kolesaga ebo mu usu naibao. Polobadu Jisas aga homugo te wiegi yai homu pemene yabo sę te nosali sabo homu elama, tama aga bomo elama bidali, tama aga dene bugagia tolama aga ni pedaide isai. Agai homugo te ni pedaide hale sabo te olo nai tiwai da, te homu yai. Tama megi da agai genuai nogi elalubaso, aga te God dulalubo sia saide te dolo nogo badude megi dulaluyu bidibo dao.

Filipai 1:29

Magi baso meni, dage, dagebolo Godigo dwagi yai sę olo elama, tama agai dage te Kraisgo sę ebo we bidi nigilai dao. Tama tiyu, agai dage tau selama, tama dagego Kraisde konealubo po homugo dąų wali. Te me elalubao, te agai dagebolo agai nogide dene sabo kolesaga me olo manio, te wiegi yai dao.

Efesus 5:14

Tama tialigo da, te po me elalubao: “Nage pila mubo bidi, hodaloao, tama nage te gų pagede ma hodaloama, tama Krais agai wiegi yai ula nage mawaibao.”

Efesus 3:7

Te God agai wiegi yai po eno pusigi pomainogo ena te sęba muai dao. Tama agai te olo tau sabo wiegi yai sę enabolo eyu, tama agai bomo me enabolo mani, te ena dąų olama eno te sę emainogo tebo dao.

1 Korin 12:13

Tama da me te tiwai elalubao. Te da meba te Juda hani da, da meba te Juda hani bidi ąǫ isąwai bage dao, meba te masigi sisąbo olo sę ebo we bidi da, meba olo sę isiąwani we bidi dao. Tiali goli te Tedali Mobo Bidi delide naga da tigidali te baptais selama tama deli tigi poaį naga pedelali, tama Godigo te Tedali Mobo Bidi deli naga dabolo mawai dao.

Polgo Po Pas Rom Dabeba Asęani 7:4

Tama te tiwai me dage dali pedalalio, eno ama dedeo. Dagego tigi te Krais dali kęą selama, tama te dali dage isalio, tama te bomai pogo dage me tola sabeo. Tama bidi isai we gasa bidi dali bidigi pabo tiwai, dage gasa bidi dali bidi pelama agai dage sali, aga te Godigo aga te gų pagede ma hodolali bidi. Tama dago te Godigo homu kolesaga wali peyu tama wiegi yai sę emainogo eyu, tama Godigo aga te gų pagede ma hodolali.

Godigo Sęba Tagala Palai Bidigo Po 14:27

Tama augwali si Antiokba ma sabolama, augwali sigo Jisasgo po wali pabo we bidi dali deliba sisinagasali. Tama augwali sigo te sę yali po augwalibolo pusali, tigidali nai Godigo augwali si tau sali sę me, tama Godigo te Juda hani isąwai we bidi augwaligo agai po konealubo sunumi dayali.

Dwagi Yai Gesi Po Lukgo Asęani 17:5

Te po sela pabo bidi augwaligo Genuai Bidi Jisasbolo te po wali, “Dena homu kolesaga nageba muani digi, da usube. Da tau sao, dena homu kolesaga tigidali nageba mumainu. Te tiwai munama, te usu yaibao,” te po wali.

Godigo Sęba Tagala Palai Bidigo Po 2:32

Tama te bidi Jisas, Godigo aga ma hodolali. Te sę da Godigo po wali pabo bidi dabego gedugo mu suali.

Kolosi 1:29

Tama te sę emainogo eno bomo eyu tama ena sę dene mu ebo dao. Kraisgo enabolo aga genuai bomo menama, tama te bomogo naga eno bomo eyu te sę ebo dao.

Kolosi 2:13

Polobadu dage Juda bidi hani isąwai bage, dagego te Godigo bomo yai po wali pisąyu, dagego te bomo yai po bolama dagego haniani dwai sę iduyu bidai. Tama tibaso dage Godide te isali bidi dabe tiwai bidai dao, dagego aga me konebeo. Tiali goli Godigo dage Krais dali gų pagede ma hodolali tiwai elama, tama bidibo ula menama, tama dage megi bugagia bidibao. Godigo dago yali dwai sę sęgę tigidali mu sela sąwai dao.